Ido-konfero 1924
Quaresma Ido-konfero eventis depos 9ma til 12ma di agosto 1924 en Luxemburg, la chef-urbo di Luxemburgia. Preske 300 partoprenanti venis de cirkume 15 landi.[1]
La konfero apertesis grandioze en saturdio. Nemediate komencis la negociado. La debatinda aferi koncernis Ido relate skolo ed Ido relate radio.
En sundio esis meso e prediko per Ido en klostro-kirko dil Redemptist-ordeno. Posdimeze eventis oficala aceso di konferani che l'urbestro, ecelenco Dietrich. La dio finis, sen plusa negociado, per publika diserti da Idisti de diferanta landi. Tale Idisti demonstris l’apteso di la internaciona linguo e la desfacila komprenebleso mem por la ne-Idisti.
En lundio duris la negociado. On organizis anke exameno por la personi, qui volis havar la docero-diplomo de Ido-Akademio. La konfero finis en mardio.
Dum la konfero esis longa diskuti pri chanjar la simbolo di Ido, la Ido-stelo. Finfine la konfero decidis retenar la olda insigno. [2]
La centrala Ido-revuo Mondo evaluis la konfero en Luxemburg tre negative: "Vu konkluzos ipse de mea raporti, ke mea generala impreso ne esis la maxim bona. Nula partopreno dil Lx. publiko e jurnalaro, tro poka kongresani, tro poka tempo por traktar ka maxim importanta questioni, ne sat bona preparo dil kongreso pro manko di nia centrala revuo, absenteso di kelka guideri, ex. Ahlberg - omna to karakterizas la kongreso kom ne-sucesinta." [3]
Kontree la organo di Suisiana Idisti Ido konstatis: "La kongreso sucesis ecelante. Ye la quaresma foyo pruvesis, ke per Ido on ne povas nur komprenigar su skribe, ma anke parole." [4]
.svg)