Cincinnati, Ohio

Cincinnati

Kelk imaji pri Cincinnati.

Standardo	Blazono
Lando:	Usa
Stato:	Ohio
Informo:
Latitudo:	39°06'00"N
Longitudo:	84°30'45"W
Altitudo:	147 m
Surfaco:	206,26 km²
Habitanti:	309 317 (2020)
Denseso di habitantaro:	1532,81 hab./km²
Disto de Columbus:	169,8^[1] km
Horala zono:	UTC-5 (UTC-4 dum somero)
Urbestro:	Aftab Pureval (D)
Mapo:

Oficala retosituo:
http://cincinnati-oh.gov/

Cincinnati esas urbo en sud-westal Ohio, Usa, e sideyo di komtio Hamilton. Segun la demografiala kontado di 2020 ol havis 309 317 habitanti, kontre 296 943 habitanti en 2010. Lua tota surfaco esas 206,26 km², equivalanta a 79,64 mi², di qui 201,80 km² o 77,91 mi² esas lando la cetera esas aquo. Ol esas centro di la maxim populoza metropolala regiono di Ohio, kun plu kam 2 271 000 habitanti.

Cincinnati jacas apud rivero Ohio, an la duimo di la disto inter Pittsburgh e Cairo, Illinois. Lua metropolala regiono enkorpigas regioni an la sudo di Ohio, sud-estal Indiana e mem parti di Kentucky. L'urbo havas la 28ma maxim granda ekonomio di Usa e gastigas la sideyi di importanta kompanii, exemple Kroger, Procter & Gamble, e la banko Fifth Third Bank. La maxim anciena ed importanta universitato dil urbo esas l'Universitato di Cincinnati (University of Cincinnati). Yen altri: Universitato Xavier, Universitato Miami, Universitato Northern Kentucky ed Universitato Indiana Wesleyan.

Historio

Cincinnati fondesis en 1788 da John Cleves Symmes. L'unesma nomo dil urbo esis "Losantiville"^[2]. En 1790, Arthur St. Clair ribaptis ol Cincinnati, honore "Societo Cincinnati", fondita en 1783 da militisti qui luktis por Usana nedependo. En 1802 ol divenis vilajo.

En 1811 komencis navigado per vaporobateli che rivero Ohio, e to stimulis la komerco dil urbo kun Saint Louis, Missouri e New Orleans. Ye la 1ma di marto 1819, Cincinnati divenis urbo. De 1810 til 1830 lua habitantaro preske triopleskis, de 9 642 til 24 831 personi.

Geografio

Fonteno *Tyler Davidson*, an la centro di Fountain Square.

La reliefo di Cincinnati esas plana, kun kelka kolini. Kelk arei esas inundebla da rivero Little Miami e rivereto Mill Creek. La centrala quartero dil urbo protektesas de inundadi da muro nomizita Serpentine Wall, e da muro konstruktita alonge choseo Fort Washington Way.. Lua mezavalora altitudo esas 226 metri super la marala nivelo.

Cincinnati havas diversa rikonocmarki, exemple Placo di la Fonteno (Fountain Square), historiala quartero Over the Rhine, ferovoyala staciono Union Terminal, l'edifici Carew Tower (alta de 175 metri, kompletigita en 1931) e Great American Tower (alta de 203 metri, inaugurita en 2011), e la 2,4-hektara parko Washington Park, kreita en 1855. Fountain Square esas publika areo an la centro dil urbo, jacanta inter stradi Fifth Street e Vine.

La klimato dil urbo esas an la limito inter klimati subtropikala humida (Cfa segun la klimatala klasifikuro da Köppen). e klimato kontinentala humida (Dfa). Someri esas varma e humida, kun abundanta pluvo e temperaturi qui povas atingar o mem superirar 32°C (90°F). La mezavalora temperaturo en julio (somero) esas 24,4°C, kontre ke la mezavalora temperaturo en januaro (vintro) esas 0,7°C^[3].

La mezavalora yarala pluvo-quanto esas 1150 mm, e la maxim pluvoza monato esas junio, kun mezavalore 121 mm.

Demografio

Segun statistiki de 2003 esis 317 361 homi, 166 012 hemanari, e 72 566 familii qui rezidis en la urbo. La denseso di habitantaro esis 1 640,5/km² (4 249,0/mi²). Esis 166 012 domi kun mezvalora denseso di habitantaro 822.1/km² (2 129,2/mi²). Segun raso, esis 52.97% Blanki, 42.92% Negri o Afrikan-Usani, 0.21% indijeni Amerikana, 1.55% Aziani, 0.04% Pacifik-insulani, 0.63% de altra rasi, e 1.68% de du o plura rasi, e 1.28% de la habitantaro esis Hispan-Usani o Latin-Amerikani de irga raso.

Esis 148 095 hemanari, di qui 25.1% havis pueri od adolecanti evanta min kam 18 yari en la domo, 26.6% esis mariajita e habitis kune; en 18.6% muliero sen spozulo esis la domo-chefo, e 51.0% esis ne-familii. En 42.8% de omna hemanari vivis sola individuo, e 11.1% habitesis da sola individuo evanta 65 yari o pluse. La mezvalora grandeso po hemanaro esis 2.15 personi e la mezvalora grandeso po familio esis 3.02 personi.

La procento di habitanti segun evo esis: 24.5% evanta min kam 18 yari, 12.9% de 18 til 24 yari, 31.6% de 25 til 44 yari, 18.7% de 45 til 64 yari, e 12.3% evanta 65 yari o pluse. La mezvalora evo esis 32 yari. Po singla 100 mulieri esis 89.4 viri. Po singla 100 mulieri evanta 18 yari o pluse esis 85.6 viri.

La mezvalora revenuo po hemanaro esis US$ 29 493, e la mezvalora revenuo po familio esis US$ 37 543. La mezvalora revenuo por la viri esis US$ 33 063 kontre US$ 26 946 por la mulieri. La revenuo per capita por la urbo esis US$ 19 962. Vivis sub la povreso-lineo 21,9% de la habitantaro e 18,2% de la familii, inkluzite 32,0% ek omna habitanti evanta min kam 18 yari, e 14,8% ek omna habitanti evanta 65 yari o pluse.