Macapá

De Wikipedio
Macapá
Kelk imaji pri Macapá.
Standardo Blazono
Lando: Brazilia
Regiono: Norda
Stato: Amapá
Informo:
Latitudo: 00°02'18"S
Longitudo: 51°03'59"W
Altitudo: 14 m
Surfaco: 6407 km²
Habitanti: 522 357 (2021)
Denseso di habitantaro: 79,6 hab./km²
Horala zono: UTC-3
Urbestro: Antônio Furlan
(Cidadania, 2021 – 2024)
Mapo di Macapá
Oficala retosituo:
www.macapa.ap.gov.br

Macapá esas chef-urbo di Braziliana stato Amapá. Ol jacas an la sinistra rivo dil fluvio Amazon. Segun statistiki de 2021, ol havis 522 357 habitanti. Lua tota surfaco esas 6 563 km².

Ol esas l'unika Braziliana urbo qua ne ligesas per choseo al altra Braziliana chef-urbi, nome Brasilia. Ol distas 345 km de Belém per aeroplano.

Historio[redaktar | redaktar fonto]

Fortreso São José de Macapá, konstruktita de 1764 til 1782.

L'unesma nomo di la regiono di nuna Macapá esis Adelantado de Nueva Andalucía, nam ol apartenis ad Hispania. La regiono cedesis a Portugal en 1750, per la Kontrato di Madrid.

Francisco Xavier de Mendonça Furtado fondis Macapá ye la 4ma di februaro 1758. En 1836 Francia kreis militarala bazo apud lago la Amapá, ma abandonis ol pro Britaniana interveno. En 1853 Braziliana senatano Cândido Mendes de Almeida propozis krear provinco en la regiono, Oiapóquia. En 1886 Franca aventureri probis krear nedependanta republiko en la regiono, sensucese. Franca aventurero Jules Gros instalis la "guverno" di la "republiko di Cunani" en lua apartamento en Paris, ma nula lando agnoskis ol. Mem la Franca guverno dissolvis ta "republiko". En 1901 altra aventurero, Adolphe Brezet, sensucese probis rikrear la "Republiko di Cunani".

Kande Brazilia divenis republiko la situo en la regiono di Amapa esis kaozala. Lokala habitanti elektis tri reprezenteri por guvernar la regiono: Francisco Xavier da Veiga Cabral, Domingos Maltês, e Desidério Antônio Coelho. Francia anke indikis guberniestro por la regiono, e eventis kombati. Fine, per kontrato signatita ye la 1ma di decembro 1900 Amapá definitive donesis a Brazilia.

Kande Amapá separesis de Pará, Macapá divenis chef-urbo dil teritorio. Ye la 5ma di oktobro 1988, ol divenis chef-urbo dil stato. Dum 20 yari lua habitantaro kreskis 136%, de 132 668 habitanti en 1990, til 381 214 habitanti en 2010. Nun, 94% de lua habitantaro rezidas en urbala areo. Depos 2010, multa edifici konstruktesis en la urbo, e nova quarteri kreesis. La maxim multa nova rezidala edifici konstruktesas en lua centrala quarteri por la mez-klaso e la richa individui. Altralatere, cirkume 60 mil personi, o 14% de la habitantaro, rezidas en prekara habiteyi konstruktita sur stangi en inundebla zoni.

Geografio[redaktar | redaktar fonto]

Avenuo Coaraci Nunes, en Macapá.

La reliefo di Macapá esas plana, e lua suli esas argiloza kun rokoza origino. Lua mezavalora altitudo esas 14 metri super la marala nivelo.

La klimato dil urbo esas varma e humida musonala (Am segun la klimatala klasifikuro da Köppen), kun poka vario di temperaturo dum la yaro. La mezavalora diala temperaturi esas 23°C dum la matino, e 31°C dum la komenco di la vespero. Pro la granda humideso del aero, la sento termala povas superirar 40°C dum la somero. L'Equatoro trairas Macapá.

La pluvoza sezono iras de decembro til julio. La mezavalora yarala pluvo-quanto esas 2549,7 mm, e la maxim pluvoza monato esas marto, kun mezavalore 394,2 mm. Malgre la pluvi de agosto til novembro esar min intensa kam l'altra monati dil yaro, existas nula monato komplete sika: la min pluvoza monato esas oktobro, kande pluvas mezavalore 28 milimetri.