Ido-konfero 2003

La internaciona Ido-konfero 2003 eventis dum la tempo dil 8ma (arivo) til la 12ma di agosto (departo) en la rurala sideyo Energie, la hodiala Wilhelm-Ostwald-Memoreyo en Großbothen cirkume 45 kilometri sudeste de Leipzig.

Okaziono por la selektado di ca loko esis la 150ma naskodio di Wilhelm Ostwald, quan la memoreyo festis dum la yaro 2003. Wilhelm Ostwald naskis ye la 2ma di septembro 1853 en Rīga (Latvia). La Ido-konfero esis parto di la solenaji okazione di ca jubileo.

8 di agosto

Dum venerdio, la 8ma di agosto, la partoprenanti dil Ido-konfero arivis en Großbothen. Samideani de sis landi partoprenis la konfero.

Pos komuna dineo en la restorerio Kleinbothen la konferani experiencis agreabla vespero ye la teraso di la renkontreyo. On interbabilis en amikala sfero e tale konoceskis l' unu l' altru.

9 di agosto

Dum saturdio, la 9ma di agosto, on experiencis totjorna exkurso a Leipzig, ube la konferani regardis la renovigita chefa fervoyala staciono e pose l' urbo dum duhora urbrondvehado per omnibuso. La vizitanti dejunis en la famoza subtera restorerio Auerbachs Keller, promenis tra l' urbo-centro e drinkis kafeo en Araba kafeerio.

Pos retroveno a Großbothen la memoreyestro preparis por konferani saporoza dineo de rostaji e li ankorfoye experiencis agreabla vespero sur la teraso dil konfereyo.

10 di agosto

Dum l' antedimezo di sundio, la 10ma di agosto, inter 09.30 e 12.45 kloko eventis la laborkunsido. Pos salutar la partoprenanti Frank Kasper raportis pri lua voyaji a Francia ed Ukraina pro la skopo regardar la posiblesi aranjar la sequanta Ido-renkontri ibe. Pos l' aferi pri l' Ido-renkontri Kasper prizentis propozo koncerne la cayarala novelekti dil Direktanta Komitato dil ULI, quon fine signatis kin gesamideani e qua esis sendita a la sekretario dil ULI.

La chefa temo dil diskuto esis la propozi di Loïc Landais, quin lu ante kelka tempo sendis a la Direktanta Komitato dil ULI:

• Traduko dil Ido-kurso “Ido for All” aden la lingui dil Europana Uniono ed olua publikigo ye la ret-situo dil ULI sur bazo di existanta tradukuri.
• Serioza reflekto pri l’ utileso pregar la helpo di profesionala tradukisti koncerne tradukuri aden lingui, quin nula Idisto savas.
• Krear Ido-disko ROM kun existanta Idaji (kursi, dicionarii, filmi e.c.) por vendar od ofrar a la Europana Uniono.
• Krear e publikigar “Listo kun mil Ido-vorti” per la lingui dil Europana Uniono.

Konfero konstatis, ke on povas adminime parte realigar ca propozi e rezolvis propozar talmaniera decido por aprobo e realigo a la Direktanta Komitato dil ULI. Fine Alfred Neussner e Frank Kasper lektis saluti, qui til lore arivis a konfero.

Pos komuna dejuno en la restorerio Kleinbothen eventis la kulminopunto di la konfero. Pos la fino dil laborkunsido Robert Pontnau ofris sua pronteso facar la solena diskurso pri Wilhelm Ostwald okazione di lua 150ma naskodio redaktita da Günter Anton en Ido. Ingrid Surprayan esis pronta facar la Germanalingua rezumo tradukita anke da Günter Anton. Don Gasper quik esis pronta helpar ad amba preparar lia tasko dum kelka minuti. Danke a Robert, Ingrid e Don la diskurso, ube asistis membri dil Wilhelm-Ostwald-Societi ed altra interesemi, inter li jurnalistino dil lokala revuo Leipziger Volkszeitung komencis en justa tempo. Robert tre ecelante diskursis en Ido ed Ingrid klare lektis la Germana segun la projeti. Fine la askultanti esis kontenta e Robert recevis donaco dil Wilhelm-Ostwald-Societo. La maxim kordiala dankon e laudon meritas la diskursanti Robert Pontnau ed Ingrid Suprayan, ma anke a Günter Anton, qua vere diligente redaktis ca diskurso. Fine la diskurso esis granda suceso. Dum la vespero pos la dineo on experiencis plusa agreabla vespero spektinte filmi pri l' Ido-konfero 1995 en Elsnigk, 1997 en Bakkum, 2001 en Nürnberg e 2002 en Krakow ed interviuvo kun Andreas Juste facita da Heidi Neussner e filmi pri la posrenkontro 2002 en Zakopane, Ido-renkontreto en Anklam, vizito da Kasper che l' expozo Bunta Garbo e che la redakteyo di "Progreso" dum mayo 2002 en Amsterdam e diapozitivi pri l' Expolingua 2002 en Berlin facita da Kasper.

Regretinde pos la fino dil filmprogramo ja kelka samideani devis adiar, pro ke li dum la sequanta matino devis departar.

11 di agosto

Dum lundio, la 11ma di agosto, dum la antedimezo konferani experiencis interesiva guidado tra la Wilhelm-Ostwald-Memoreyo. La spozino dil memoreyestro guidis tra la muzeo e tale explikis la tota verko di Wilhelm Ostwald. On montris la kemikala laboreyi ed anke l' okupado di Wilhelm Ostwald pri kolori e piktado esis demonstrata. Kompreneble konferani anke povis regardar la stoko di Ido-literaturo di Wilhelm Ostwald. Fine on vizitis la granda tereno dil rurala sideyo Energie kun la tombo di Wilhelm Ostwald.

Pose ja vartis ni jurnalistino dil Est-Germana jurnalo Neues Deutschland kun fotografisto por preparar totpagina raporto pri Ido. La fotografisto facis kelka fotografuri dil restanta grupo di Idisti e pose la jurnalistino interviuvis konferani dum cirkume un horo. La raporto aparis en la saturdiala edituro dil jurnalo Neues Deutschland, la 16ma di agosto sur la pagino 17 ed anke esis lektebla che l' interreta edituro dil revuo.

Pos komuna dejuno en la restorerio Kleinbothen konferani vizitis ruinero di monakineyo dum kelka minuti. Pos drinkar kafeo on repozis e pos la dineo on havis agreabla adiala vespero. Konferani uzis la lasta hori di la renkontro por interdiskutar libere.

12 di agosto

Fine venis mardio, la 12ma di agosto. Pos komuna dejuneto anke la restinta partoprenanti departis, ma parto di li duris sua renkontro voyajinte komune a la Germana chef-urbo Berlin, ube eventis mikra posrenkontro.