David Trimble

De Wikipedio
Irez ad: pilotado, serchez
David Trimble

William David Trimble, Barono Trimble, PC (15 oktobro 1944) esas britana politikisto qua esis la unesma prima ministro regionala (First Minister) di Nord-Irlando de 1998 til 2002, e duktero dil Unionista Partiso di Ulster (UUP) de 1995 til 2005.

Il esis anke parlamentano por Upper Bann de 1990 til 2005 e nord-irlandana asemblano (MLA) por Upper Bann de 1998 til 2007.  En 2006, il divenis dumviva pero en la Pero-Chambro ed un yaro pose livis la UUP por adherar la Konservema Partiso.

Trimble komencis sua kariero kom profesoro di lego che Queen's-Universitato di Belfast en la 1970a yari, dum qua tempo il komencis relatar la paramilitale-ligita Vanguard Progressive Unionist-Partiso (VPUP).  Il elektesis a la Konstitucal Asemblo di Nord-Irlando en 1975, ed adheris la UUP en 1978.  Ankore che Queen's-Universitato, il duris sua akademiala kariero til ke il elektesis kom parlamentano por Upper Bann en 1990.  En 1995 il neexpektite elektesis kom duktero dil UUP.

Il partoprenis la negocii qui duktis a la Good Friday Agreement (Akordo di Santa Venerdio) en 1998, e (kun John Hume) ganis la Nobel-Paco-Premio ta-yare pro sua esforci.  Il pose elektesis al ofico First Minister (prima ministro regionala) di Nord-Irlando, ma lua periodo esis tumultoza e freque interruptita da deskonkordi pri la kloktabelo di senarmesko da la Provizora Irlandana Republikan Armeo (IRA).

Pos vinkesar en la nacionala elekto di 2005, Trimble demisionis kom duktero dil UUP kurte pose.  En junio 2006, il aceptis dumviva pereso en la Pero-Chambro, asumante la nobeleso Barono Trimble, di Lisnagarvey en Komtio Antrim.   Il ne ri-kanditatesis por la Asemblo, e vicee livis la UUP por adherar la Konservema Partiso.