Kraftwerk

De Wikipedio
Irez ad: pilotado, serchez
Kraftwerk en 2008

Kraftwerk (en la germana "elektriferio") esas germana elektronikala muziko-bando formacita da Ralf Hütter e Florian Schneider en 1969 en Düsseldorf, Germania.

Dum la 1970a yari, li esis inter la unesma sucesoza pop-grupi qui popularigis elektronikala muziko, e mondvaste egardesas kom novigeri e pioniri di ta jenro.  La bando duktesis da e Hütter e Schneider til la departo di Schneider en 2008.

Kraftwerk komencis dum la frua 1970a yari, editinte tri albumi di experimentala rock-stilo, ante embracar elektronikala instrumenti, inkluzanta sintezili, tamburo-mashini, "vocoder" e su-facita instrumenti, meze di ta yardeko.

Per komercale sucesoza albumi quala Autobahn (1974), Trans-Europe Express (1977) e The Man-Machine (1978), li developis distinta stilo de "roboto-pop", qua kombinis elektronikala muziko kun pop-melodii, skarsa aranjuri e repetanta ritmi, dum adoptar stilizita imajo, ofte portinte samstila vestari.

Pos la editi di Computer World (1981) ed Electric Café (1986), membro Wolfgang Flür departis en 1987.   Lia lasta albumo Tour de France Soundtracks editesis en 2003.  Fondinta membro Florian Schneider departis en 2008.

Kraftwerk durante e profunde influis multa jenri de moderna muziko, inkluzanta synthpophip hopambientpost-punktechno, e klub-muziko, ed inspiris diversa artisti.  Segun la jurnalo The Observer, "nula altra bando depos le Beatles kontributis tante multo a pop-kulturo."  En januaro 2014, la Recording Academy honoris Kraftwerk per Grammy Lifetime Achievement-premio.  En 2016, la restanta membri di Kraftwerk duris turar.

Historio[redaktar | redaktar fonto]

Florian Schneider (fluti, sintezili, violino) e Ralf Hütter (orgeno, sintezili) interrenkontris kom studenti che la Robert Schumann Hochschule en Düsseldorf dum la tarda 1960a yari, partopreninte la germana experimentala muzik- ed arto-ceno tatempa.

La duo originale kunpleis kom parto di la quinteto Organisation.  Ica ensemblo editis un albumo, Tone Float en 1969, che RCA Records en Britania, e dissolvis su kurte pose.  Schneider divenis interesata pri sintezeli e decidis aquirar tala instrumento en 1970.

Dum vizitar expozo en sua hemurbo pri la vidala artisti Gilbert e George, li vidis "du viri qui portis vestari e kravati, ed asertis ke li enduktis arto aden omnadiala vivo.  Samayare, Hütter e Schneider endukteskis omnadiala vivo aden arto e formacis Kraftwerk".

Frua membrari di Kraftwerk de 1970 til 1974 fluktuis, nam Hütter e Schneider laboris kun cirkume mi-dozeno altra muzikisti dum preparar por e registragar tri albumi e poka "live"-plei, notinde gitaristo Michael Rother e tamburisto Klaus Dinger, qua livis por formacar Neu!.  La unika konstanta membro en ca grupi esis Schneider, di qua la chefa instrumento tatempe esis la fluto; foye il anke pleis la violino e gitaro, omna procedigita tra diversa elektronikala aparati.   Hütter, qua livis la bando dum ok monati, pleis sintezilo e klavaro (inkluzanta Farfisa-orgeno ed elektrala piano).

La unesma tri albumi esis libera-forma experimentala rock sen pop-"hoki" o la plu diciplinoza kanson-strukturo di posa verki.  Kraftwerk (1970) e Kraftwerk 2 (1972) esis explorala muzikala improvizuri pleita per diversa tradicionala instrumenti quala gitaro, basgitaro, tamburi, orgeno, fluto e violino.  Pos-produkta modifiki uzesis por distordar la sono dil instrumenti.  Amba albumi esas pure instrumentala.  "Live"-plei de 1972 til 1973 eventis kom duo, per simpla "beat-box"-ala elektronikala tamburo-mashino, kun pre-programizita ritmi cherpita de elektrala orgeno.  Ica koncerti esis precipue en Germania, kun poka en Francia.  Plu tarde en 1973, Wolfgang Flür adheris la grupo por exerci, e li pleis kom trio che la televizion-programo Aspekte che germana reto ZDF.

Kraftwerk en 1976

Per Ralf und Florian (1973) Kraftwerk proximeskis sua klasika sono, fondita sur sintezili e tamburo-mashini.  Quankam preske tote instrumentala, la albumo inkluzas lia unesma uzo di "vocoder", muzikala "signaturo" di Kraftwerk.   La futurista e "robotala" sono di Kraftwerk influesis da artisti di Detroit dil tarda 1960a yari quala MC5 e le Stooges.

La kontributo, experteso ed influo di produktisto ed injenioro Konrad "Conny" Plank esis tre importanta dum la frua yari di Kraftwerk.  Plank anke laboris kun multa altra germana elektronikala grupi tatempa, inkluzanta Can, Neu!, Cluster e Harmonia.  Rezulte lua laboro kun Kraftwerk, lua registrageyo proxim Köln divenis un ek le maxim serchata dum la tarda 1970a yari.  Plank kunproduktis la unesma quar albumi da Kraftwerk.

Muzikala filozofio[redaktar | redaktar fonto]

Unesme la grupo enfokigis avant garde-muziko per normala instrumenti.  De 1970 elektronikala aparati adjuntesis, quala sintezili, "vocoder" e tamburo-mashini ye qui Florian Schneider havas patenti.   La bando ofte konstruktis propra instrumenti pro ke le lore komprebla esis tro chera.  La grupo dum ta yari relatis germana grupi quala Can, Neu! e Tangerine Dream, qui en Britania ofte referesis per la denigranta termino Krautrock.

La progreso venis en 1974, per la albumo Autobahn, de kande la uzo di sintezili, komprita o konstruktita, generala uzesis ed akustikala instrumenti desaparis tote ek lia verki.  Anke dum la sequinta yari la bandmembri duris experimentar pri la posiblesi ofrita da elektronkala muziko.  La muziko divenis repetiva kun ofte repetanta temi, elektronikale manipulita.  La texti esas ofte observema o naracema e kelkafoye milde amuzanta.

Schneider e Hütter developis la filozofio 'musikarbeiter' (muziko-laboranti), segun qua singla anonima membro dil grupo exekutas sua propra tasko.  Kraftwerk konsakris multa tempo a serchar elektronikala soni e kompozar kansoni.  Anke dum la 1980a yari ed inter 2000-2010 li konsakris multa tempo a dijitaligo e dijitala riregistrago di sua soni e kansoni, e rafino di sua "live"-pleado.

Dum koncerti la membri kondutas distante e mekanikale, en uniforma vesti.  Li anke pripensis koncerti sen la membri, ube lia taski exekutesus da roboti.  La membri de 1991 en la kansono Die Roboter/The Robots ofte remplasesis per roboti, qui similaspektis kam la membri.  De 1981 dum koncerti li experimentis per komputer-animi.

Guidanta temo di Kraftwerk esas facineso pri tekniko.  Por albumtemi li ofte selektas latero di moderna teknologio, quala radioaktiveso, roboti od automatigo, e developas ol ye jurnalismala maniero.  De Radio-Activity/Radio-Aktivität en 1976 omna albumi aparis en angla e germana versioni.  Di plura kansoni anke existas versioni en la franca (Tour de France, Les Mannequins), japoniana (Dentaku)hispana (Electric Cafe).