Bakersfield, Kalifornia

De Wikipedio
Jump to navigation Jump to search
La Bakersfield-Arko

Bakersfield esas urbo en KaliforniaUsa, e la sideyo dil komtio Kern.

Ol kovras c. 370 km2 proxim la suda extremajo di San Joaquin-Valo e la Centrala Valo-regiono.  La habitantaro di Bakersfield esas c. 365.000, pro quo ol esas la nonesma maxim populoza urbo en Kalifornia, e la 52ma maxim populoza urbo en Usa.

La Metropolo Bakersfield-Delano, quo inkluzas tota komtio Kern, havis en 2010 habitantaro de 839.631, tale ol esas la 62ma maxim granda metropolo en Usa.   La plu dense urbana areo qua inkluzas Bakersfield ed arei nemediate cirkum la urbo, quala East Bakersfield e Rosedale, havas habitantaro de c. 464.000.

La urbo esas signifikanta nabo por agrokultivo ed oleo-produkto.  Komtio Kern esas la maxim produktiva oleo-produktanta komtio, e la quaresma maxim produktiva agrokultivala komtio (segun valoro) en Usa.  Industrii inkluzas naturala gaso ed altra energio-extrakto, aerospaco, minado, petrolo-rafino, fabriko, distributo, nutrivo-procedo, e korporacionala/regionala chefkontori.   La urbo esas anke la naskeyo dil jenro di country-muziko, la Bakersfield-Sono.

Historio[redaktar | redaktar fonto]

Centrala Bakersfield

Arkaeologiala trovaji indikas la prezenteso di Aborijena Usana kolonii mili de yari ante nun.  Le Yokut habitis en dometi alonge la branchi dil Kern-Rivero-Delto e chasis antilopi, tule-alko, cervi, ursi, fishivild-uceli.  En 1776, hispana misionero Francisco Garcés kom unesma europano exploris la regiono.  Pro la foreso e neacesebleso dil regiono, tamen, le Yokut restis izolita til pos la Mexikiana Milito di Nedependo, kande mexikiana koloniani migreskis adibe.

Pos la deskovro di oro en Kalifornia en 1848, homi inundis San Joaquin-Valo.  En 1851, oro deskovresis alonge rivero Kern en suda Sierra Nevada, ed en 1865, oleo deskovresis en la valo.  La Bakersfield-areo, olim kanoza marsho, nomizesis Kern-Insulo da la manuedo de pioniri qui konstruktis ligna kabani ibe en 1860.  La areo periodale inundesis da rivero Kern, quo jacis en la nuna urbo-centro, ed experiencis erupti de malario.

En 1862, dizastrala inundi forbalayis la originala kolonio fondita en 1860 da la germano Christian Bohna.  Inter ti atraktita al areo da la Oro-Chaso di Kalifornia esis Thomas Baker, legisto ed olima kolonelo en la milico di Ohio, lua hem-stato.  Baker translojis a la rivi di rivero Kern en 1863, en loko nomizita Baker's Field, eskalo por voyajanti.  En 1870, kun 600 habitanti, nuna Bakersfield divenis la precipua urbo en komtio Kern.

En 1873, Bakersfield oficale municipeskis, ed en 1874 oficale remplasis la mortanta urbo Havilah kom komtio-sideyo.  Alexander Mills engajesis kom urbo-marshalo, viro deskriptita da historiisto kom "... oldulo tatempe, il marchis per bastono.  Ma il esis Kentuckyano, habila kun fusilo, e ne indijas iniciemeso e resurso kande lu volas."   Komercisti ed altri ofensesis da Mills, qua esis disputema ed aroganta vers li.  Dezirinte desengajar lu ma timinta, li konceptis la ideo desmunicipeskar, lasinte lu sen employero.  Segun lokala historiisto Gilbert Gia, la urbo anke faliis kolektar la imposti bezonita por servi.  En 1876, la urbo votis por desmunicipesko.  Dum la nexta 22 yari, civitanala konsilistaro jeris la komuneso.

En 1880, la urbo havis 801 habitanti, ed en 1890, 2626. Migrado de TexasLouisianaOklahoma e Suda Kalifornia adportis nova rezidanti, qui ofte employesis en la oleo-industrio.

Geografio[redaktar | redaktar fonto]

Panoramo di Bakersfield

Bakersfield jacas proxim la suda "kavalofero"-extremajo di San Joaquin-Valo, kun la Sierra Nevada este.  La urbo-limiti extensesas til la Sequoia Nacionala Foresto, ye la bazo dil Greenhorn Monto-kateno e la enireyo di Kern-Ravinego.  Sude, en la Tehachapi-Monti esas la historiala Tejon-Rancho.  Weste esas la Temblor-montaro, e dop to esas Carrizo Plain National Monument e San Andreas-Fenduro.  La Temblor-montaro esas c. 56 km de Bakersfield trans la valo.

La urbo havs areo de 372 km2, ek quo 368 km2 esas tero (98,99%) e 3,6 km2 esas aquo (1,01%).

Bakersfield jacas c. 160 km norde de Los Angeles (c. 1½ hori per I-5 e Stato-Voyo 99) e c. 480 km sudeste de la stato-chefurbo Sacramento (c. 4½ hori per Stato-Voyo 99).

Vicineyi[redaktar | redaktar fonto]

Bakersfield historiale referas sua regioni per busolala nomi.  Li inkluzas: North Bakersfield, Northeast, Southeast, South Bakersfield, Southwest, e Northwest.  East Bakersfield generale referas la olima urbo Sumner (pose rinomizita East Bakersfield).  Rezulte, Northeast envolvas East Bakersfield.

Kulturo[redaktar | redaktar fonto]

Fox Theater

Multa de la maxim olda e historiala restorerii en Bakersfield esas Baskiana, inkluzanta Woolgrowers, Noriega's, Pyrenees, Benji's e Narducci's.

La Muzeo di Komtio Kern, situita en Chester Avenue norde de centrala Bakersfield havas kolekturo de regionala trovaji.  Permananta expozi inkluzas: "Black Gold: The Oil Experience", pri oleo-extrakto; la "Lori Brock Children's Discovery Museum", muzeo por pueri; ed expozo pri la influiva "Bakersfield-Sono" (stilo de country-muziko).  Bakersfield esas anke la hemo di la Buena Vista Muzeo di Naturala Historio, quo havas kolekturo de marala fosili de la Mioceno de la regiono.

La urbo famozeskis dum la tarda 1950a e frua 1960a pro la Bakersfield-Sono, elektro-gitarala subjenro di country-muziko qua komercale dominacis la industrio dum plu kam yardeko.  Buck Owens, Dwight Yoakam e Merle Haggard esis la maxim famoza steli.

Bakersfield havas kin multa-skrena cimeni: Edwards Bakersfield Stadium 14, Reading Cinemas Valley Plaza 16, Maya Cinemas Bakersfield 16, e Regency Theatres East Hills 10.  Esas anke duesma-pleo-cinemo; Starplex Cinemas 6.  La historiala Fox Theater rinovigesis, ed esas nun loko por koncerti, muzikisti, komedieri, e filmi.