Historio di Maldivi

De Wikipedio

Segun studii di la linguo e la kulturo di Maldivi, lua unesma habitanti esis Dravidiana populi[1] de Tamil Nadu qui establisis su en l'insuli de cirkum 300 aK til la yaro 300. La maxim frua skribita historio di Maldivi markizesas da l'arivo di la decendanti dil princo Vijaya, de Sinhalana raso. Li arivis en Maldivi ulatempe inter 543 e 483 aK. Lia arivo adportis importanta modifiki en la kulturo ed en la developo di la regiono, ed anke en la developo di la linguo Dhivehi, qua esas simila en gramatiko e fonologio a la linguo Sinhala.

Budista Stupa (templo) konstruktita en l'insulo Gan.
Plako en la moskeo Juma, kun la nomo di Yusuf Tabrizi. Segun legendo, ilu konvertis l'insuli a islamo.

Budismo adportesis al insuli en la 3ma yarcento aK, dum la rejio di imperiestro Ashoka. Ol divenis la precipua religio dil insuli til la 12ma yarcento, kande islamo introduktesis en la regiono adportita dal Araba komercisti. Notora Marokana historiisto Ibn Batutta vizitis l'insuli dum la 14ma yarcento, e skribis ke un berbero, Abu Barakat, supozite dissemis islamo en l'insuli.

Mapo de la 18ma yarcento kun l'atoli qui formacas Maldivi.

En 1558 Portugalani establisis mikra garnizono en l'insuli e guvernis ol de Goa, ma pos 15 yari, Muhammad Thakurufaanu Al-Azam ekpulsis Portugalani. Dum meze 16ma yarcento, Nederlando remplasis Portugal kom komercala povo en la regiono. En 1796 Britaniani ekpulsis Nederlandani de vicina Ceylon ed inkluzis Maldivi en lua areo di influo.

Britanian aviono en Maldivi dum la duesma mondomilito.

Quankam Maldivi restis nedependanta sultanio de 1153 til 1968, en 1887 Britaniani transformis ol oficale en protektorato. En 1953 on probis transformar l'insuli en republiko, kun Muhammad Amin Didi kom prezidanto, ma sultanio riestablisesis. En 1959 habitanti di tri atoli revoltis e formacis Unionita Republiko di Suvadiva Insuli, ma la revolto faliis en 1963. Ye la 25ma di julio 1965 Maldivi divenis nedependanta de l'Unionita Rejio.

Ye la 11ma di decembro 1968 sultanio abolisesis e Maldivi divenis republiko, kun Ibrahim Nasir kom prezidanto. En 1978 Maumoon Abdul Gayoom remplasis Nazir en povo kom elektita prezidanto. Il rielektesis 6 foyi e guvernis lando dum 30 yari sen opozanti.

Violenta ondego devastis Maldivi la 26ma di decembro 2004 pos ter-tremo en Indiana oceano. Nur 9 insuli eskapis de inundadi. En 2008 eventis elekto e Mohamed Nasheed, opozanta a Gayoom, vinkis e divenis prezidanto. Ye la 7ma di februaro 2012 Nasheed renuncis. Pose ilu deklaris a stranjera jurnalaro ke ilu revokesis per stato-stroko komandita dal viceprezidanto Mohammed Waheed Hassan. En 2013 itere eventis elekti por prezidanteso, e Abdulla Yameen Abdul Gayoom, fratulo di Maumoon Abdul Gayoom, vinkis.

Referi[redaktar | redaktar fonto]