Michael Jackson

De Wikipedio
Michael Joseph Jackson
Profesiono: Kantisto, kompozisto e muzikala produktisto
Lando: Usa
Naskodato: 29 di agosto 1958
Nasko-loko: Gary, Indiana
Mortodato: 25 di junio 2009
Morto-loko: Los Angeles, Kalifornia, Usa
Retoloko: https://www.michaeljackson.com

Michael Joseph Jackson (1958 til 2009) esis Usana kantisto di r&b e pop, ed anke kompozisto e muzikala produktisto.

Biografio[redaktar | redaktar fonto]

Naskinta en Gary, Indiana Michael esis la 8ma de dek infanti. Ilua matro, Katherine Esther Scruse, esis devocoza de la testi di Jehova, e lua patro Joseph Walter "Joe" Jackson laboris en un fabrikerio. Michael havis 3 fratini: Rebbie, La Toya, e Janet, e 5 fratuli: Jackie, Tito, Jermaine, Marlon, e Randy[1]. Un ek lua fratuli, Brandon, mortis balde pos naskar[2].

En 1964 Michael e Marlon unionis a la grupo The Jackson Brothers - qua formacesis da lia fratuli Jackie, Tito e Jermaine - kom suport-kantisti e muzikisti. Evante 8 yari, Michael komencis dividar la precipua vokali dil grupo kun Jermaine, e la grupo rinomizesis The Jackson 5[1]. La grupo atingis suceso dum fino dil yari 1960a. Motown enrejistris l'unesma fonografuri del grupo.

En 1979 Quincy Jones produktis por Michael lua unesma disko solo, Off the Wall. Malgre la komercala suceso, Michael decidis superirar Off the Wall kun lua sequanta albumo, Thriller, de 1982. Thriller vendis plua kam 29 milion kopii en Usa e, til nun, plu kam 110 milion kopii mondale. En 1983 Michael rijuntis lua fratuli por homajar la 25 yari di Motown. La spektaklo prizentesis ye la 16ma di mayo 1983 e videsis per televiziono da 47 milion spektanti.

Pepsi, 1984 e komercala kariero[redaktar | redaktar fonto]

Ye la 27ma di januaro 1984 dum l'enrejistro di anunco por Pepsi, petardeto explozis ed incendiis la haro di Michael, qua subisis ekimoso en lua kranio-pelo. Jackson nulatempe rekuperis su komplete de ta acidento.

En 1985 ilu kompozis We Are the World kun Lionel Ritchie, por helpar la povri en Usa ed en Afrika. La muziko vendis plua kam 30 milion kopii, e ganis 4 Grammy la sequanta yaro.

En 1986 sensalismala jurnali lansis historio pri Michael dormir en hiperpresada oxa chambro. Quankam to esis mentio, la propra Michael dissemis ta rumoro[2]. La sequanta yaro, Michael lansis l'albumo Bad, qua vendis til 2008 30 milion kopii. En 1991 ilu lansis Dangerous, qua vendis 7 milion kopii til 2008.

En 1993 Michael Jackson akuzesis unesmafoye pri pedofilio. La sequanta yaro ilu mariajis sekrete kun Lisa Marie Presley, filiino di Elvis Presley. En 1995 ilu lansis l'albumo HIStory, qua vendis 20 milion kopii.[3]

En 2001 il lansis l'albumo Invincible. En 2003 ilu itere akuzesis pri pedofilio, ed absolvesis en 2005.

En marto 2009 Michael Jackson anuncis en London ke ilu facus serio di koncerti, nomizita "This is It", pri lua retroveno. La komencala ideo esis facir 10 koncerti en London, ed anke en Paris, New York e Mumbai. La koncerti komencus ye la 13ma di julio 2009 e finus ye la 6ma di marto 2010. Min kam 3 semani ante la komenco, Michael Jackson mortis pro kordial aresto en lua domo, ye la 25ma di junio 2009.

Referi[redaktar | redaktar fonto]

  1. 1,0 1,1 Michael Jackson: The Ultimate Collection George Nelson, 2004
  2. 2,0 2,1 Michael Jackson: The Magic, The Madness, The Whole Story, 1958-2009. J. Randy Taraborrelli, 2009
  3. http://www.msnbc.msn.com/id/15529981/