Kulturo di Brazilia
La precipua origino di Braziliana kulturo esas Portugalana: Brazilia recevis de Portugal la linguo, la religio (katolikismo) e la kolonial arkitekturo.[1] Tamen lua kulturo anke recevis influi de Afrikani, indijeni e de enmigranti de altra landi.[2] Brazilian indijeni influis precipue en la linguo (nomi di geografiala loki, animali, planti e personi) ed en la koquarto. L'Afrikani influis en la muziko e danso (samba esas la maxim konocata exemplo), koquarto, vortaro (exemple: nomi di planti kun Afrikana origino) e religio (umbanda e candomblé esas religii kun forta Afrikan influo)[3].
Literaturo
[redaktar | redaktar fonto]
Braziliana literaturo datizas de la 16ma yarcento. L'unesma dokumento skribita en Brazilia en la Portugalana esis la letro di Pero Vaz de Caminha a la Portugalana rejulo, pri la deskovro di la lando. Dum la 17ma yarcento Portugalana sacerdoto António Vieira skribis multa prediki pri Braziliana situeso, ed en defenso dil indijeni. Ma Braziliana literaturo developesis precipue pos la komenco di la 19ma yarcento kun la nedependo de Portugal e l'arivo di romantika literaturo. Autori quale Joaquim Manuel de Macedo, José Martiniano de Alencar e Bernardo Guimarães skribis noveli pri Braziliana temi kun romantika influo. La precipua poeto en ta periodo esis Castro Alves, qua skribis kontre sklaveso.
Dum la fino di a 19ma yarcento aparis literaturala movado nomizita Realismo, e un skriptisto konsiderata un ek la maxim importanta skriptisti en Portugalana linguo: Machado de Assis. Dum la 20ma yarcento pos 1922 aparis la movado konocata kom Modernismo, kun skriptisti quale Mário de Andrade e Oswald de Andrade, e pos-modernista skriptisti, exemple João Guimarães Rosa, João Cabral de Melo Neto, Jorge Amado, Clarice Lispector, Nelson Rodrigues, Nélida Piñon, João Ubaldo Ribeiro e, recente, Paulo Coelho.
Muziko
[redaktar | redaktar fonto]Braziliana muziko konocesas en tota mondo por lua sortato di ritmi, exemple samba, bossa nova, choro, axé, lambada, forró, edc. Ma altra ritmi kun exteral origini ank esas populara, note inter l'yuneso, exemple rock, hip-hop e reggae. Kelka Braziliana muziki esas mondale konocata, ed inkluzite uzesis en filmi, exemple Garota de Ipanema ("Yuna muliero de Ipanema") de genero bossa nova, kompozita da Antônio Carlos Jobim; ed Aquarela do Brasil ("Aquarelo di Brazilia"(, samba kompozita da Ary Barroso.
Inter maxim populala muzikisti, kantisti e kompozisti de Brazilia, jacas Vinícius de Moraes, João Gilberto, Antonio Carlos Jobim, Caetano Veloso, Toquinho, Dorival Caymmi, Chico Buarque, Milton Nascimento, Beth Carvalho, Elis Regina, Adriana Calcanhotto, Gilberto Gil, Cássia Eller, Rita Lee, Maria Bethânia, Gal Costa, Nara Leão, Maysa, Simone, Nana Caymmi, Jorge Ben Jor, Roberto Carlos, Ivete Sangalo, Marisa Monte, Daniela Mercury, muzikala grupi exemple Titãs, Sepultura, Legião Urbana, Os Paralamas do Sucesso, e la dueti di música sertaneja (la moderna rurala muziko di Brazilia), exemple Zezé di Camargo e Luciano, Bruno & Marrone, Chitãozinho & Xororó, edc.
Sporto
[redaktar | redaktar fonto]La maxim populala sporto di Brazilia esas futbalo[2]. Brazilia ganis la Mondala Kupo di Futbalo 5 foyi: en 1958, 1962, 1970, 1994 e 2002[4]. Brazilia organizis la Mondala Kupo di Futbalo en 1950 ed elektesis da FIFA por recevar la Mondala Kupo di Futbalo 2014, qua eventis de la 12ma di junio til la 13ma di julio ta yaro. Basketbalo, endome futbalo (futsal), automobilo-konkurso e judoo* anke esas populara en la lando.
Referi
[redaktar | redaktar fonto]- ↑ 15ma til 16ma yarcento Historio di Brazilia (en Angliana). Fonto: www.brasil.gov.br
- ↑ 2,0 2,1 People and Society Encarta MSN
- ↑ Boxer, Charles R.. O império marítimo português 1415-1825. São Paulo: Companhia das Letras, 2002
- ↑ Football in Brazil Goal Programme. International Federation of Association Football