Reggae

De Wikipedio
Jump to navigation Jump to search
L'unesma generaciono di la bando Toots and the Maytals, pioniri dil ritmo Reggae.
Bob Marley, un ek la precipua kantisti, kompozisti e muzikisti di Reggae.

Reggae esas muzikala jenro kun origino en Jamaika erste la yari 1960ma. Quankam kelkafoye la vorto uzesas kom sinonimo di tota Jamaikana muziko, Reggae propre esas la jenro qua havis lua origino en ska e rocksteady. Ordinare, reggae esas plu lenta kam ska ma plu rapida kam rocksteady. De la lasta, ol "heredis" l'uzo di kontrabaso kom perkut-instrumento.[1] Reggae anke havas influi de la ritmo Mento (tradicionala ritmo rurala Jamaikana), de jazo, e de rhythm and blues. L'ordinara temi por reggae-muziki esas novaji, sociala e politikala temi.

The Wailers, bando formacita en 1963 da Bob Marley, Peter Tosh e Bunny Wailer, esas la maxim konocita muzikala grupo qua lansis kansoni en la tri precipua Jamaikana ritmi: ska, rocksteady e reggae. Altra pioniri dil ritmo esis Prince Buster, Desmond Dekker, Jackie Mittoo, ed Annie Acosta.

Winston Rodney, surnomizita Burning Spear, Jamaikana kantisto di reggae ed anke "Rastafariano".

La liriki de Reggae-muziki ofte facas sociala kritikado, note kontre materialismo, rasismo, kontre kapitalismo, koloniigismo, o kontre "Babilono", vorto kun origino en la "Babilono" Biblala ed uzata por nomizar sive la socio konsiderita korupta, sive omna guvernala institucuri qui reprezentas opreso, exemple la polico. Altra kansoni parolas pri temi de la religio "Rastafari", exemple "Jah" (Deo), l'imperiestro Haile Selassie, o l'uzo di marihuano, ma ank existas multa kansoni Reggae qui parolas pri amo, espero e fido.

Reggae dissemesis tra altra landi en la mondo, inkluzite Usa, Unionita Rejio ed altra Europana landi, Nigeria ed altra Afrikana landi, edc. Ol enkorpigis lokala muzikal instrumenti e kunfuzis kun multa muzikala jenri de altra landi. Reggae en Español aparis en Panama, kun kantisti quale El General e Nando Boom, e dissemesis en Venezuela e Guyana. En Mexikia, note en Veracruz, reggae ank esas multe populara. En Afrika mult artisti komencis kompozar muziki reggae pos la vizito di Bob Marley a Zimbabwe, en 1980. En Brazilia aparis la jenro "samba-reggae", qua kunfuzis elementi de reggae, de altra Karibiana jenri e de Braziliana ritmo samba, quale en la muziki de la grupo Olodum.

Historio[redaktar | redaktar fonto]

Ritmo di baso che reggae.

Ska esis la komuna "afisho" por nomizar omna muziko enrejistrita en Jamaika de 1961 til 1967. Ska originis del rhythm and blues Jamaikana, qua recevabis influi del "rhythm and blues" Usana e del "doo wop". La religiala movado Rastafari influis reggae multe, e "Rasta" perkut-instrumentisti quale Count Ossie partoprenis en la registrado di multa muziki. La perkut-ritmo "Nyabinghi", qua uzesas en renkontri di Rastafari, anke uzesas en kelka Reggae-muziki. Ska anke recevis influi de la Jamaikana ritmo mento.

En 1968 la grupo Toots and the Maytals lansis la kansono "Do the Reggay", l'unesma qua uzis la vorto "reggae", uzata por baptar la ritmo e lansar ol en la merkato muzikala.[2][3] La kansoni "Nanny Goat" da Larry Marshall ed Alvin Perkins, e "No More Heartaches" dal grupo The Beltones konsideresas l'unesma sucesi en ritmo Reggae. La sam yaro, Usana muzikisto Johnny Nash lansis "Hold Me Tight", l'unesma suceso Reggae en Usa. Ank en 1968, The Beatles lansis lua suceso "Ob-La-Di, Ob-La-Da" ed adportis l'influi de Reggae a rock e pop-muziko.

En 1963, Bob Marley kreis la bando "The Wailers", qua obtenis suceso dum la tri fazi di Jamaikana muziko: ska, rocksteady e reggae. Plua kam 10 muziki da "The Wailers" havas elementi de la ritmo mento. Ultre Marley, altra importanta membro de la bando esis Peter Tosh, qua komencis sola kariero en 1977, pos verkir kun la bando The Rolling Stones. Dum lua kariero, finita en 1987 kande ilu asasinesis che lua domo, Tosh kompozis Bush Doctor, Mystic Man, Legalize It (en ke apologiis la legaligo di marihuano), Not Gonna Give It Up, ed altri.

En 1960 Chris Blackwell fondis en Jamaika l'enrejistro-kompanio Island Records,[4] ed en 1962 ilu movis lua sideyo ad Anglia, ma duris promocar Jamaikana muziko. En 1968 ilu formacis komercal asociuro kun Lee Gopthal e lua firmo Trojan Records, qua duris produktar reggae en l'Unionita Rejio til 1974.

