Jamiroquai

De Wikipedio
Jump to navigation Jump to search
Jamiroquai pleas en Chicago, 2005

Jamiroquai esas britana funk- ed acid-jazo-bando formacita en 1992.

Kun chef-kantisto Jay Kay, Jamiroquai esis unesme la maxim salianta membro di la Londonana funk/acid-jazo-movado, kun grupi quala Incognito, la James Taylor Quartet, e le Brand New Heavies.  Posa albumi exploris altra muzikala direcioni quala poprock ed electronica.

Lia max bone konocata kansono, aparte en Nord-Amerika, esas "Virtual Insanity", qua ganis quar premii che la MTV Video Music Awards di 1997, ultre Grammy-premio pro "Best Pop Performance by a Duo or Group with Vocals" che la 40ma Grammy-premii.

Jamiroquai vendis plu kam 35 milion albumi mondvaste.

Nomo e membri[redaktar | redaktar fonto]

La nomo dil grupo esas mixuro de "jam" ed "iroquai", fondita sur le Iroquois, indijena usana tribuo.  La originala bando esis Jay Kay (kantisto), Toby Smith (klavaro), Stuart Zender (basgitaro), Nick Van Gelder (tamburi), Wallis Buchanan (dijeriduo) ed Alec Moran (pipeau).  Ica fondinta membri di Jamiroquai partoprenis la skribo e produkto dil unesma albumo.

La membraro di la bando chanjis plurafoye, e la maxim longe-servanta e nun kernala membri esas chef-kantisto e kansonifero Jason "Jay" Kay, perkutisto Sola Akingbola (depos 1994) e tamburisto Derrick McKenzie (depos 1994).  Kay iniciis la formaco di Jamiroquai, il decidis formacar la bando pos nesucesoza audo por kantisto di le Brand New Heavies.  Quankam il dicis ke il probis reprezentar Jamiroquai kom bando, Kay sempre esis salianta.

Kariero[redaktar | redaktar fonto]

1992-97[redaktar | redaktar fonto]

Lia unesma disketo, "When You Gonna Learn", editesis en 1992 che la kompanio Acid Jazz.  Pos olua suceso, Kay signatis ok-albuma kontrato kun Sony Music Entertainment.  La unesma Sony-albumo, Emergency on Planet Earth, editesis en 1993.  Sequis ol en 1994 The Return of the Space Cowboy.  La disketo "Space Cowboy" ganis atenco en la rangi ed en klubi.

Dum ke Jamiroquai populareskis en la UR, west-Europa, Australia, Nova-Zelando e Japonia, li esis poke konocata en Usa.  Lia usana progreson furnisis la triesma albumo, Travelling Without Moving (1996), kun la du sucesoza kansoni: "Virtual Insanity" e "Cosmic Girl".  La suceso di "Virtual Insanity" debesis parte a la novigema video-filmeto (direktita da Jonathan Glazer).  Che la MTV Video Music Awards di 1997, la kreiva video-flimo di "Virtual Insanity" ganis quar premii; li pleis la kansono che la ceremonio.

1998-2003[redaktar | redaktar fonto]

Kantisto Jay Kay

En 1998, Jamiroquai editis "Deeper Underground", la unesma disketo de la quaresma albumo, Synkronized, qua anke aparis en la filmo di 1998 Godzilla.  La acid-jazala "sapori" ed etniala influesi dil unesma tri albumi duris per Synkronized, e la intereso di Jay Kay a funk e disco-muziko movis la bando ta-direcione.

Lor lia kinesma albumo, A Funk Odyssey (2001), li evolucionabis tante frapante ke ula kritikisti e fanatiki komentis ke li perdabis la 'Jamiroquai-sono'.  Pro la departo di plusa originala membri, inkluzanta Wallis Buchanan e lua dijeriduo, Jamiroquai divenis tre diferanta bando kam ta di 1992.  Malgre la chanji, la unesma disketo de la kinesma albumo, "Little L", atingis No. 1 en multa rangi mondvaste, lia maxim vendita dance-disketo tatempe.

En 2003, Jamiroquai kompilis e mixis DJ-albumo por la serio Late Night Tales por Azuli Records.  La kansono-selekto montrias lia soulfunk e disco-influesi, inkluzanta kansoni da le Pointer Sisters, le Commodores, e Johnny "Hammond" Smith.

2004-2006[redaktar | redaktar fonto]

La sisesma albumo, Dynamite, editesis ye 20ma junio 2005.  Ol atingis No. 3 en la britana rangi.  La unesma disketo, "Feels Just Like It Should", editesis en junio; la duesma, "Seven Days in Sunny June", editesis ye 15ma agosto 2005; e la triesma, "(Don't) Give Hate a Chance", editesis ye 7ma novembro 2005.

Jamiroquai editis kolekturo de sucesoza disketi, High Times: Singles 1992–2006 en novembro 2006.  La edito di ca albumo signalis la fino dil ok-albuma kontrato di Kay kun Sony.  La albumo atingis No. 1 en la britana album-rango.  La albumo kontenis du nova kansoni, "Runaway" e "Radio".  Ye 18ma septembro 2006, "Runaway" unesmafoye pleesis che britana radio-kanali.  Ol editesis ye 30ma oktobro 2006.

Premii[redaktar | redaktar fonto]

Jamiroquai nominesis 13-foye por le Brit Awards, ma til hodie li ne esis gananto.

"Buffalo Man"[redaktar | redaktar fonto]

"Buffalo Man" esas la nomo di la silueto-karaktero videbla sur la kovrili di multa diski da Jamiroquai.  La imajo kreesis ante la edito di la disketo di 1992 When You Gonna Learn.  Raportite ol originale skisesis da Jay Kay, nam "Buffalo Man" esas semble su-portreto siluetala di Kay portanta bufalo-chapelo.

Ol fondesas sur la Minotauro de la greka fablo di Teseo e la Minotauro.  Jay Kay asertis, "Me vere komprenas Teseo.  Fakte, me tre similesas Teseo."  La marko uzesis ye preske omna edito ulforme; normale la unika simbolo uzesas nemodifikite, ma ulfoye ol uzesas ye stilizita maniero segun la artajo o kansono.