Jorge Jesus

De Wikipedio
Salti al navigilo Irez a serchilo
Jorge Fernando Pinheiro de Jesus
Jorge Jesus 2012.jpg
Profesiono: ex-futbalisto, futbalo-entrenisto
Lando: Flag of Portugal.svg Portugal
Naskodato: 24 di julio 1954
Nasko-loko: Amadora, Portugal
Mortodato:

Jorge Fernando Pinheiro de Jesus, plu konocata kom Jorge Jesus, (n. ye la 24ma di julio 1954 en Amadora) esas entrenisto ed ex-futbalisto Portugalana. Nun il esas entrenisto di C. R. Flamengo.

Kom futbalisto il komencis sua kariero en Sporting C. P. e pose ludis en plusa 12 klubi dum entote 17 yari, inkluze non sezoni en la Unesma Diviziono.

Il debutis kom entrenisto en 1990 en Amora Futebol Clube e duktis la klubo til la Duesma Diviziono, prokurante a lu la divizional acenso en la sezono 1991–92, ed atingis la supra grado dil Portugalana futbalo kun F. C. Felgueiras en la sezono 1995–96. Ne sucesinte mantenar la klubo Felgueiras en la unesma diviziono, e pos kurta paso tra União da Madeira, il pasis dufoye tra Estrela da Amadora e dume entrenis Vitória de Setúbal. Jesus entrenis altra klubi dil Unesma Liguro, quala Vitória de Guimarães, Moreirense ed União de Leiria. Inter 2006 e 2008 il esis entrenisto di Belenenses e duktis la klubo de Restelo til la finalo dil Kupo di Portugal en sua unesma sezono. En la sezono 2008–09 il entrenis S. C. Braga e ganis la til nun unika internaciona titulo dil klubo de Minho, la Intertoto-Kupo.

De 2009 til 2015, kom entrenisto di S. L. Benfica, il ganis dek tituli (rekordo dil klubo) ed atingis du finali dil Europa-Liguro.

En junio di 2019 il engajesis kom entrenisto dil Braziliana klubo C. R. Flamengo e ganis la Kupo “Libertadores” di Amerika e la Braziliana Champion-konkurso tayare. Il tale divenis la duesma Europana entrenisto ganinta la kontinental titulo, e la unesma Portugalano.

Kariero kom futbalisto[redaktar | redaktar fonto]

Jorge Jesus esis futbalisto, filio di Virgolino de Jesus, e ludis en Sporting inter 1973 e 1976, periodo dum qua il esis prezenta en 12 partii, en qui il golifis kinfoye. Jorge Jesus reprezentis, inter altra emblemi, Belenenses e Sporting.

Il ludis en Juventude de Évora en la sezono 1978–79, en la esquado entrenata da Fernando Peres, olqua atingis la duesma rango en la duesma diviziono.

Jorge Jesus retretis kom futbalisto en 1989, evante 35 yari, pos pasir tra la Duesma Diviziono (en Estrela da Amadora) e tra la triesma diviziono. [1]

Kariero kom entrenisto[redaktar | redaktar fonto]

Unesma yari[redaktar | redaktar fonto]

La unesma klubo quan il entrenis esis Amora F. C., quan il duktis al nacional championeso dil Triesma Diviziono. Pose il entrenis F. C. Felgueiras, quan il acensigis del Duesma Diviziono B til la Unesma Liguro Portugalana (unesma partopreno di ca klubo en la precipua champion-konkurso). Pose il intersequante engajesis kom entrenisto di Estrela da Amadora, Vitória de Setúbal e Vitória de Guimarães (omni en la precipua grado).

Tamen Jorge Jesus subisis anke min felica instanti lor la divizional decensi di Felgueiras (1995-1996), la klubo quan il acensigabis, e di Moreirense (2004-2005).

Il entrenis la precipua esquado di Belenenses, a qua il prokuris, en la sezono 2006–2007, la kinesma rango en la Unesma Liguro, la partopreno en la finalo dil Kupo di Portugal e la qualifikeso por la UEFA-Kupo.

