Ido-Saluto!
Ido-Saluto! esas la Ido-linguala revuo di la germana Idisti. Ido-Saluto! esas la oficala organo di la Germana Ido-Societo e publikesas quarfoye en la yaro. La revuo skribesas komplete en Ido e havas cirkum 20 pagini.
La ideo por la Ido-Saluto! naskis dum la internaciona Ido-renkontro 1995 en Elsnigk. Segun la unesma chef-redaktero dil Ido-Saluto!, Hans Stuifbergen e Alfred Neussner, eventis tale en la gardeno dil ULI-prezidanto Günter Anton:
"Esis parolata pri komencar nova revuo, apud Progreso, por plenigar la lakuno quan efektigis la desaparo di Ido-Vivo, l'organo di la Britaniana Ido-societo. Sempre ta revuo esis tre apreciata pro la lejera tono dil artikli, e la nova devez ofrar la sama nivelo di artikli al Idistaro" [1].
Segun Hans Stuifbergen e Alfred Neussner la ideo por la nomo dil revuo venis de Günter Anton o Jacques Bol. La nomo expresas saluto quan facas la revuo singla foyo kande ol atingas la lekteri irgube en la mondo [2]
La unesma numero dil Ido-Saluto! aparis ye la fino dil yaro 1995/komenco dil yaro 1996[3]. L'unesma chef-redaktero dil Ido-Saluto! esis la nederlandana Idisto Hans Stuifbergen. La organizala redaktado di produktado e dissendado facesis da Alfred Neussner, qua dum ca tempo habitis en Waldkappel-Burghofen.
En la yaro 2004 la Italiana Idisto Carmelo Mico, qua habitis en la germana urbo Mainz, asumis la tasko dil chef-redaktero. Ma segun la artikli ne esis linguale aceptebla, pro ke la texti esis plena de Esperantaji[4]. Pro to la koopero kun Carmelo Mico haltigesis ed Alfred Neussner divenis chef-redaktero.
Depos la yaro 2006 la redakterio di la Ido-Saluto! esas che la lokala Ido-grupo en Ido-Amiki Berlin. La redakterio konsistas de diversa personi. La redaktado e dissendado facesas da Rudolf Gensch. La redakterio en la yaro 2025 esis: Thomas Schmidt, Rudolf Gensch, Jean Martignon, Eberhard Scholz, Jürgen Viol, Rainer Höhling e Günter Schlemminger [5].
Depos la yaro 2025 on povas lektar la dijitala versiono dil Ido-Saluto! gratuite en la interreto[6]. Por sparar pekunio la membri dil Germana Ido-Societo recevas nur la dijitala versiono dil revuo automatikale, ma on povas abonar papera versiono por suplementala pago.
Chef-redakteri dil Ido-Saluto!
[redaktar | redaktar fonto]- 1995-2002 Hans Stuifbergen
- 2002-2004 Carmelo Mico (de numero 1/2002 til numero 1/2004)
- 2004-2005 Alfred Neussner (de numero 2/2004 til fino dil yaro 2005)
- 2006-hodie Ido-Amiki Berlin
Extera ligilo
[redaktar | redaktar fonto].svg)
Referi
[redaktar | redaktar fonto]- ↑ Citita segun la artiklo Historio di la revuo Ido-Saluto! da Hans Stuifbergen ed Alfred Neussner en: Ido-Saluto! 1/2013, p. 10.
- ↑ Videz Ido-Saluto! Numero 1/2013, p. 10.
- ↑ Videz Ido-Saluto! Numero 1/2013, p. 11.
- ↑ Videz Ido-Saluto! Numero 1/2013, p. 11.
- ↑ Videz Ido-Saluto! Numero 4/2025, p. 23
- ↑ Videz Ido-Saluto! che archive.org