Ultre Chris Blacwaell, altra importanta muzikala produktisti dum la komenco di "reggae" esis Clement "Coxsone" Dodd, Lee "Scratch" Perry, Leslie Kong, Duke Reid, Joe Gibbs e King Tubby. L'enrejistro-firmo Studio One, fondita en 1954 da Coxsone Dodd, lansis multa bandi e kantisti di ska, rocksteady e reggae, exemple Theophilus Beckford, qua enrejistris la muziko Easy Snapping kun la bando Clue J & His Blues Blasters, o la trombonisto Don Drummond. En 1964 Don Drummon ed altra 8 muzikisti fondis la bando The Skatalites, qua duris nur 14 monati, pos l'aresto di Drummond pro asasino di lua spozino. La bando Byron Lee and the Dragonaires, fondita en 1950 dal muzikisto Byron Lee e lua amiko Carl Brady, aparis che la televizionoprogramo "This is Ska!", apud Jimmy Cliff, Prince Buster, e Toots and the Maytals.[5]

En 1968, Desmond Dekker lansis la kansono Israelites, qua obtenis suceso internacione. Du yari pose, ilu lansis en ritmo rocksteady You Can Get It If You Really Want, kansono pose enrejistrita da Jimmy Cliff por la filmo The Harder They Come.

Usana bando Three Dog Night

Dum la fino di 1972, Reggae atingis komercala suceso en Usa, ed unesmafoye kansoni de ica stilo aparis en la listo Billboard Hot 100. Ca yaro, la kansono Black and White de la bando Three Dog Night atingis #1 che Billboard. En novembro sam yaro, la kansono I Can See Clearly Now da Johnny Nash obtenis #1, e la kansono Mother and Child Reunion enrejistrita da Paul Simon kune la bando de Jimmy Cliff en Jamaika obtenis #57.

En 1973, Jimmy Cliff aparis en la cinematografuro The Harder They Come, qua facis la prizentado di Jamaikana muziko a la mondo.[6] En 1974, Eric Clapton lansis lua versiono di I Shot the Sheriff da Bob Marley, qua obtenis suceso mondale. Malgre uzir moderna instrumenti e tekniki di muzikala produktado, la versiono da Clapton mantenis la maxim multa elementi originala de reggae, ed ampligis l'asistantaro por la muziki da Marley.

Cirkume la duimo dil yari 1970ma, Angla disk-jokeo John Peel prizentis multa diski di reggae en lua radioprogramo.[7] Kande punk rock aparis e developis de la duimo dil yari 1970ma til la yari 1980ma, reggae esis granda influo por la jenro. Grupi quale The Clash, The Ruts, The Members e The Slits pleis multa muziki kun influi del ritmo reggae. Samatempe, aparis en l'Unionita Rejio bandi quale Steel Pulse, Aswad ed UB40, ed artisti quale Smiley Culture e Carroll Thompson. Dum ta epoko, la kantisto Gregory Isaacs obtenis granda suceso en Jamaika, dum ke sude de London la kantistini Carroll Thompson e Janet Kay obtenis suceso kun kansoni plu "romantika". En 1985 kreesis kategorio di la muzikala Premio "Grammy" pri la Maxim Bona Reggae-albumo.

La muziko[redaktar | redaktar fonto]

Gitara sono nomizita "straight", uzata en reggae

Reggae enkorpigas muzikala elementi de rhythm and blues, jazo, Mento, calypso, de muziki Afrikana e Latin-Amerikana, ed altra jenri. Ol konsistas ek du gitari (un ek li esante "baso-gitaro"), perkut-ensembli, congas (longa tamburo kreita en Kuba), elektral orgeni e/o sintezili. La movimento muzikala esas plu lenta kam ska e plu rapida kam rocksteady. Inter la notora perkut-instrumentisti di reggae esas Sly Dumbar, qua formacis la duo Sly and Robbie kun la bas-gitaristo Robbie Shakespeare.

La baso-gitaro esas importanta kompozanto dil sono di reggae por krear la ritmi (Jamaikana Angle: riddim), e multafoye la sama ritmo repetata plurafoye per baso-gitari uzesas en multa diferanta muziki, o por krear per rimixo (dub) diferanta versioni de ula sama muziko.

Gitari e klavari (sive piano, elektrala orgeni o sintezili) ank esas importanta instrumenti por krear la melodii di reggae.

Referi[redaktar | redaktar fonto]

  1. Wilton, Peter. "reggae." The Oxford Companion to Music. Ed. Alison Latham. Oxford Music Online.Oxford University Press. Web. 16 Feb. 2016.
  2. Frederick "Toots" Hibbert Biography. biography.com. URL vidita ye la 2016-07-02.
  3. reggae. Dictionary.com Unabridged. Random House, Inc.. URL vidita ye la 2016-07-10.
  4. Sexton, Paul. “A Legend in His Own Time.” Billboard - The International Newsweekly of Music, Video and Home Entertainment 113.39 (29 Sep. 2001): p. C-8.
  5. Jw31209. "This Is Ska! (2/4) 1964 Jimmy Cliff/Prince Buster/Toots & The Maytals and More..." YouTube. YouTube, 05 Feb. 2010. Web. <https://www.youtube.com/watch?v=dB2elK7PVFg> 02 Dec. 2016.
  6. Steffens, Roger. ‘The Harder They Come: 30 Years After.” The Beat 22.1 (2003): p. 36
  7. Gaar, Gillian G. “The Beat goes on.” Goldmine 38.14 (Dec 2012): p. 26-29