Uniono por la Linguo Internaciona Ido

De Wikipedio
(Ridirektita de ULI)
Salti al navigilo Irez a serchilo
Arkivo:Uniono di la linguo internaciona Ido 2020.jpg
Elekto dil membri dil Direktanta Komitato dil ULI en la yaro 2020

Uniono por la Linguo Internaciona Ido (ULI), esas l'oficala organizuro dil Ido-movemento.

Historio

L'Uniono por la Linguo Internaciona fondesis ye la 31ma di julio 1910 kun skopo developar e propagar la helpolinguo internaciona Ido,.

Skopo

La §1 di la statuto di ULI definis la skopo di l'asociuro tale:

L'Uniono por la Linguo Internaciona havas la skopo a unionar en komun agado omna personi, qui aprobas la linguo internaciona Ido, quale ol esas definita per la deklaro dil Delegitaro por Adopto di Linguo Helpanta Internaciona e quale ol rezultis e rezultos de la labori dil Komitato di ULI; b. adoptar, propagar e developar ta linguo segun omna posibla e praktikal moyeni.

Do la chefa funcioni di la ULI esas la propagado di la linguo, l'organizado di yarala konferi en qua Idisti kunvenas, e la publikado di la revuo Progreso, komencata en la yaro 1908 da Louis Couturat, unu dil fondinti dil movado.

Agadi

L'ULI facas la sequant agadi:

  • Mantenado del universaleso dil Ido per la Linguala Komitato
  • Editado del revuo trimestrala "Progreso"
  • Organizado de Renkontri Internaciona por Idisti
  • Susteno e helpo al Ido-asociitari nacionala
  • Informo en la mediato (interreto, jurnalaro, radio, ...)
  • Serchado de meceno

Membreso

Omna natural o yural persono, qua aprobas la linguo dil Uniono e helpas l' Uniono realigar lua skopi, povis divenar membro sive per direta adhero sive per mediaco di altra organizuro aprobita da Uniono. La membri de la nacionala Ido-asociuri ne esis automatale membri en l' ULI.

Sideyo

Segun §2 di la statuto la sideyo di l' ULI esas l'urbo en olqua la sekretario di la Direktanta Komitato lojas.

Organi

L'Uniono por la Linguo Internaciona Ido havas la sequanta organi:

  • La Direktanta Komitato
  • La Linguala Komitato
  • La nacionala reprezenteri
  • La revuo PROGRESO

La Direktanta Komitato

La Direktanta Komitato administras l' Uniono e reprezentas ol oficale en omna aferi. La prezidero e la sekretario signatas en la nomo dil Uniono. La Komitato konsistas ek admaxime 15 membri. Ol elektesas omna 4 yari. La kandidati propozesas dal sekretario pos interkonkordo kun la cetera komitatani. La Komitato elektasas dal ensemblo dil Unionani.

La Linguala Komitato

La Linguala Komitato facas propozi a la Direktanta Komitato en linguala questioni. Exemple la Linguala Komitato propozis l' adopto ed oficaligo di nova vorti a la Direktanta Komitato.

La nacionala reprezenteri

La landala reprezenteri nominesas dal Komitato pos interkonsento kun la rispektiva landala federuro. Li reprezentas oficale l' Uniono en lia landi.

Konferi ed internaciona Ido-renkontri

La ULI organizas konferi de Ido (Ido-konfero) e internaciona Ido-renkontri depos la yaro 1921. Videz la Listo di Ido-konferi ed internaciona Ido-renkontri