Melchior d'Hondecoeter
Melchior d'Hondecoeter (1636 - 3ma di aprilo 1695) esis nederlandana piktisto di animali, ilqua naskis en Utrecht e mortis en Amsterdam.
Pos la komenco di sua kariero, il piktis preske exkluzive ucelo-temi, normale exotika o vilda, en parkatra peizaji. La pikturi da Hondecoeter montras gansi (bernakli, egiptiana ganso e redpektora ganso), griza turdi, perdriki, kolombi, anadi, reda kardinal-uceli, pigi e pavoni, ma anke afrikana grizkrona grui, aziana redkola grui, indoneziana flavkresta kakatui, indoneziana purpurnuka lorii e grizkapa am-uceli de Madagaskar.
Biografio[redaktar | redaktar fonto]
La nepotulo dil piktisto Gillis d'Hondecoeter e filiulo di Gijsbert d'Hondecoeter, di qua la fratino Josina mariajesis kun Jan Baptist Weenix, il kreskis en artala medio. Lua kuzo Jan Weenix dicis ad Arnold Houbraken ke kom yuno Melchior esis extreme religioza, preginta lautege, tale ke lua matro ed onklulo dubitis ka li devas instruktar lu kom piktisto o pastoro.
En 1659, il laboris en Den Haag e divenis membro di Confrerie Pictura, la piktisto-akademio di ta urbo. En 1663, Hondecoeter mariajesis kun Susanne Tradel de Amsterdam. El lojis an la Lauriergracht; el evis triadek, tri yari plu olda kam ilu. La paro genitis du filii, baptita en 1666 e 1668. El esis supozeble kritikema, ed elua fratini lojis che la domo. Segun Houbraken, Hondecoeter pasis multa tempo en sua gardeno o drinkanta en la taverno en la Jordaan. An la Lauriergracht il cirkondesis da arto-komercisti e diversa piktisti. Pose il translojis a domo an la Leliegracht (proxim la nuna Anne Frank-Domo). En 1692, lua spozino mortis. Hondecoeter lojis che sua filiino Isabel en Warmoesstraat, ma enterigesis che la kirko Westerkerk. Il poslasis a sua fratino granda debi.
Hondecoeter entamis sua kariero per diferanta specaleso, nome il produktis maro-pikturi. Un ek lua frua verki esas Kuvo kun Fishi, de 1655, nun en la Herzog Anton Ulrich-Muzeo. Hondecoeter balde abandonis fishi favore uceli. Il aquiris famo kom piktisto di uceli nur, olquin il reprezentis ne exkluzive, quale Johannes Fyt, kom la profito dil chasogardisto pos pafo-jorno, o la stoko di pultrerio, ma kom vivanta enti kun pasioni, joyi, timi e disputi, qui segun naturalisti eventas anke che uceli. Sen la brilanta tono ed alta-qualesa finiso di Fyt, la uceli da Hondecoeter esas plena de agado; e, segun Burger, "Hondecoeter montras la matreso dil hanino per tam multa tenereso e sento kam Raphael la matreso di Madono." Ma Fyt, studento di Snyder, esis heme piktanta la furo di cervo ultre plumaro. Hondecoeter kontraste, rare preteriris han-kombato od ucelaro.
Verki[redaktar | redaktar fonto]
La verki da Melchior d'Hondecoeter ofte konsistas ek imaji di animali ed uceli. Lua ucelari influesis da Snijders e Jan Brueghel de Oude. D'Hondecoeter esis sucesoza piktisto, ma mustis anke konkurencar kun sua kuzo Jan Weenix, Dirk Valkenburg ed Adriaen van Olen. Il ofte laboris kun altra piktisti, qui exemple adjuntis planti a lua animaloportreti.
Kolekturi[redaktar | redaktar fonto]
Lua maestroverki esas en Den Haag, Soestdijk ed Amsterdam, ma esas ecelanta exempli en la Wallace-Kolekturo e Belton House en Anglia, ed en la publika galerii di Berlin, Budapest, Caen, Köln, København, Detroit, Dresden, Dublin, Firenze, Glasgow, Hannover, Karlsruhe, Kassel, London, Lyon, Lille, Montpellier, München, Paris, Poltava, Rīga, Rotterdam, Rouen, Stuttgart, Schwerin, Vaduz, Warszawa e Wien. La maxim granda expozo di Hondecoeter til nun eventis en Berlin en 2010, ube 18 verki lua expozesis che la Neue Nationalgalerie kom parto dil instaluro da Willem de Rooij 'Netolero'.