Ye la 20-ma di mayo 2008, il oficale engajesis da S. C. Braga kom entrenisto por la sezono 2008–2009 e duktis la esquado til okima finalo dil Europa-Liguro e mem ganis la Intertoto-Kupo (lor olua lasta eventigo), quon nultempe antee sucesabis irga klubo Portugalana. S. C. Braga tasezone atingis la kinesma rango en la Portugalana Liguro.

Benfica[redaktar | redaktar fonto]

2009–2010[redaktar | redaktar fonto]

Fine dil sezono 2008–2009, pos multa spekulado, on anuncis principo di interkonsento inter Benfica e F. C. Braga por la engajo dil entrenisto po kompenso de 700 mil euri. [2] La interkonsento konfirmesis, e Jorge Jesus remplasis Quique Flores kom entrenisto di Benfica, engajite por duyara periodo kun unyara segunvola plulongigo dil kontrato. [3] Dum sua oficala prizento kom entrenisto di Benfica, il montris su tre fidema pri sua laboro dicante ke il arivis al klubo kun la certeso ke il divenos championo. Lore il anke enuncis sua famoza frazo “Kun me li [t.e. la ludisti di Benfica] ludos duople”.[4]

En sua unesma yaro, ye la 9-ma di mayo 2010, per hemala vinko super Rio Ave per 2-1, il sucesis ganigar da Benfica la Nacional Champion-konkurso, tale donacante al Lisbonana klubo lua 32-ma titulo en la maxim importanta turniro dil Portugalana futbalo. Tasezone Benfica subisis nur du falii en la Unesma Liguro e golifis 78-foye. Pluse, la reda esquado atingis anke quarima finalo dil Europa-Liguro ma faliis kontre Liverpool F. C. per akumulita 3-5.

Jorge Jesus kom entrenisto di Benfica.

Ye la 5-ma di oktobro 2009, Jorge Jesus atingis la 100-ma vinko en la Unesma Liguro per 3-1 kontre F. C. Paços de Ferreira. En la sequanta monato, il experiencis sua unesma Lisbonana “derby” kontre Sporting, olqua finis per exterhema egaleso sengola. Fine di ta vinkoza sezono, en qua il ganis anke la Kupo dil Liguro, tale obtenante sua unesma duopla titulo samsezona, il rekompensesis per plulongigo dil kontrato til 2013. [5]

2010–2011[redaktar | redaktar fonto]

En 2011, Jorge Jesus prokuris a Benfica lua unesma vinko en Germania, per 2-0, kontre Stuttgart. Ica vinko posibligis a Jesus ruptar la rekordo da Jimmy Hogan de 1972-1973, per 16 intersequanta vinki. [6] Quankam ica sezono esis min sucesoza kam l’antea, la klubo ganis la duesma intersequanta Kupo dil Liguro e bone exekutis sua tasko en la Europa-Liguro, en qua ol atingis duima finalo.

2011–2012[redaktar | redaktar fonto]

Ye la 7-ma di decembro 2011, en la lasta etapo dil grupo-fazo dil Champion-Liguro, en partio ludata en Stadio Luz kontre Oţelul Galaţi, il divenis la Benfica-entrenisto kun maxim multa vinki en la turniri di UEFA per superirar la limito di 20 vinki da Sven-Göran Eriksson. [7]

Ye la 12-ma di januaro 2012, segun IFFHS, il duktis Benfica til la 8-ma rango dil “ranking” dil maxim bona klubi en la mondo en la sezono 2011–2012, e tale olta divenis la maxim bona Portugalan esquado en ta periodo.

Ye la 11-ma di februaro 2012, per vinkar per 4-1 Nacional da Madeira en la Unesma Liguro di 2011–2012, il atingis la centesma vinko komandante la “redi” en oficala turniri. [8]

La sezono 2011–2012 finis per la triesma intersequanta vinko en la Kupo dil Liguro, la duesma rango en la nacional champion-konkurso e quarima finalo en la Champion-Liguro, en qua Benfica vinkesis da Chelsea, qua pose divenis Europana championo tasezone.

