Frank Kasper

Frank Kasper esas germana idisto qua naskis dum 1960 en Altenburg, urbo di Est-Germania.

Il idisteskis dum 1972 pos diskurso da s-ro Eberhard Scholz favoroza ad Ido koram grupo de yuni. Ilu ruptis sua relati kun l'Idistaro dum la yari 1980a pro ke il divenis lore profesionala militisto, e pro ke la relati kun la extera mondo esis interdiktata por tala profesiono en Est-Germania.

Dum 1989 pos la falo dil murego di Berlin en la GDR, il vizitis le Neussner (famoza Idisti) e ristartis sua Idala aktiveso. Il anke plu tarde lernis Esperanto, ma sen renuncar Ido. Quik de 2001, il organizis plura Ido-konferi: Nürnberg (2001), Krakow (2002), Grossbothen (2003) e Kiiv (2004). Dum 2001 il divenis prezidanto dil GIS (Germana Ido-Societo). Per lua agado il sucesis favorar l'elekto di Hans Stuifbergen kom prezidanto dil ULI (Uniono por la Linguo Internaciona) en 2004.

Frank Kasper esas tre aktiva Idisto ed anke Esperantisto. L'idistino Marion Kasper esas ilua ex-spozino.