Olimpiala Ludi en Athina, 1896
L'Olimpiala Ludi en Athina (1896), od oficale la 1ma Olimpiala Ludi, esis internaciona poli-sportala konkurso, qua eventis ye 1896 en Athina, Grekia. Pro ke l’anciena Grekia esis la naskoloko di l'Olimpiala Ludi, Athina esis selektita kom eventeyo por l'unesma Olimpiala Ludi dum modern epoko.
Athina selektesis kom loko dum la kongreso en Paris ye 18 di junio 1894. Pierre de Coubertin, aranjinto di la kongreso, esis Franca aristokrato e historiisto, qua havis intereso pri korpala edukado en skoli e pri anciena Grekia.
La Ludi komencis ye 6 di aprilo. L’apertala ceremonio eventis ye la modernigita Panathinaiko Stadio (ube, en anciena ero, eventabis atletala konkursi). Ol asistesis da cirkume 80.000 spektanti, inkluzanta la Greka rejala familio. Muziko por l’okaziono esis pleata da plura grupi de muzikisti e kori. (Esis nula Olimpiala flamo, qua aparis unesmafoye en la Ludi ye 1928.) En sequanta dii esis eventi pri non sporti, inkluzanta biciklovehado, gimnastikado, teniso e pezajoelevado.
Malgre kelka obstakli, la Ludi esis konsiderita granda suceso. 241 atleti partopenis de 14 landi, ed esis 43 eventi de 9 sporti. Lo signifikis la maxim granda partopreno di internaciona atleti til ta yaro. La klozala ceremonio eventis ye 15 di aprilo 1896.
Kelka fakti [redaktar]
- Rejulo Georgios 1ma di Grekia apertis la Ludi. La rejulo dicis: Me deklaras l'aperturo di l'Unesma Internaciona Olimpiala Ludi en Athina. Longa vivo a la naciono. Longa vivo a la Grekiana populo.
- La ceremonio di aperto eventis en la dio di Grekiana nedependeso (4 di aprilo en Gregoriana kalendario, e 25 di marto en Juliana kalendario).
- John Pius Boland, Irlandana nacionalisto qua konkurencis por l'Unionita Rejio, esis la championo di teniso en la Ludi.
- En teniso por dui, l'esquadi esis formita da mixurita nacionalesi. La duo formita da Germaniana Friedrich Traun e Britaniana John Pius Boland vinkis la kontesto.
- La vinkinti ne recevis ora, ma arjenta medalii.
- Spiridon Louis divenis Grekiana heroo per lua vinko en la maratono.
- Usana atleto Thomas Burke vinkis la 100 metri kuro per tempo di 12 sekundi.
- Germania vinkis 5 de 8 konkursi di gimnastiko.
Medalii ganita [redaktar]
Hike esas la listo di landi qua ganis adminime 1 bronza medalio ye 1896.
| # | Lando | Ora | Arjenta | Bronza | Entote |
|---|---|---|---|---|---|
| 1 |  Usa |
11 | 7 | 2 | 20 |
| 2 |  Grekia |
10 | 17 | 19 | 46 |
| 3 |  Germania |
6 | 5 | 2 | 13 |
| 4 |  Francia |
5 | 4 | 2 | 11 |
| 5 |  Unionita Rejio |
2 | 3 | 2 | 7 |
| 6 |  Hungaria |
2 | 1 | 3 | 6 |
| 7 |  Austria |
2 | 1 | 2 | 5 |
| 8 |  Australia |
2 | 0 | 0 | 2 |
| 9 |  Dania |
1 | 2 | 3 | 6 |
| 10 |  Suisia |
1 | 2 | 0 | 3 |
| 11 |  mixurita esquadi |
1 | 1 | 1 | 3 |
| Totali | 43 | 43 | 36 | 122 | |