2012–2013[redaktar | redaktar fonto]

Ye la 10-ma di decembro 2012, per exterhema vinko per 3-1 super la rivalo Sporting, Jorge Jesus divenis la Portugalan entrenisto kun maxim multa vinki en le Lisbonana “derby”, pos vinkir sepfoye en non partii, tale superirante Toni (qua vinkis sisfoye en dek).

Ye la 2-ma di mayo 2013, Jorge Jesus atingis la nonesma Europana finalo di Benfica (nacional rekordo) rikonfirmante la prestijo dil klubo en Europa. [9] Per vinkar Fenerbahçe per 3-1, Benfica qualifikesis por la finalo dil Europa-Liguro, quo multe celebresis, nam la klubo atingabis nula Europana finalo de pos 1990, kande ol atingis la finalo dil Kupo dil Europana Championa Klubi. [10] Tamen, en la finalo dil Europa-Liguro, Benfica vinkesis da Chelsea per 2-1, kun golo da Branislav Ivanović ye la 48-ma minuto dil duesma tempo, e tale divenis vice-championo. [11]

2013–2014[redaktar | redaktar fonto]

Pos l’antea sezono, la unesma etapo di ca nova sezono komencis per falio kontre Marítimo (2-1). De lore Benfica ne plus vinkesis en la Champion-konkurso dum serio de 28 partii, tale obtenante la maxim granda nombro de intersequanta vinki (11).

Ye la 11-ma di februaro 2014, Jorge Jesus obtenis sua dekesma vinko (2-0) kontre Sporting, olqua sualatere obtenis du egalesi e nur un vinko kontre lu.

Ye la 20-ma di aprilo 2014, Jesus ganis la duesma Portugalana champion-konkurso di sua kariero e la 33-ma titulo di nacional championo di Benfica, establisante nova rekordo nacional.

Ye la 7-ma di mayo 2014, Jesus ganis sua quaresma Kupo dil Liguro (la kinesma di Benfica), per vinkar Rio Ave per 2-0 (obtenante la duesma ed unika duopla vinko samsezona dil Unesma Liguro e dil Kupo dil Liguro Portugalana), altra rekordo nacional. Ye la 14-ma di mayo, Benfica ludis en la finalo di Europa-Liguro kontre Sevilla (elimininte Juventus en Torino), ma pos egaleso ol vinkesis en la finala serio de punisala stroki e divenis, ye la duesma intersequanta foyo, vice-championo.

Ye la 18-ma di mayo 2014, per vinkar Rio Ave per 1-0, Jorge Jesus obtenis la dekesma duopla vinko dil klubo (rekordo nacional) per ganar sua unesma Kupo di Portugal (la 25-ma di Benfica), divenante la unesma Portugalana entrenisto e la sepesma entrenisto irga-naciona qua sucesis ganar la du trofei, [12] Tale, la sezono 2013–20114 finis per la unesma ed unika triopla vinko samezona en la historio dil Portugalana futbalo (Unesma Liguro, Kupo di Portugal e Kupo dil Liguro).

2014–2015[redaktar | redaktar fonto]

Ye la 10-ma di agosto 2014, Jorge Jesus ganis sua unesma Superkupo, superirante János Biri kom entrenisto kun maxim multa partii en Benfica (273), e anke egaleskis a Cosme Damião per la nombro de trofei ganita per Benfica (8), superirante la nombro de trofei ganita da János Biri ed Otto Glória per Benfica e divenante la duesma entrenisto en Portugal kun la maxim granda nombro de trofei, dop Artur Jorge (9). [13]. Il divenis la unika entrenisto qua ganis omna 4 Portugalana turniri (e pluse, en la sama yaro). [14] Il duris ruptar rekordi, divenante la entrenisto kun maxim multa vinki (195), ye la 27-ma di setembro 2014, per vinkar Estoril Praia. [15]

Ye la 18-ma di januaro 2015, Jorge Jesus atingis la triacentesma partio en Benfica, kun la maxim granda procento di vinki de pos Jimmy Hogan (en la komenco dil 70-ma yari dil pasinta yarcento).[16]

Sporting[redaktar | redaktar fonto]

Sub la komando da Jorge Jesus, Sporting finis la liguro kun la maxim granda punto-nombro en sua historio, vinkis en 5 klasika partii, divenis vice-championo Portugalana e ganis la Superkupo en 2015.

