Petter Forsskål

De Wikipedio
Irez ad: pilotado, serchez
Petter Forsskål
Peter Forsskaal year1760.jpg
Profesiono: zoologo e botanikisto
Lando: Flag of Finland.svg Finlando
Nasko-dio: 11 di januaro 1732
Nasko-loko: Helsinki
Morto-dio: 11 di julio 1763
Morto-loko: Yerim, en nuna Yemen

Petter Forsskål (1732 til 1763) esis zoologo e botanikisto. Forsskål esis un del unesma Finlandana ciencisti internacionala.

Yuneso e studio[redaktar | edit source]

Petter Forsskål naskis en familio di pastoro. Lua matro mortis kande Petter evis du yari. En la komenco di 1740a yari la Forsskål-familio kun nova matro translojis en Stockholm. Petter ne frequentis skolo ma lua patro docis a lu en hemo. La docado esis tre elementoza, pro ke Petter komencis studiar en l' Universitato di Stockholm ye evo di 11 yari kun lua du olda fratuli.

Yuna Petter volis divenar pastoro kom lua patro esis. Pro to il studiis en Göttingen, Germania, orientala lingui, i.a. Hebrea. Malgre il divenis interesata pri filozofio e protektis lua diserturo en 1756. Ilu retrovenis Suedia e prolongis studiar en Uppsala. Lua opinioni pri libereso di populani ne plezis la suportanti di chapelo-partisani, e lua diserturo ne aprobesis.

Exkurso ad Arabia[redaktar | edit source]

Lore Daniani organizis ciencala exkurso ad Arabia, e Forsskål joyante membreskis l' exkursantaro, kande on pregabas ilu partoprenar. La voyajo startis de København ye januaro 1761. La grupo exploris Kontantinopolo, Egiptia e Saudia Arabia. Nextayare li navigis a Yemen, til Luheijja.

Forsskål esis la ciencisto e zoologo dil explorantaro. Lua tasko esis analizar lokala plantaro e notizar lia Araba-linguala nomi ed lia uzado. Anke la analizo pri la animalaro esis lua tasko. Forsskål esis tre apta por la laboro, pro ke il esabas aprentiso di Carl von Linné e lu savis l' Arabiana.

La exkurso esis ciencale sucesoza ma por la partoprenanti tragedio. La linguisto di la grupo, Daniana F. C. von Haven, maladeskis pro malario e mortis en Moka ye 25 di mayo 1763. Ipsa Forsskål maladeskis en Taiz e lu mortis en urbeto di Yerim sur voyo a Sanaa ye 11 di julio. De Sanaa la exploristaro navigis ad India. Sur la navo mortis Suediana helpanto Berggren e Germaniana designisto Y. W. Baurenfeind. En Bombay mortis Daniana mediko C. C. Kramer. Nur Germaniana matematikisto e astronomo Carsten Niebuhr avanvoyajis tra Persia e Turkia ad Europa. Til København il arivis en novembro 1767, sep yari pos la departo.

Valoro di Forsskål[redaktar | edit source]

La materiajo kolektita da Forsskål restis por la cienco. Niebuhr transportis plu kam dek kofregi de botanikala e zoologiala specimeni til Bombay, e deibe ol sendesis ad Universitato di København. Nun la kolektajo botanikala esas konocata kom Herbarium Forsskålii; la zoologiala materiajo jacas nun en zoologiala muzeo.

Niebuhr salvis anke la notizo-folieti da Forsskål. Ilu redaktis verki Descriptiones animalium e Flora Ægyptiaco-Arabica por imprimo ye 1775. Nextayare imprimesis pluse ilustrita verko Icones rerum naturalium.

La botanisti e zoologi savas ankore la nomo di Petter Forsskål. Lua nomo trovesas en botanikala nomo-sistemo ed en zoologio lu esas konocata kom serchisto pri fishi, korali e planktono.