Carl Gustaf Emil Mannerheim

De Wikipedio
Carl Gustaf Emil Mannerheim
{{{Originala_nomo}}}
Regento di Finlando
Guvernisteso: de la 12ma di decembro 1918 til la 26ma di julio 1919
Precedanto: Pehr Evind Svinhufvud
Sucedanto: republiko
Prezidanto di Finlando
Guvernisteso: de la 4ma di agosto 1944 til la 4ma di marto 1946
Precedanto: Risto Ryti
Sucedanto: Juho Kusti Paasikivi
Personal informi
Naskodato: 4 di junio 1867
Naskoloko: Askainen, Finlando
Mortodato: 27 di januaro 1951
Mortoloko: Lausanne, Suisia
Spozo: Anastasie Mannerheim
Profesiono: militestro (marshalo)

Carl Gustaf Emil Mannerheim esis Finlandana marshalo, militestro e prezidanto. Il naskis ye la 4ma di junio 1867 en Louhisaari-domego, Askainen, proxim Turku.

Lua genitori esis Carl Robert Mannerheim e Hélène (nask. von Julin). La familio ruptis, kande la patro translojis de Finlando pos ne-sucesoza akti komercala e kande lua matro mortis en 1881. La sep filii esis ri-situita a parenta familii. On parolas, ke la severa yuneso videsis en la skolo-frequenco di Carl. Exemple, en 1886 il exkomunikesis ek kadeto-skolo di Hamina pro nebona konduto.

Tamen Carl volis esor militisto. Il ganis militala eduko en kavalrio-skolo di Nikolayev en Sankt-Peterburg. Mannerheim servis entote 30 yari en Rusa armeo. En Rusia il anke mariajis en 1892 kun Anastasia Arapova.

De 1906 til 1908 Mannerheim kavalkis tra Azia explorante la sudala areo limitala di Rusia. Oficale ol esis etnologial exploro-voyajo, e la librego pri la voyajo esas anke nun tre valorita. Tamen Mannerheim esis anke oficero, qua studiis, quala esis la frontiero inter Rusia e Chinia.

En 1917 naskis revoluciono en Rusia, e Mannerheim esis dispozita a rezervo en oktobro kom generalo-lietnanto. En decembro il venis a Finlando. En januaro 1918 en Finlando komencis interna milito inter le Reda e le Blanka. Mannerheim divenis la chefo di la Blanki. La vinkinti nomizis la milito kom liberiginta.

Pos la milito Mannerheim esis regento dil jus nedependeskinta stato. Til duesma mondomilito Mannerheim ne partoprenis politiko ma esis tre valorita persono en la dextra-mentala cirkumajo. Por le sinistra-mentala il esis mortiginto dil povraro. Tamen Mannerheim esis tre moderanta forco en Finlando, kande fashismo e nacional-socialismo forteskis altraloke en Europa.

En 1921 Mannerheim divenis la chefo dil Reda Kruco di Finlando. Il esis en ca posteno 30 yari.

Ye la 30ma di novembro 1939 Sovietia atakis Finlando, e Mannerheim divenis la militestro. La milito finis 13ma di marto 1940. La prolongo-milito duris de 1941 til 1944, e Mannerheim duktis l'armeo. Pos la milito, segun Stalin, nur Mannerheim esis apta por esar prezidanto til 1946.

La lasta yari di sua vivo Mannerheim vivis tre quiete. Dum la vintri il esis en Suisia, e dum la someri en Finlando. Carl Gustaf Emil Mannerheim mortis ye la 27ma di januaro 1951 en Lausanne, Suisia. Il esas entombigita en la militala sepulteyo di Hietaniemi en Helsinki.