En junio di 2018 il livis la leonala klubo, pos ke amba partisi atingis interkonsento.[17]

Flamengo[redaktar | redaktar fonto]

En la komenco di junio 2019, la prezidanto di Flamengo, Rodolfo Landim, konfirmis la engajeso di Jesus por un yaro. [18]

En la mi-finalo dil Kupo “Libertadores” di Amerika, en oktobro di 2019, kontre Grêmio, Jorge Jesus taktikale entravis la entrenisto di Grêmio, Renato Gaúcho, en la du partii[19][20], di qui la akumulita rezultajo amontis a 6-1 por Flamengo. Tale il riduktis la klubo de Rio de Janeiro al finalo dil turniro pos 38-yara absenteso. [21]

En sua debuto en la finalo di Kupo “Libertadores”, Jorge Jesus divenis championo kom entrenisto dil reda-nigri per vinkar River Plate Arjentinia per 2-1 (pos extraordinara rekupero en la lasta minuti, nam l’Arjentiniani esis vinkanta per 0-1 til la 89-ma minuto). Ol esis la unesma internaciona titulo en lua kariero, e Jorge Jesus divenis la unesma Portugalana sportisto qua ganis la Kupo “Libertadores” e la duesma Europano qua ganis ta trofeo kom entrenisto. En 1991, la Kupo “Libertadores” ganesis dal Chiliana klubo Colo-Colo, lore entrenata dal Kroatiano Mirko Jozić.[22]

Nur un dio pos ganir la trofeo “Libertadores”, Jorge Jesus eniris la historio di Flamengo per ganar la sepesma titulo dil Braziliana Champion-konkurso, pos ke Palmeiras vinkesis da Grêmio per 1-2. Unesmafoye, de pos la Santos di Pelé en 1963, Braziliana klubo ganis la nacional champion-konkurso e la Kupo “Libertadores” en la sama yaro. [23]

Traiti kom entrenisto[redaktar | redaktar fonto]

Ludo-stilo[redaktar | redaktar fonto]

Cquote1.png Ne esas bona entrenisto sen bona ludisti, e ne esas bona esquado sen bona entrenisto. (...) La entrenisto esas quala la ludisto: lu naskas, developesas e potencialeskas. Mea skolo, mea fakultato, esis la praktiko, la entrenado, esis la ludisto. Ibe on divenas entrenisto. Ma ne omni sucesas divenar entrenisti. Por to, oportas havar kreiveso, quale en altra mestieri. Ti qui kopias multo del altri nultempe divenos unesma-ranga entrenisti. Ni mustas esar ligita ad omno quo eventas, ma on mustas esar kreero. Me tote ne timas agnoskar ke me e mea teknikala stabo kreis entreno-metodologio e developis ol[24]. Cquote2.png

Esante diciplinema e severa entrenisto [25], Jorge Jesus igas lua esquadi impetuoze gardar la balono (lua entrenati rapide cirkuligas la balono, kun multa ludisti avan la balono-lineo) e plasizas sinkronigita e sempre avancinta defenseraro preske an la mez-lineo. [26][27] Il prizas anke la t.n. "egaris-presas": Ka tu egaris la balono? Avancez rapide, nihiligez la ludo-movo e ne lasez l’adversa ludisto eskapar.

