Joinville

De Wikipedio
Salti al navigilo Irez a serchilo
Joinville
01 JoinvilleCentro.jpg
Centrala quartero di Joinville.
Bandeira de Joinville.svg Brasão de Joinville.svg
Standardo Blazono
Lando: Flag of Brazil.svg Brazilia
Stato: Santa Catarina
Informo:
Fondita ye: 9ma di marto 1851
Latitudo: 26°18'05 S
Longitudo: 48°50'38" W
Altitudo: 4,5 m
Surfaco: 1126 km²
Habitanti: 583 144 (2018)
Denseso di habitantaro: 517,84 hab./km²
Disto de Florianópolis: 180 km
Horala zono: UTC-3
(UTC-2 dum la somero)
Urbestro: Udo Döhler (PMDB) (2017-2020)
Mapo:
Mapo di Joinville
Oficala retosituo:
www.joinville.sc.gov.br
Kostrukturo en stilo Germana, en Joinville.

Joinville esas urbo en Braziliana stato Santa Catarina. Segun statistiki de 2018, ol havis 583 144 habitanti. Lua tota surfaco esas 1126 km². Lua metropolala regiono havas cirkume 1,34 milion habitanti.

Fondita dal Germana enmigranti en 1851, nune ol esas la maxim populoza urbo di Santa Catarina. Ol esas importanta industriala, komercala e financala centro regionala. L'urbo anke havas fakultati del Universitato Federala di Santa Catarina (UFSC) e la Federala Instituto di Santa Catarina, pri cienco e teknologio.

L'urbo havas alta Indexo pri homala developeso (0,809), e judikesas kom la 2ma maxim bona urbo di Brazilia por rezidar.[1] L'unika brancho dil Baleto Bolshoy en la mondo exter Rusia jacas en Joinville. Ol havas cirkume 250 studenti, di qui 90% esas stipendieri.[2] Nun la nomizita "aferala turismo" (ferii ed expozi) esas importanta fonto di revenui por la urbo.[2] La festo Fenachopp, qua eventas omnayare en oktobro, nun esas la 2ma maxim granda festo de origino Germana en Brazilia.[2]

Historio[redaktar | redaktar fonto]

Kolonio Dona Francisca, en 1866.

La maxim anciena restaji pri homala habitado en la regiono evas de 4.800 aK. L'indijeni praktikis agrokultivo, pesko e kolekto di moluski. Tribui de raso Tupi-Guarani (lokale nomizita Karijo) ankore vivis ibe kande l'Europani arivis. Decendanti de Portugalani, posible de la litorala vilajo São Vicente, arivis en la regiono dum la 18ma yarcento kun lia sklavi.

La nomo Joinville originis de François de Orléans, princo di Joinville, filiulo di Louis Philippe la 1ma di Francia. François mariajis la princino Francisca de Braganza, filiino dil imperiestro Pedro la 2ma di Brazilia. Pro la mariajo, la princino ganis kom premio tereni en la regiono ube pose fondesis l'urbo. Kande Louis Philippe la 1ma revokesis de la povo en 1848 la princo refujis su en Anglia, e decidis koloniigar ica tereni. La princo e la Germana senatano Christian Mathias Schröder sendis l'unesma Europana koloniigisti, 191 personi, inter Suisi, Germani e Norvegiani, qui fondis la kolonio Dona Francisca. Altra 114 personi arivis pose. Multi mortis pro malario, ma mult altri prosperis, ed altra enmigranti komencis arivar. La municipo kreesis en 1866, komence nomizita São Francisco Xavier de Joinville, pose nur Joinville.

De la yari 1950ma til la yari 1980ma l'urbo divenis precipue industriala, e recevis la surnomo "Manchester di Santa Catarina".[3]

Geografio[redaktar | redaktar fonto]

Rivero Cachoeira.

La reliefo di Joinville esas ordinare plana, jacanta proxim la bayo Babitonga. La mezavalora altitudo di la sideyo dil municipo esas 4,5 metri. Fore lua centro existas kelka kolini. La rivero Cachoeira, longa de 14 km qua debushas an la bayo di Babitonga, trairas la urbo. L'areo apud la rivero Cachoeira esas preske komplete urbala, kun kelka zoni prezervata kun manglieri. La maxim alta monto esas Serra Queimada, kun 1.325 metri di altitudo, jacanta an la montaro samnoma.

La klimato di Joinville esas subtropikala (Cfa segun la klimatala klasifikuro da Köppen). Tamen, pro lua proximeso dil litoro, lua klimato esas plu varma kam altra regioni plu alta. La mezavalora temperaturo en januaro (somero) esas 25,1°C, dum ke la temperaturo en julio (vintro) esas 17,1°C.

La mezavalora yarala pluvo-quanto esas 1706 mm, e la maxim pluvoza monato esas februaro, kun mezavalore 246 mm.

Centro di Joinville e la quartero América.
Centro di Joinville e la quartero América.

Referi[redaktar | redaktar fonto]

  1. Joinville é a 2ª melhor cidade do Brasil para se viver, aponta pesquisa. A Notícia. URL vidita ye la 16ma di junio 2016.
  2. 2,0 2,1 2,2 Joinville, Cidade, Santa Catarina (en Portugalana). Portal São Francisco. URL vidita ye la 3ma di februaro 2019.
  3. História de Joinville - Tudo Joinville. URL vidita ye la 3ma di februaro 2019.