Staciono Kosmala Internaciona

La Staciono Kosmala Internaciona (Angle International Space Station, abreviuro ISS) esas habitebla artificala satelito jacanta an Terala orbito. Ol esas plurnaciona projeto, kreita da 5 kosmala agenterii: NASA (de Usa), Roscosmos (Rusia), JAXA (Japonia), ESA (Europa), e CSA/ASC (Kanada). Entote 22 landi kontributas por la projeto. La staciono uzesas kom inquesto-laboratorio por studiar astrobiologio, astronomio, meteorologio, fiziko ed altra cienci. Ol ank uzesas por probar sistemi ed equipuri qui uzesos en kosmala voyaji di longa durado, exemple misioni a la Luno e Marso.

La orbito dil staciono situesas en altitudo di mezavalore 400 kilometri, e facas kompleta cirkondo di la Tero en 93 minuti, to esas 15,5 orbiti omnadie. Ol konsistas ek diversa presurizata subdividuri habitebla, loki por enmagazinigo di provizuri, fotovoltaika paneli, termala radiatori, loki por kuplado di kosmonavi, laboratorii por inquesti, e robotal armi. Lua unesma parti sendesis a terala orbito ye la 20ma di novembro 1998.