Ido-konfero 2004
Dum la tempo inter la 16ma e 23ma di julio 2004 eventis internaciona Ido-konfero en la repozeyo Kosmos apud la vilajo Puhivka proxime al Ukrainana chef-urbo Kiiv.
La konferon partoprenis Idisti de Belarusia, Ukraina, Germania, Nederlando, Chinia, Japonia, Britania, Lituania (Ukrainano mariajit a Lituaniano) e Polonia.
La Kiivana samideani aranjis omno ecelante. Li esis tre bona hosti, qui montris l' urbo, muzei ed altra (turistala) vidindaji. Li anke informis pri la problemi dil Ukrainana Idisti (kom movemento), la chanco di suceso di Ido, edc.
On specale deziras dankar Volodimir Hurtovenko, nefatigebla guidero, Janna Reunova, amikino qua konservis la biblioteko di la famoza Boris Aaronov, e qua kordiale gastigis vizitanti, e Mikaelo Linecki, bon-humora aranjinto di la hotelo e multa exkursi.
L' Idisti agreablege surprizesis dum solena inauguro dil Ido-konfero da vere bele kantanta infanto-koro, qua kantis Ido-kansoni ed altra kansoni, qui parte esis tradukita aden Ido. Esis oficala acepto en la Kultur-domo dil firmo "Artem" kun expozo pri la kolekturo di Ido-libri de Boris Aaronov, konservita da Janna Reunova, e pri "Interhelpo", qua, per Ido, fondis internaciona help-organizuro por laboristi en Kirgizia e Chekoslovakia.
La solena inauguro per l' inicio di Janna Reunova aranjesis e subvencionesis da la chefino di Janna, siorino Lyudmila Kozlova ye la nomo dil firmo "Vladimir Dovgan".
Pos la solena inauguro dil Ido-konfero Janna Reunova guidis la konferani a la tombo di Boris Aaronov. Li uzis l' okaziono por honorizar e konservar la memoro di la famoza Idisto pozar flori sur la tombo.
La konfero atraktis multa atenco, se nur ja pro bunta kolekturo de diversasorta Idisti, qui singladie Ido-babiladante trairis Kiiv.
Ye la konfero anke esis serioze parolata pri diversa temi koncernante l' Ido-movemento forme di Uniono di la Linguo Internaciona, Ido. On sucesis solvar multa problemi ed esperas balde prizentar la rezulti di la diskutita temi.
L' Idisti mem experiencis mariajo-festo qua organizesis en la sama hotelo, e konseque esis invitita tostar ye la saneso di la mariajiti ed ube l' Idisti montris danso-stili de diversa landi.
.svg)