Ido-konfero 2006

De Wikipedio
Irez ad: pilotado, serchez

Ye 2006 la internaciona Ido-konfero eventis dum la tempo inter la 25ma e 28ma di agosto en Berlin, chef-urbo di Germania. La Ido-Amiki Berlin preparis ica renkontro kun granda ardoro e diligenteso. Idani e supportanti di Ido venis de Finlando, Francia, Hispania, Portugal, Chekia, Polonia, Chinia, Nederlando e Germania. Pluse liberprofesionala filmifisto Usana asistis la konfero. Tale rirenkontris samideani, qui esas amiki depos multa yari, ma on anke povis salutar kelka nova gesamideani.

25ma di agosto[redaktar | redaktar fonto]

Ante l' oficala komenco dil Ido-konfero dum la 25ma di agosto eventis la yarchefkunveno dil Germana Ido-Societo en la ver.di-domo en la distrikto Meza-Berlin. Ibe ultre altro decidesis, ke la Germana Ido-Societo sustenos l' aranjo dil internaciona Ido-konfero dum la yaro 2007 en Paris o cirkumajo.

Ye la komenco dil Ido-konfero sioro H. Mittag pleis kun sua akordeono la melodio di Eurovision. Pose la prezidanto di ULI Hans Stuifbergen inauguris la Ido-konfero 2006. Sequis salutovorti dil Berlinala prezidero dil Societo dil Germana Linguo (VDS) Kurt Gawlitta e dil prezidero dil Societo di Skripteri en Berlin profesoro Bosetsky. Pose samideano Eberhard Scholz parte lektis salut-mesaji, qui sendesis ek la tota mondo. Fine Frank Kasper prizentis per sua portebla komputoro la saluto-vorti da la filiino (evanta 6 yari) di Fernando Téjon en Ido, registragita ye la interreta pagini di Fernando Téjon.

Dum la vespero la partoprenanti travivis agreabla gril-vespero en la ver.di-Jugendbildungsstätte, en Konradshöhe.

26ma di agosto[redaktar | redaktar fonto]

Dum l' antedimezo dil 26ma di agosto eventis laborkunsido en la ver.di-Jugendbildungsstätte. Komence Gonçalo Neves lektis kelka poemi en Ido. Sequis diskuto e decido koncerne l' aranjo e realigo dil internaciona Ido-konfero dum la yaro 2007 en Paris o cirkumajo okazione dil centyarala aniversario di Ido. Koncerne ca skopo fondesis organizo-komisitaro. Sequis kurta diskuto pri la projeto di nova interret-pagini di ULI kreita da Loïc Landais. La projeto ganis generala aprobo.

Ante la dejuno la partoprenanti audis diskurso dil prezidero di la Societo por Interlinguistiko dro D. Blanke pri sua nova libro en la Germaniana. Günter Anton tradukis aden Ido. Pose dro Blanke esis ye la dispono por diskuto pri to.

Pos komuna dejuno en la ver.di-Jugendbildungsstätte kunvenanti veturis per publikala trafikili al urbala centro westa.

De la fervoyala staciono Zoologischer Garten veturesis uzante l' omnibus-lineo nr. 200 e preterpasesis la westa kulturala centro, la Potsdamer Platz e tra l’ aleo Unter den Linden (Sub la Tilii) a la Alexanderplatz, qua situesas en l’ urbala centro esta.

Dum la vespero e parto dil nokto kunvenanti vizitis kadre dil Longa nokto di muzei diversa muzei en Berlin, quale la Nacionala Galerio, la Pergamon-Muzeo e la Muzeo pri Egiptia en la insulo di muzei.

27ma di agosto[redaktar | redaktar fonto]

Dum l' antedimezo dil 27ma di agosto eventis la lasta laborkunsido en la ver.di-Jugendbildungsstätte. Komence amiko Igor Vinogradov de Rusia kantis mediacante per la komputoro.

Pose Ferdinand Möller prizentis elektronikala dicionarii, quin lu dijitaligis*, e la skanita* Persiko-dicionario. Lu pregis la helpo dil Idisti por finigar, korektigar ed aktualigar la skanita* dicionarii.

Kom mikra amuziva intermezo, Dieter Schmidtchen montris sua talanto jonglar. H. Mittag muzikale akompanis lu per sua akordeono.

Ye la fino dil laborkunsido la honoruma ULI-prezidanto Günter Anton dum kelka minuti diskursis pri la situeso koncerne l' ULI ed olua Direktanta Komitato.

Pos la dejuno partoprenanti travivis specala surprizo. Li povis juar turo per historiala turistala Zille-omnibuso kun urb-guidantino cirkume la mezo di Berlin. Günter Anton tradukis la German-linguala guidado dil urb-guidanto aden Ido.

Pos la turo Idisti komune migris kelkete tra la konocata aleo Sub la Tilii, tra la Brandenburga pordego e preteriris la parlament-edifico (Reichstag) a la nova chefa fervoyo-staciono. De ibe on veturis per urbala treno e subtera treno a tipikala Berlinala restorerio (Futtern wie bei Muttern ‘Manjar quale che matro’) dinear.

Rudolf Gensch prizentis nova kamizo kun reklamo okazione dil centyarala aniversario di Ido dum la yaro 2007. La kamizo erste esis produktata dum la recenta dii ante la konfero e la partoprenanti povis komprar ol.

28ma di agosto[redaktar | redaktar fonto]

Dum l' antedimezo dil 28ma di agosto Fina samideano Arto Moisio explikis la funcionado ed uzado dil Wikipedio e Wikivortaro Idala.

Dum la tota renkontro la yuna Usana tv-jurnalisto Nick Vivion filmifis inter la kunvenanti. La filmo komence publikigesos en la reto e plu tarde ofresos a televizionala stacioni.

Dum la tota tempo dil konfero en seminar-chambro en la ver.di-Jugendbildungsstätte expozesis nova propagili, Ido-kamizi, Ido-insigni, broshuro GDR-66, literaturo de Waldkappel ed altra.

On povas rezumar, ke la Ido-konfero 2006 esis sucesoza por la partoprenanti.

Danki[redaktar | redaktar fonto]

La specala dankon de la partoprenanti meritas la sindikato “Unionita Servado” (Vereinte Dienstleistungsgewerkschaft, kurte ver.di), landala distrikto Berlin/Brandenburg, la administranti e la personaro dil ver.di.-Jugendbildungsstätte en Konradshöhe, la Berlinala Trafik-Kompanio BVG e la posedanto e la personaro dil restorerio Futtern wie bei Muttern. Omni mencionita importantege kontributis a la granda suceso di la konfero.

Cetere on dankas a la honoruma ULI-prezidanto Günter Anton pro la tradukado aden Ido facita da lu dum la laborkunsidi e dum la urb-turo per l' omnibuso.

Omna partoprenanti dankas al Ido-Amiki Berlin pro l’ eminenta e diligenta aranjo dil konfero.

Extera ligilo[redaktar | redaktar fonto]