Ido-konfero 2002
Dum la tempo de la 26ma til 30ma di julio 2002 en Kraków, Polonia, eventis l'internaciona Ido-konfero kun 14 partoprenanti de sis landi. Komence la majoritato di la konferani experiencis agreabla vespero. Dum la tarda vespero, Frank Kasper fine oficale apertis la konfero.
27ma di julio
[redaktar | redaktar fonto]Ye la 27ma di julio, 9:00 kloki, Igor Wasilewski guidis la partoprenanti tra l'anciena urbo Kraków. Pos komuna dejuno en tipala restorerio Poloniana, la konfero komencis laborkunsidi. On diskutis pri la posiblesi vastigar Ido. Samideano Robert Carnaghan atencigis la konferani, ke multa organizuri esas registrita en listo dil UNESKO por recevar informi de ibe e samatempe la kontaktadresi esas trovebla por omna interesati. Robert mencionis, ke anke l' ULI esis registrata ibe e propozis kontrolar ol. Cetere lu propozis reproduktar anciena Ido-vorto-libro ed insertar ibe la nova vortaro.
Hans Stuifbergen prizentis sua nova libreto pri la vivo di la Franca poeto Arthur Rimbaud, qua ne nur esis admirinda poeto, ma anke vivis tre aventuroza vivo. La biografio skribesas da René Zwaap, Nederlandana jurnalisto, qua laboras por la Groene Amsterdammer (duesma maxim anciena revuo en Europa) ed anke laboras por l' alternativa televiziono-kanalo Salto en Amsterdam. Hans anke dicis, ke lu intencas editor (adminime) un libro po yaro por modernigar l’ Ido-literaturo ed ofrar al Idistaro lektaji. Lu certe invitis omni sendar tradukuri o, prefere, originala Ido-literaturo, ad Editerio Tia Libro, qua esas komplezanta editar lo skribita en libro-formo. Hans ankore informis la konferani, ke lu ja okupabas pri la korektigo di la texto "La Mikra Princo" da Antoine de Saint-Exupéry, tradukita da nia amiko en Brazilia, Herder Sa. Olta esos editata tam balde kam posible.
On anke propozis, ke la DK dil ULI kontrolez la posibleso oficiale registrar l’ Ido-organizuro en irga lando, probable en Britania. Pos pauzo, quo uzesis por regardar l'Ido-libri, quin Alfred Neussner kunportabas, Hans Stuifbergen prizentis sua nov-editita libreto. Intertempe la partoprenanti subskribis saluto-karti preparita da Alfred pro sendar li a diversa samideani ed interesanti en la tota mondo. Fine Alfred atencigis a diversa erori durante facita dum l' uzado di nia linguo ed on kelke diskutis pri to. L' unesma dio dil konfero finis kun komuna dineo en restorerio kun tradicionala muziko.
28ma di julio
[redaktar | redaktar fonto]Sundio-matine, ye la 28ma di julio, konferani voyajis ad urbeto Wieliczka. Ibe vizitesis famoza e bela sal-mineyo. Pos la exkurso on retrovenis a Kraków e havis dejuno en tre bela restorerio di la hotelo Europejski. Pos la dejuno e kelka libera tempo, konferani kunvenis en agreabla konfero-chambro di la hotelo Mistia e duris la konfero. Dum la konfero on parolis pri diversa aferi tre importanta por l’ Ido-movemento, pri lua politiko e lua futuro.
Fine, vespere partoprenanti itere babilis per Ido en Mexikiana restorerio. Ibe vizitis konferon yuna reprezentanto di Polona ekologiala revuo Zielone Brygady (Verda Brigadi), qua expresis sua intereso pri la teorio da Silvio Gesell. Il komprenende parolis kun Alfred Neussner.
29ma di julio
[redaktar | redaktar fonto]Lundie, ye la 29ma di julio, la tota jorno esis destinita por turistala vizitado. Matine la grupo iris a la rejala kastelo Wawel. Pose on iris per specala vehilo sequinte la voyo apud la fluvio Vistula a la Hebrea distrikto pro havar dejuno en Hebrea restorerio.
Pos dejuno la promeno duris en la Hebrea distrikto. Konferani vizitis du sinagogi - la Sinagogo Remuh e la Sinagogo di Izaak. En la sinagogo di Izaak on povis regardar tre interesanta anciena filmi dokumentizanta la vivo di Judi en Kraków dum la duesma mondomilito. Pos kelka pauzo en apuda restorerio Singer (la nomo venas de kudromashino Singer, qui stacas sur tabli ibe kom dekorajo) on fine iris a la Nürnberg-Domo, ibe en luita chambro en kelero on havis repasto e samatempe nia adiala vespero. Pro ke Nürnberg esas jemelo-urbo di Kraków, on rezolvis selektar ol kom apta loko por montrar la ligo inter Ido-renkontro en Nürnberg 2001 ed Ido-renkontro en Kraków 2002. Nun kelka personi mustis departar a sua hemo, ma kelka altra amiki voyajis mardie a Zakopane por facar poskonfera exkurso e pasar ibe kelka agreabla dii.
.svg)