Ginza
Ginza (銀座) esas distrikto di Chūō, Tokyo, Japonia, situita sude de Yaesu e Kyōbashi, weste de Tsukiji, este de Yūrakuchō ed Uchisaiwaichō, e norde de Shinbashi.
Ol esas populara luxoza butik-areo di Tokyo, kun multa internacione famoza fako-butikegi, "boutique"-i, restorerii e kafeerii situita en la vicineyo.
Ginza agnoskesas da multi kom un ek la maxim luxoza butiko-distrikti en la mondo, ed atraktas e lokani e vizitanti de cirkum la mondo.
Historio
[redaktar | redaktar fonto]Ginza konstruktesis sur olima marsho qua plenigesis dum la 16ma yarcento. La nomo Ginza devenas del establiso di monetifeyo ibe en 1612, dum la Edo-periodo.
Pos ke devastanta fairo en 1872 brulis granda parto dil areo, la Meiji-guvernerio deklaris ke Ginza esis "modelo di modernigo." La guvernerio projetis konstrukto di fairespruva brika edifici e plu granda e bona stradi por konektar Shinbashi-Staciono til la stranjera koncesiono en Tsukiji.
Desegni por la areo provizesis dal irlandana arkitekto Thomas Waters. Sequanta-yare, westala-stila butiko-promeneyo an la strado de Shinbashi-ponto a Kyōbashi-ponto en la sudwesta parto di Chūō kun du- e tri-etaja brika edifici kompletigesis.
Ica "brikurbo"-edifici unesme ofresis por vendo e pose lugesis, ma la alta preci preventis permananta okupo di li. Pluse, la konstrukto ne esis apta por la klimato, e la brava desegno kontrastis kun la tradicionala japoniana nociono di hem-konstrukto. Ironioze, la nova Ginza ne esis populara che vizitanta exterlandani, qui serchis plu Edo-stila urbo. Isabella Bird vizitis en 1878, ed en 1880 implikis ke Ginza esis min quale oriental urbo, kam la preurbi di Chicago o Melbourne. Philip Terry, angla autoro di turo-guidili, komparis ol kun Broadway, ne ye pozitiva senco.
Tamen, la areo florifis kom simbolo di "civilizuro ed ilumino" danke la prezenteso di jurnali e revui, qui helpis difuzar la modi di la dio. Ginza anke konocesis pro sua vetrini, exemplo di moderna reklamo-tekniki. La kustumo "pasar tempo en Ginza" developesis inter la du mondo-militi.
Multa ca europana-stila edifici desaparis, ma ula anciena edifici restas, maxim famoze la Wakō-edifico kun la nun-ikonala Hattori-Horlojoturmo. La edifico e horlojoturmo originale konstruktesis da Kintarō Hattori, la fondinto di Seiko.
Dum recenta historio ol esas salianta "avanposteno" di westala luxo-butiki. Ginza esas populara dum semanfini, kande la chefa norda-suda strado esis klozata a trafiko depos la 1960a yari, sub guvernisto Ryokichi Minobe.
Ekonomio
[redaktar | redaktar fonto]
Multa famoza moderii havas butiki en Ginza, la areo kun la maxim multa westala butiki en Tokio. Ol esas un ek du loki en Tokyo egardata da Chevalier e Mazzalovo kom la maxim bona loki por luxaji-butiko. Butiki inkluzas la usana kompanio Carolina Herrera New York, franca kompanii Chanel, Dior e Louis Vuitton, ed italiana kompanio Gucci. Elektroniko-butiki quala la Sony-butiko e la Apple Store esas anke hike.
La elektroniko-kompanio Ricoh havas chefkontoro en la Ricoh-ediifco en Ginza. La vicineyo esas importanta butiko-distrikto. Ol esas hemo di Wako-butiko, situita en edifico de 1894. La edifico havas horlojoturmo. Esas multa fako-butikegi en Ginza, inkluzing Hankyu, Seibu e Matsuya. Esas anke arto-gallerii.
Pediranto-paradizo
[redaktar | redaktar fonto]Ye saturdio e sundio, de 12:00 til 17:00, la chefa strado tra Ginza esas klozita a trafiko, tale ke homi povas promenar libere. Ico nomizesas Hokōsha Tengoku (歩行者天国) o kurte Hokoten, literale "pediranto-paradizo".