Ford

De Wikipedio
Jump to navigation Jump to search
Logotipo* de Ford Motor Company.
Sideyo di Ford Motor Company en Dearborn, Michigan.

Ford Motor Company (ordinare konocita kom Ford) esas plurnaciona automobila fabrikanto kun sideyo en Dearborn, Michigan, proxim Detroit. Ol fondesis da Henry Ford ye la 16ma di junio 1903. La firmo anke vendas luxoza automobili sub la la marko Lincoln, e kontrolas Braziliana fabrikanto di vehili "tota-tereni" Troller ed Australiana fabrikanto FPV. Antee, ol anke produktis kompozanti por automobili e traktori.

Ford anke kontrolas 2.1% di la acioni de Japoniana fabrikanto di automobili Mazda, 8% di Aston Martin e 49% de Chiniana fabrikanto Jiangling. La kompanio anke partoprenas en kelka joint ventures: en Populala Republiko di Chinia (Changan Ford Mazda), en Taiwan (Ford Lio Ho), en Rusia (Ford Sollers), en Tailando (AutoAlliance Thailand), ed en Turkia (Ford Otosan). En 1989 ed en 2000 ol vendis rispektive Jaguar e Land Rover ad Indiana fabrikanto Tata Motors. Ford anke kontrolis Sueda kompanio Volvo de 1999 til 2010.[1] En 2011 ol cesis lua brancho Mercury, qua produktis e vendis luxoza vehili en Usa, Kanada, Mexikia e Mez-Oriento pos 1938.

Ol esas la duesma maxim granda fabrikanto di automobili en Usa pos General Motors e la 5ma maxim granda fabrikanto del mondo, segun totalo di vendi en 2010. En la fino di ta yaro Ford esis la 5ma maxim granda automobila fabrikanto en Europa. En 2008 ol produktis 5 532 000 automobili ed employis 213,000 laboristi en 90 fabrikerii en tota mondo.

Quankam lua acioni vendesas en borsi pos 1956 la familio Ford duras kontrolar cirkume 40% de la kompanio.[2]

Historio[redaktar | redaktar fonto]

Henry Ford en 1919.
Asemblo-lineo di Ford, en 1913.

Komence, Henry Ford probis krear la kompanio Henry Ford Company en 1901, qua divenis Cadillac Motor Company en 1902, pos ke Ford departis portante la yuri pri ilua nomo. En 1903 ilu fondis Ford Motor Company, kun US$ 28.000,00 en pekunio furnisita da 12 kolokeri, inter li la fratuli John e Horace Dodge, qui pose fondis lia propra automobilala kompanio. Komence la kompanio produktis poka automobili en lua fabrikerio an l'avenuo Mack, e pose en fabrikerio an l'avenuo Piquette, en Detroit, Michigan. Singla automobilo muntesis da du o tri laboristi, kun kompozanti produktita da altra fabrikerii. Pos un yardeko, Ford expansis la sistemo di serial asemblo, e komencis manufakturar kompozanti por lua automobili.

Henry Ford evis nur 39 yari kande ilu fondis Ford Motor Company, qua divenabos un ek la maxim granda e maxim profitoza automobilala kompanii del mondo. La familio Ford duras kontrolar la kompanio, mem pos plua kam 100 yari.

Exemplero dil Modelo T produktita en 1919.

De 1903 til 1908 la kompanio produktis la modeli A, B, C, F, K, N, R, e S. De la maxim multa ek li vendesis kelka centi o kelka mili exempleri omnayare. En 1908 la kompanio lansis Ford Modelo T, qua vendis mondale plua kam 16.5 milion exempleri. En 1927 la Modelo T remplasis la Modelo A, ed esis l'unesma modelo kun vitro di sekureso en en la paravento.[3] La kompanio transvivis la Granda ekonomiala krizo di 1929 e lansis l'unesma chipa modelo kun motoro V8 la yaro 1932.

En 1951 la kompanio kreis ciencala laboratorio en Dearborn, Michigan por developar bazala inquesto. La laboratorio developis inquesti pri superkonduktiveso, ed en 1964 ol inventis superkonduktiva magnetometro por detektar febla magnetala feldi.

Edsel Corsair, 1958.

Ye la 17ma di januaro 1956 la kompanio komencis vendar acioni en la borso, e decidis krear marko, nomizita Edsel por vendar nova lineo di automobili. La nomo di la marko homajis Edsel Ford, filiulo di Henry Ford, quankam l'objecioni di Henry Ford II. La konsumeri ne prizis la modeli - pro la desegno di lua fronto semblar femina sexuala organo - e la marko Edsel divenis fiasko pri vendi.

