Hermosillo

De Wikipedio
Salti al navigilo Irez a serchilo
Hermosillo
Hermosillo Collage.jpg
Kelk imaji pri Hermosillo.
Lando: Flag of Mexico.svg Mexikia
Stato: Sonora
Informo:
Fondita ye: 18ma di mayo 1700
Fondita da: Juan Bautista de Escalante
Latitudo: 29°05'56" N
Longitudo: 110°57'15" W
Altitudo: 210 m
Surfaco: 168,2 km²
Habitanti: 984 342 (2017)
Denseso di habitantaro: 5852,21 hab./km²
Horala zono: UTC-7
Urbestro: Célida López Cárdenas
Mapo:
Mapo di Hermosillo
Oficala retosituo:
www.hermosillo.gob.mx

Hermosillo (originale Santísima Trinidad del Pitic) esas chef-urbo dil stato Mexikiana Sonora, jacanta an la centrala regiono dil stato, cirkume 270 kilometri de la frontiero Mexikia-Usa. Samatempe Hermosillo esas la nomo dil municipo ube l'urbo esas.

Historio[redaktar | redaktar fonto]

Hermosillo inter 1910 e 1915.

Homala restaji de 3.000 yari ante nun trovesis en la nuna regiono dil urbo, qua habitesis dal indijeni Seri, Tepoca e Pima ante l'arivo di Hispani. L'unesma kontakti inter Hispani ed indijeni en la regiono eventis dum la 16ma yarcento, e l'unesma misionisti arivis en Sonora en 1614.

Hermosillo fondesis la yaro 1700, komence nomizita Santísima Trinidad del Pitic. La precipua skopo dil fondado dil vilajo esis kontrolar la habitantaro indijena, e tale protektar la populizo dal Hispani. En la fino dil 18ma yarcento la vilajo rinomizesis Villa del Pitic (Vilajo dil Pitic), e dum la yaro 1828 la urbo rinomizesis Ciudad de Hermosillo (Urbo di Hermosillo), honore la generalo Jose María González Hermosillo, militisto qua luktis dum la Mexikiana nedependesko-milito en la vicina stato Sinaloa. L'urbo Hermosillo divenis l'unesma chef-urbo dil stato, qua kelkafoye transferesis ad altra urbi dum la 19ma yarcento, til ke dum la yaro 1917 la statala konstituco konfirmis Hermosillo kom la definitiva chef-urbo dil stato Sonora.

Dum la yari 1980ma, l'automobilala kompanio Ford konstruktis fabrikerio en la urbo.

Geografio[redaktar | redaktar fonto]

Hermosillo jacas ye 29°05' nord-latitudo e 110°57’ west-longitudo, 282 metri sur la marala nivelo, ye 270 kilometri adsure la frontiero di Usa. On povas arivar a Hermosillo per aviono, per la Internaciona Aeroportuo Ignacio L. Pesqueira, de ube on povas voyajar aden la tota Mexikiana Republiko e kelka exterlandana destini. La precipua voyego esas la Internaciona Voyego 15, olqua finas ye la nordo en la frontiero Mexikia-Usa, ed adsure on povas voyajar al centro dil republiko.

Katedralo di Hermosillo.

La municipo Hermosillo posedas propra plajo ube jacas un del precipua turistala zoni dil stato, Kino Bayo. Avan Kino Bayo esas la Insulo dil Sharko, naturala parko protektita dal federala guvernerio. Insulo dil Sharko esas anke la maxim granda insulo di Mexikia.

Habitantaro e Demografio[redaktar | redaktar fonto]

Segun la demografiala kontado di 2005, l'urbo posedis 707 890 habitanti e la tota municipo posedis 734 506 habitanti, quankam extraoficiala kontadi parolas pri plu multa quanteso di habitanti kam la oficala kontado. Granda parto dil kreskado di habitantaro eventis pro la forta industriizo qua experimentabas la urbo, note pro renversi pri automobilifado e la relata industrii. Anke la municipo posedas granda zoni di kultivado qui atraktas multa personi del sudo di la lando.

La habitantaro Hermosillo kreskas mezavalore 3,13% omnayare.

En la urbo habitas indijena habitanti dil tribuo Yaqui (Yaki), qui trovesas en la populana quarteri Coloso e Matanza.

Anke en Hermosillo lojas ankore l'originala tribuo dil municipo, le Seri, qui nuntempe lojas en la plajala parto dil municipo, Kino Bayo, qua esas ye cent kilometri dil urbo. Nune on evaluas ke existas cirkum 900 personi.

Ek la exter-statala habitanti dil municipo trovesas kelka mili de indijeni dil etnio triqui (triki), populani originala dil stato Oaxaca, qui fondis sua propra komunaji cirkume la vilajo Miguel Aleman, la precipua zono pri agrokultivo dil municipo.

Klimato[redaktar | redaktar fonto]

La vetero di Hermosillo esas extremoza, tre varma dum la somero, kande la temperaturi atingas la 45° Celsius, e la rekordo esas 52° Celsius, olqua kelkafoye eventabas e dume la vintro esas de fresha a kolda, kun temperaturi di apene kelka gradi sur 0° Celsius, e la rekordo pri koldeso esas -5° Celsius.


Ekonomio[redaktar | redaktar fonto]

La precipua aktivesi en la urbo Hermosillo esas l'industrio, agrokultivo, brutar-komerco, peskado, e komerco.

Segun la Nacionala Instituto pri Geografio, Statistiko ed Informatiko, la labor-aktiva personi ye la yaro 2000 esis 238 018.

Edukado[redaktar | redaktar fonto]

Hermosillo posedas multa institucuri por omna niveli di edukado, sive publika, sive privata, e plura institucuri pri superiora edukado. Inter li esas l'Universitato di Sonora, olqua studias plu kam 29.000 studenti e docas plu kam 3.000 docisti. Yen listo pri skoli di superiora edukado:

  • Universitato di Sonora
  • Centro pri Superiora Studii dil Stato Sonora
  • Universitato Kino
  • Universitato dil Valo di Mexikia
  • Universitato Teknologiala di Hermosillo
  • Universitato Tek-Milenio Campus Hermosillo
  • Instituto pri Teknologio ed Superiora Studii di Monterrey Campus Sonora Norte
  • Universitato di Hermosillo
  • Instituto pri Cienco e Superiora Educado di Sonora
  • Skolo pri Pedagogio dil Stato
  • Skolo pri Pedagogio Superiora di Hermosillo
  • Universitato Nacionala pri Pedagogio.