Ido-konfero 1997

De Wikipedio
Salti al navigilo Irez a serchilo

Del 1ma til la 4ma di agosto eventis la Ido-konfero Internaciona 1997 en Bakkum, Nederlando. Bakkum esas plezanta vilajo en la nordo di la lando, sat proxim Amsterdam (la chef-urbo) ed anke Alkmaar, bela anciena urbo qua havas famoza fromaj-merkato. La partoprenanti venis de multa landi, inkluzanta Germania, Usa e Benin (Afrika). La konfero provizis l'okaziono por diskutar omna temi relatanta la *movemento, por renkontrar altra idisti de diversa landi, por praktikar la parolado di Ido, e por vizitar loki interesanti e konoceskar Nederlando.

Dum la posdimezo dil 1ma, l'asistanti recevis ne-expektita vizito da jurnalisti de jurnalo nacionala nederlandana. La jurnalisti fotografis la grupo, e questionis la organizanto, S-ro Hans Stuifbergen, ed altri pri Ido e pri la konfero. Artiklo aparis en la jurnalo "de Volkskrant" ye la 4ma, portanta la titulo "`Dwaze idealisten' vechten voor één wereldtaal". La konfero komencis per paroli da S-ro Hans Stuifbergen, organizanto di la konfero, ed anke da S-ro Günter Anton, prezidanto recente elektita di ULI. Li amba bonvenigis l'asistanti, e dicis ke omnu esis felica pro la evento di konfero en 1997, la ultempe unesma Ido-konfero qua eventis en Nederlando.

Ye saturdio e sundio l'asistanti partoprenis serioza ma amikala diskuti. La temo di la unesma kunsido esis: quale ni povas atraktar nova membri aden la Ido-*movemento? La prezidanto opinionis ke la unesma prioreso por la movemento es la plu-vastigado di nia linguo. Importanta avanci facesis en certena loki, exemple la rekruto di nova (e yuna) idisti en Britania ed en Nederlando. Esas anke nun mikra grupo de idisti en Benin, e reprezentanto Sioro Jean Codjo asistis la konfero. Esas tre kurijiganta ke Ido progresas en la "triesma mondo".

La uzo di la inter-reto ("internet") diskutesis. Esas nun sat multa inform-texti pri Ido en la angla linguo ye la inter-reto, ma desfortunoze nulo en altra lingui nacionala. Decidesis ke la inter-reto esas importanta medio por nia linguo, e konseque texti pri Ido en adminime la altra lingui reprezentita che la konfero devas provizesar tam balde kam posibla. Multa altra idei e posiblesi por pluvastigar la linguo sugestesis, ma trovar tote satisfacanta strategio por propagado esas tre desfacila.

La temo di la duesma kunsido, ye sundio, esis la linguo ipsa. Quale ni povas igar la procedo di selektar vorti plu demokratiala? Sugestesis ke voto-yuro devas atachesar a Progreso, por ke omna recevanto povez partoprenar la selekto di nova vorti e la faco di chanji en la linguo. L'asistanti opinionis ke la ideo esas sat bona, ma forsan esos problemi pro ke singla votanto devas konocar bone la strukturo di la linguo, quale la linguo kreesis, ed anke la procedo por adoptar nova vorti. La Direktanta Komitato deziras saveskar la opinioni di altra idisti pri ica ideo.

Ultre la kunsidi, l'asistanti povis vizitar la bela, anciena urbo Alkmaar, norde de Bakkum. Alkmaar esas famoza pro olua granda importanta fromajo-merkato. Anke li vizitis la chef-urbo, Amsterdam. Bakkum esas sat proxim la duni e la maro, e vizito ad oli anke aranjesis.

Forsan la maxim importanta profito di tala konferi esas ke li provizas por idisti l'okaziono renkontrar altra idisti de diversa landi, e praktikar la parolado di la linguo. Esis vere ne-kredebla ke tante poka problemi eventis kande homi de multa landi e kun diversa matrala lingui kunvenis. Mem ti qui tre recente lernis la linguo, o ne antee havis l'okaziono parolar en Ido, povis igar su komprenita experiencante sat poka desfacileso.

Extera ligilo[redaktar | redaktar fonto]