Ford Mustang kabrioleto, 1964.

En 1964 la kompanio lansis la modelo Mustang, lor chipa modelo kun motoro V8, qua divenis notore populara ed adportis prestijo a Ford. Lua rivalo de General Motors esis la modelo Camaro, lansita en septembro 1966.

Escort, triesma generaciono Europana, 1980.

En 1968 Ford lansis la modelo Escort - mikra familiala modelo - en Europa, ed en 1980 (la triesma generaciono Europana) en Usa. Escort divenis l'unesma mondala modelo di la kompanio. Lua sucedanto, lansita en 1998 en Europa ed en 1999 en Usa esas la modelo Focus, nune en lua triesma generaciono. Altra du modeli mondala di Ford esas Mondeo (lansita en 1992, nune en lua 4ma generaciono) e Fiesta, lansita en 1976, nune en lua 7ma generaciono. Fiesta fabrikesas en Europa, Brazilia, Arjentinia, Mexikia, Populala Republiko di Chinia, India, Taiwan, Tailando e Sudafrika.

En 1990 ed en 1994 rispektive, Ford kompris la kompanii Jaguar Cars (inkluzite Land Rover) ed Aston Martin, ma vendis Jaguar e Land Rover a Tata Motors ye la 2ma di junio 2008 po US$ 2.3 miliardi dolari.[4][5] Dum la yari 2000ma, la kompanio inauguris fabrikerii en Turkia, Rusia e Rumania. En 2013 ol cesis fabrikar vehili en l'Unionita Rejio, malgre ol duris mantenar fabrikerii di motori e transmis-arbori.

En 2014 la kompanio vendis entote 6.32 milion vehili e profitis modale 3,187 milion Usana dolari (lor equivalanta a 2.82 miliard Euri). Lua revenui mondala atingis 144.1 milion Usana dolari la sama yaro.[6] En 2016 ol cesis vendar nova automobili en Japonia, malgre ol duris mantenar 13% partopreno en Mazda.[7]

Ford Focus (3ma generaciono, Usa).
Fabrikerio Ford en Saarlouis.

Ford havas fabrikerii en la kin kontinenti: Europa (Germania, Unionita Rejio, Hispania, Belgia e Rusia); Nord-Amerika (Usa, Kanada e Mexikia); Sud-Amerika (Arjentinia e Brazilia); Afrika (Sudafrika), Azia (Turkia, Tailando, Taiwan, Populala Republiko di Chinia, Myanmar); ed Oceania (Australia). Ford decidis klozar lua fabrikerii en Indonezia e Nova-Zelando ante finir 2016. Ye la 3ma di januaro 2017 la kompanio decidis trastrekizar 1,6-bilion-dolara projeto pri nova fabrikerio en Mexikia por fabrikar la modelo Focus. Vice, ol anuncis 700-milion-dolara koloko en lua fabrikerio en Michigan por krear 700 nova employi.[8]

Referi[redaktar | redaktar fonto]

  1. (August 2, 2010) - Ford Motor Company Completes Sale of Volvo to Geely - Ford Motor Company Completes Sale of Volvo to Geely. Ford Motor Co.
  2. Joann Muller. Ford Family's Stake Is Smaller, But They're Richer And Still Firmly In Control. Forbes.
  3. (1929). 1930 model brochure - Beauty of Line - Mechanical excellence. Ford. URL vidita ye la 24ma di mayo 2012.
  4. (2ma di junio 2008) - Tata Motors completes acquisition of Jag, Land Rover - Tata Motors completes acquisition of Jag, Land Rover. Thomson Reuters
  5. On U.S. tour, Mr. Tata gives Jaguar and Rover dealers a hug: AutoWeek Magazine. Autoweek.com. URL vidita ye la 18ma di junio 2009.
  6. (29ma di januaro 2015) Los extraordinarios lastran el beneficio de Ford en 2014 (en (Hispana)). Europa Press. URL vidita ye la 8ma di oktobro 2016.
  7. (24ma di agosto 2015) How Ford's partnership with Mazda unraveled (en Angla). Automotive News. URL vidita ye la 7ma di aprilo 2018.
  8. (3ma di januaro 2017) Ford cancels Mexico plant. Will create 700 U.S. jobs in ‘vote of confidence’ in Trump. Fox2Now. URL vidita ye la 7ma di aprilo 2018.