Golden Earring

De Wikipedio
Salti al navigilo Salti al serĉilo
Golden Earring en 1974

Golden Earring (Orea Oreloringo) esas nederlandana rock-bando, fondita en 1961 en Den Haag kom The Golden Earrings.

Li atingis internaciona famo per sua kansoni "Radar Love" en 1973, qua atingis numero un en la nederlandana rangi, atingis la supra dek en Britania e numero 13 en la usana rangi, "Twilight Zone" en 1982, e "When the Lady Smiles" en 1984.  Dum sua kariero li havis preske 30 disketi en la supra dek dil nederlandana rangi; dum la yari li anke produktis 25 albumi.

La membri dil bando esas kunfondinti Rinus Gerritsen (basgitaro e klavaro) e George Kooymans (voci e gitaro), kun Barry Hay (voci, gitaro, fluto e saxofono), e Cesar Zuiderwijk (tamburi e perkuto).  Omna muzikisti en la nuna membraro esas kontinue membri depos 1970, ma altra muzikisti adheris e livis la grupo dum la yari.

Historio[redaktar | redaktar fonto]

Frua yari (1961–1969)[redaktar | redaktar fonto]

To quo divenis Golden Earring formacesis en 1961 en Den Haag da lore 13-yari-evinta George Kooymans e lua 15-yari-evinta vicino, Rinus Gerritsen.  Originale nomzita le Tornados, li chanjis la nomo a The Golden Earrings kande li deskovris ke la nomo The Tornados ja uzesis da altra grupo.  La nomo The Golden Earrings cherpesis del instrumentalo "Golden Earrings" da la britana grupo The Hunters.

Unesme pop-rock-bando kun Frans Krassenburg kom chefkantisto e Jaap Eggermont ye tamburi, The Golden Earrings unesme sucesis per sua debuto-disketo "Please Go", registragita en 1965.  Ol esis sucesoza en Nederlando. Deskontenta pri la registreyi en Nederlando, la jeristo dil bando Fred Haayen aranjis ke la nexta disketo registragesez che Pye Records en London.  La disko facita che Pye, "That Day", atingis numero du en la nederlandana rangi.

The Golden Earrings en 1969

En 1967, Barry Hay adheris la grupo, remplasante Krassenburg kom chefkantisto.  Sequanta-yare, la bando ganis sua unesma numero un en Nederlando per la kansono "Dong Dong Diki Digi Dong".  En Usa, li helpesis da prizentisto ("DJ") che East Coast FM e muziko-kritikisto Neil Kempfer-Stocker, qua unesmafoye pleis kansono da la bando per radio en Usa.

Ica disketon sequis sucesoza "psikadelika" albumo Eight Miles High, kun 18-minuta versiono dil titulo-kansono, ipsa versiono di la kansono di 1966 da The Byrds.  La "live"-a versiono, qua ofte duris 45 minuti, pleesis dum lia unesma e duesma usana turi en 1969.  Lia usana diski dum ta periodo editesis da Perception Records en New York, e lia albumo Golden Earring, konocita kom Wall of Dolls, e disketo "Back Home" faliis en Usa ma atingis numero 1 en Nederlando.

Internaciona famo (1970-1989)[redaktar | redaktar fonto]

En 1970, tamburisto Cesar Zuiderwijk adheris la bando, kompletigante la "klasika" membraro di Golden Earring.  La bando juis kurtatempe internaciona famo dum la 1970a yari kande la radio-versiono di "Radar Love" (1974), de la Ora-certifikita albumo Moontan sucesis en ed Europa ed Usa.  Golden Earring emtamis sua unesma turo di Usa en 1969-1970.  Pro usana influi, lia muziko evolucionis vers hard rock, e li pleis kun Jimi HendrixLed ZeppelinProcol Harum ed Eric Clapton. Inter 1969 e 1984, Golden Earring finis 13 turi di Usa.  Dum ta periodo, li apertis koncerti por SantanaKing CrimsonThe Doobie BrothersRush e .38 Special.  Dum 1973-74, kande "Radar Love" sucesis, Kiss ed Aerosmith apertis por li.

Golden Earring juis kurta periodo de steleso en Usa, ma ne povis sucesar til "Twilight Zone" en 1982.  La muziko-video dil kansono, direktita da Dick Maas, pleesis che la recente lansita kanalo MTV en Usa, e helpis la kansono aden la supra dek.

La grupo en 2009

"When the Lady Smiles" esis internaciona suceso en 1984, atingis No. 3 en Kanada e divenis lia kinesma numero un en Nederlando, ma ne sucesis en Usa. La motivo esis ke la muziko-video interdiktesis de MTV, pro nudeso e ceno qua montras la rapto di monakino.  Redaktita versiono di la video pleesis, ma faliis.

Dum turar en Usa en 1984, la bando pleis che Six Flags Great Adventure en Nova-Jersey ye mayo 11ma, kande meze dil koncerto fairo eruptis, ed ok dekedevanti mortis.  Pos ta turo, Golden Earring enfokigis Europa, ube li ankore atraktas enorma audantari.

La grupo pauzis pos edito di The Hole en 1986 por enfokigar altra projeti, e Hay e Kooymans editis solo-albumi dum la sequanta yaro.  La grupo lore rikunvenis por registragar sua final albumo di le 1980, Keeper of the Flame en 1989.