Lua preferata ludo-skemo esas la 4-1-3-2. [28][29] La ideo esas deirar vers l’atako per kurta pasigi ed rekursar a defesanta mezalo por avancigar la balono inter la defenseri, projektante la laterali en la unesma instanto ed uzante la kin maxim atakema ludisti por facar konstanta movi helpanta la kompano qua portas la balono, od atakante vers vakua spaci per longa balono-lansi. [30]

Rejo dil Blufo[redaktar | redaktar fonto]

Cquote1.png Se ni pensos pri ludo-karti, la ludisto povas blufar per la karti. Cquote2.png

Jorge Jesus kustumas blufar pri la kunvoko di atleti, por trompar la rivali. Kande il komandis Benfica, il informis la jurnalaro ke certena ludisti esas impedata o havas poka chanci ludar. Segun la jurnalisto Rui Miguel Gomes, dil sito "O Jogo", en 37 klasika partii quin Benfica partoprenis, en 22 il ne satisfacis lo dicita, surprizante omni. [31] En Flamengo, il rekursis al sama ruzo en la partio Flamengo x Internacional, por la Kupo “Libertadores”: en la hiera dio, il ne inkluzis Gabigol en la listo de ludonti ma pose ludigis ilca dekomence en la partio. [32]

Tituli[redaktar | redaktar fonto]

Amora
  • Duesma Diviziono B: 1991–92
Braga
  • Intertoto-Kupo di UEFA: 2008
Benfica
  • Portugalana Champion-Konkurso: 2009–2010, 2013–2014, 2014–2015
  • Kupo di Portugal: 2013–2014
  • Kupo dil Liguro: 2009–2010, 2010–2011, 2011–2012, 2013–2014, 2014–2015
  • Superkupo Cândido de Oliveira: 2014
Sporting
  • Kupo dil Liguro: 2017–2018
  • Superkupo Cândido de Oliveira: 2015
Al-Hilal
Flamengo
  • Kupo “Libertadores”: 2019
  • Braziliana Champion-konkurso: 2019

Individuala premii[redaktar | redaktar fonto]

  • Maxim Bona Entrenisto dil Portugalana Champion-konkurso: 2009–2010[34], 2013–14, 2014–15[35]
  • IFFHS]– 8-ma Maxim Bona Entrenisto en la Mondo: 2013[36]
  • Premio Cosme Damião – Entrenisto di la yaro: 2014[37]

Orden-insigni[redaktar | redaktar fonto]

  • Medalio Tiradentes: 2019[38]
  • Honorumala Civitano di Rio de Janeiro [39]

Referi[redaktar | redaktar fonto]

