Ido-konfero 1998

De Wikipedio
Salti al navigilo Irez a serchilo

La internaciona Ido-konfero 1998 eventis de la 31ma julio til la 3ma agosto en BialobrzegiPolonia kun partoprenanti de kin europana landi ed Usa.  Pos la longa (por uli) voyajo, la partoprenanti salutesis da la prezidanto di ULI, qua prizentis projeto dil konfero-programo.

Pos saporoza dejuneto (same quale altra repasti, preparita da la koquisto di la konfero-centro) dum la matino dil unesma agosto komencis la unesma diskuti di nia konfero.  Unesme la prezidanto di ULI, Günter Anton e la konfero-organizero, Vlado Yakovenko salutis itere la partoprenanti, e la konfero oficale komencis.  Pos to la programo por la konfero decidesis.  La konfero recevis multa saluti de idisti e simpatizanti de multa landi, qui parlektesis da Günter Anton, Vlado Yakovenko, Alfred Neussner e Frank Kasper.

En l'unesma parto di nia diskuti ni diskutis pri nia experienci di sucesis pri plufortigar nia mikra movado depos la konfero en Bakkum.  La prezidanto di ULI povis prizentar pozitiva pikturo.  Il mencionis chefe tarelate la propagal suceso da Alfred Neussner, e la Ido-aktiveso en la interreto.  Dum la diskuti Frank Kasper unesme mencionis la ecelanta aktivesi da James Chandler kom administranto di "Idol" e da Martin Lavallée ed altri qui kreas nov ed interesiva Ido-pagini en la interreto, e lua vorti kompletigesis da Hans Stuifbergen.

Frank Kasper anke prizentis la rezulti di sua propra laboro en la interreto ed emfazis la importo di ta ankore yuna moyeno por nia Ido-movado.  Lore Alfred Neussner prizentis sua Ido-aktivesi.  Il parolis precipue pri sua konstanta uzado di okazioni publikigar gratuita anunci en jurnali e revui por propagar Ido od ofrar korespondar nur per la internaciona linguo Ido.  Il recevis multa respondi, a qui il respondis per sendar Ido-materio en la linguo dil sendinto.  Tale il ja sucesis interesar ula homi pri Ido, o mem ganar un o du por Ido.  Il propozis ad omna partoprenanti profitar ta posiblesi.

En la duesma parto dil sesiono, la hosti informis l'altra partoprenanti pri quale lia Ido-aktivesi povos sustenesar.  Nia polona amiki mencionis la desfacila financala situeso, pro quo partopreno en Ido-renkontri en exterlando esas tote neposibla por li.  Regretinde ULI ne havas la financial moyeni posibligar partopreno da est-europana idisti che Ido-konferi.  Pro to ni anke future pripensos aranjar konferi en est-europana landi, se ni volas inkluzar la est-europana idisti aktive en nia laboro por Ido.

Pos dejuno nia aranjis exkurso per publika autobuso al proxima urbo Radom, ube ni vizitis kirko e sorgis diversa personal bezoni.  Ye la triesma dio on aranjis tot-jorna vizito a la chefurbo di Polonia, Warszawa.  La partoprenanti vizitis la arti-centro ed anciena urbo.  Ante la departo dal partoprenanti ye 3ma agosto, dum la posdimezo aranjesis lasta kunsido, dum qua on diskutis la posiblesi por kunlaboro kun movementi por altra lingui, e laste esis linguo-seminaro pri diversa linguala problemi.

Pri la unesma punto esis dicenda, ke kunlaboro kun individua adheranti di altra movementi esas posibla, ma ne vere kun organizuri, ed aparte ne kun la Esperantisti.  Laste Günter Anton e Hans Stuifbergen facis finala diskursi kun specala danki a Vlado Yakovenko e lua amikino pro aranjir la konfero.

Rezume ni povas dicar, ke la partoprenanti en Bialobrzegi experiencis interesiva ed utila konfero, qua certe longe restos bona memoro che omna partoprenanti.