Uniono por la Linguo Internaciona Ido

De Wikipedio
Irez ad: pilotado, serchez

Uniono por la Linguo Internaciona Ido (ULI), esas l'oficala organizuro dil Ido-movemento.

Historio[redaktar | redakti fonton]

L'Uniono por la Linguo Internaciona fundesis la 31ma di julio 1910 kun por misiono developar e propagar la helpolinguo internaciona Ido.

Skopo[redaktar | redakti fonton]

La §1 di la nuna ULI-statuto definas la skopo di l' asociuro tale:

L'Uniono por la Linguo Internaciona havas la skopo a unionar en komun agado omna personi, qui aprobas la linguo internaciona Ido, quale ol esas definita per la deklaro dil Delegitaro por Adopto di Linguo Helpanta Internaciona e quale ol rezultis e rezultos de la labori dil Komitato di ULI; b. adoptar, propagar e developar ta linguo segun omna posibla e praktikal moyeni.

Do la chefa funcioni esas di la ULI esas la propagado di la linguo, l'organizado di yarala konferi en qua Idisti kunvenas, e la publikado di la revuo Progreso, komencata en la yaro 1908 da Louis Couturat, unu dil fondisti dil movado.

Agi[redaktar | redakti fonton]

L'ULI facas la sequant agi:

  • Mantenado del universaleso dil Ido per la Linguala Komitato
  • Editado del revuo trimestrala "Progreso"
  • Organizado de Renkontri Internaciona por Idisti
  • Susteno e helpo al Ido-asociitari nacionala
  • Informo en la mediato (interreto, jurnalaro, radio, ...)
  • Serchado de meceno

Membreso[redaktar | redakti fonton]

Omna natural o yural persono, qua aprobas la linguo dil Uniono e helpas l' Uniono realigar lua skopi, povas divenar membro sive per direta adhero sive per mediaco di altra organizuro aprobita da Uniono. Til nun membri di la nacionala Ido-asociuri ne esas automatikale membri en l' ULI.

Sideyo[redaktar | redakti fonton]

La nuna sideyo di ULI situesas en Francia.

Organi[redaktar | redakti fonton]

L'Uniono por la Linguo Internaciona Ido havas la sequanta organi:

  • La Direktanta Komitato
  • La Linguala Komitato
  • La nacionala reprezenteri
  • La revuo PROGRESO

La Direktanta Komitato[redaktar | redakti fonton]

La Direktanta Komitato administras l' Uniono e reprezentas ol oficale en omna aferi. La prezidero e la sekretario signatas vice l' Uniono. La Komitato konsistas ek admaxime 15 membri. Ol elektesas omna quaresma yaro. La kandidati propozesas dal sekretario pos interkonkordo kun la cetera komitatani. La Komitato elektesas dal ensemblo dil Unionani .

La Linguala Komitato[redaktar | redakti fonton]

La Linguala Komitato facas propozi a la Direktanta Komitato en linguala questioni. Exemple la Linguala Komitato propozas l' adopto ed oficaligo di nova vorti a la Direktanta Komitato.


La nacionala reprezenteri[redaktar | redakti fonton]

La landala reprezenteri nominesas dal Komitato pos interkonsento kun la rispektiva landala federuro. Li reprezentas oficale l' Uniono en lia lando.

Extera ligili[redaktar | redakti fonton]