  1. Jorge Jesus (Portugalana). Zerozero. URL vidita ye la 4ma di novembro 2011.
  2. (15ma di junio 2009) COMUNICADO - Princípio de acordo entre Benfica e Braga. SLBenfica.pt e CMVM.pt.
  3. (16ma di junio 2009) COMUNICADO - Contratação do treinador Jorge Jesus pelo Benfica. SLBenfica.pt e CMVM.pt.
  4. (18ma di junio 2009) Jorge Jesus: "Comigo vão jogar o dobro" (Portugalana). Jornal de Notícias. URL vidita ye la 29ma di novembro 2019.
  5. (14ma di mayo 2010) Jorge Jesus signs new Benfica deal (Angla). UEFA]].
  6. (24ma di februaro 2011) Benfica estabelece recorde de vitórias consecutivas. Jornal Record]].
  7. (7ma di decembro 2011) Jesus bate recorde de Eriksson. Maisfutebol.iol.pt. URL vidita ye la 8ma di decembro 2011.
  8. (11ma di februaro 2012) Jorge Jesus conseguiu 100ª vitória ao comando das "águias". SIC Notícias. URL vidita ye la 11ma di februaro 2012.
  9. (2ma di mayo 2013) A primeira final europeia de Jorge Jesus será a nona para o Benfica. Público. URL vidita ye la 24 Março de 2014.
  10. (3ma di mayo 2013) Benfica festeja a ida à final da Liga Europa. RTP Notícias. URL vidita ye la 25ma di septembro 2013.
  11. (15ma di mayo 2013) Heroico, Chelsea supera Benfica no fim e volta a ser campeão europeu. GloboEsporte.com. URL vidita ye la 24ma di julio 2019.
  12. (18ma di mayo 2014) Benfica faz a "dobradinha" no Jamor 27 anos depois. Diário de Noticias. URL vidita ye la 8ma di oktobro 2014.
  13. (28ma di mayo 2014) Os recordes que Jesus tem para bater. Maisfutebol.com. URL vidita ye la 8ma di oktobro 2014.
  14. (11ma di agosto 2014) Benfica seal Super Cup win on penalties. UEFA.com.
  15. (8ma di oktobro 2014) Jorge Jesus já é o mais vitorioso da história. Record.pt. URL vidita ye la 8ma di oktobro 2014.
  16. Jorge Jesus é o melhor na Luz do pós-1974. URL vidita ye la 21ma di januaro 2015.
  17. Jesus sai do Sporting por mútuo acordo.
  18. (1ma di junio 2019) Rodolfo Landim fecha acordo, e Jorge Jesus é o novo técnico do Flamengo. Globoesporte. URL vidita ye la 21ma di junio 2019.
  19. uol.com.br/ Renato Maurício Prado: Jesus batiza Renato na Arena
  20. terra.com.br/ Portugueses enaltecem Jesus após "2º tempo de sonho" do Fla
  21. (23/10/2019) Flamengo massacra Grêmio e chega à final da Libertadores após 38 anos.. Blog do Torcedor - UOL. URL vidita ye la 25/10/2019.
  22. (23/11/2019) De geração para geração: 38 anos depois, Flamengo vence o River Plate e volta a conquistar a Libertadores.. Globoesporte.com. URL vidita ye la 23/11/2019.
  23. (24/11/2019) Flamengo é campeão Braziliaeiro e se torna primeiro time desde 1963 a gsanhar o Nacional e a Libertadores no mesmo ano.. Globoesporte.com. URL vidita ye la 24/11/2019.
  24. globoesporte.globo.com/ "Você tem que ser um criador": conheça Jorge Jesus, alvo do Flamengo, por suas frases
  25. (01/06/2019) Linha dura, futebol ofensivo e reforços 'alternativos': conheça o novo técnico do Flamengo. Fox Sports. URL vidita ye la 23ma di agosto 2019.
  26. Renato Rodrigues detalha como trabalha taticamente Jorge Jesus, técnico na mira do Flamengo. ESPN.
  27. (1ma di junio 2019) As ideias táticas de Jorge Jesus, novo treinador do Flamengo. GloboEsporte.com. URL vidita ye la 23ma di agosto 2019.
  28. Como jogam os times de Jorge Jesus? Rafa Oliveira explica estilo de treinador cotado para assumir o Flamengo. ESPN.
  29. (29/05/2019) Abel e Jesus são diferentes, mas representam "padrão" do Flamengo. Yahoo.
  30. esportes.yahoo.com/ Abel e Jesus são diferentes, mas representam "padrão" do Flamengo
  31. (22ma di agosto 2019) 'Rei do blefe' em Portugal, Jorge Jesus repete estratégia com Gabigol no Flamengo. Extra.
  32. (22ma di agosto 2019) Blefe na escalação funciona? Mauro Cezar opina sobre estratégia de Jorge Jesus. ESPN.
  33. Jesus leva o Al Hilal à conquista da Supertaça e festeja com bandeira portuguesa
  34. Rosa Mota e Carlos Lopes premiados pelo CNID
  35. Liga PT: Melhor Treinador
  36. Iffhs.de. IFFHS. URL vidita ye la 10ma di januaro 2014.
  37. (28ma di februaro 2015) Jorge Jesus recebe Galardão Cosme Damião (Portugalana). S.L. Benfica]. URL vidita ye la 1ma di marto 2015.
  38. Alerj aprova medalha Tiradentes para Jorge Jesus
  39. Jorge Jesus vai Receber título de Cidadão Honorário do Rio de Janeiro.

Extera ligili[redaktar | redaktar fonto]

Commons
Wikimedia Commons havas kontenajo relatante a: Jorge Jesus