Artifical inteligenteso

De Wikipedio
Salti al navigilo Irez a serchilo
Roboto Asimo. Lu povas agnoskar movanta objekti ed interagar kun homi.
Punti de homala facio mezurata da sistemi di facial agnosko.

Artifical inteligenteso (AI) esas l'imitado da mashinaro, nome da komputerala sistemi, dil inteligenteso homala, to esas, di la kapableso lernar. Ca termino kreesis en 1956 da John McCarthy un ek lua pioniri, qua definis ol kom "la cienco (uzata) por krear inteligenta mashinaro, nome inteligenta komputerala programi". Segun Andreas Marcus Kaplan e Michael Haenlein, artifical inteligenteso esas komputerala sistemo kapabla kaptar ensemblo di dati qui originis exter ol por "lernar" de ca dati, e pose uzar ca informi por sucese realigar taski o predici, tra flexebla adapto.

Nun, la defino pri 'quo esas dato' esas ampla, exemple, dati furnisata da mekanikala o fizikala detektori pozata en mashini od en l'ambiento, video-kameri, radio-transmiseri atachita a sovaja animali por studiar lia konduto, satelitala fotografuri, 2-dimensiona o 3-dimensiona imaji obtenita per X-radio, edc. La sistemi qui uzas artifical inteligenteso esas kapabla pri kaptar granda quanto di informi de un o plura fonti, e "lernar" de li, sive "sub tutelo homala", sive sentutela.

La lernado "sub tutelo" eventas kande la komputera programisto furnisas a la komputero parto ek la informi, e dicas quo esas singla ek ca dati. Exemple, por "docar" a la komputero 'quo esas kato', on prizentas diversa imaji pri kati, e por singla ek li on mencionas esar "kato". Pose, prizentesos imaji pri hundi e mencionos "hundo", kavali e mencionos "kavalo", edc. Pos prizentar certena quanto di imaji, la komputero divenos kapabla savar e separar, inter mili o mem milioni di imaji, qui ek li esas "kati". Altralatere, la "lernado sentutela" eventas kande la komputero ipsa analizas giganta quanto di dati e "deskovras" similesi e diferi inter li, e grupigas o separas la dati segun similesi e diferi, uzanta matematikala modeli, exemple *grafo-teorio.