Historio di Indonezia

De Wikipedio
Irez ad: pilotado, serchez
Kranio di Homo di Java.

Fosila skeleti di Homo di Java indikas ke l'insuli di Indonezia ja habitesis 1.5 milion yari ante nun. Homo sapiens arivis en l'insuli cirkum 45,000 yari ante nun.[1] Austroneziana populi migris a la regiono cirkum 2000 aK de Taiwan. Li ekpulsis l'originala Melaneziana populi vers l'estala insuli[2] e establisis komerco kun Chinia.

Indoneziana navo en Borobodur, cirkum la yaro 800.

Quala altra regioni de sud-est-Azia, Indonezia sufris influi de Indiana kulturo. De la 2ma til la 12ma yarcento Pallava dinastio, Gupta imperio, Pala imperio e Chola imperio sucedante dissendis Indiana influo tra l'arkipelago. Sanskrita skriburi mencionas Dvipantara o Yawadvipa, Hindua rejio en Java e Sumatra, qua existis cirkum la yaro 200.

rejio di Srivijaya.

Dum la 7ma yarcento povoza rejio di Srivijaya prosperis e portis l'influi di hinduismo e budismo ad l'insuli. La maxim ancien evidentaji di islamana religio datizas de la 13ma yarcento en Sumatra. Altra regioni gradope adoptis islamo, quo divenis la precipua religio en Java e Sumatra dum la fino di la 16ma yarcento.

L'unesma Europani en la regiono esis la Portugalani, qui arivis unesmafoye en 1512. Li atemptis monopoligar la komerco di muskado, kariofilo e kubebo. En 1602 nederlandani establisis West-India Kompanio (VOC) e divenis la dominanta potenco. Kun la bankroto di la kompanio en 1800, Nederlandana guvernerio establisis la kolonio di Nederlandana West-Indii.

Dum granda parto di la kolonial epoko, Nederlandana kontrolo super l'arkipelago esis febla, e nur en la 20ma yarcento la dominacajo divenis plu forta til atingar tota la nuna teritorio di lando. Ye la 17ma di decembro 1941 Japonia komencis okupar Indonezia, e l'okupeso lastis til la fino di Duesma mondomilito. En 17 di agosto 1945, du dii pos la kapitulaco di Japoniana trupi, Sukarno deklaris Indonezia nedependanta de Nederlando e divenis lua unesma prezidanto. Nederlando atemptis riprenar kontrolo di la teritorio, e la rezultanta milito por la nedependo di Indonezia lastis til 1949. Internaciona preso forcis Nederlando agnoskar la nedependo ecepte por Nova-Guinea. Nur en 1962 per konvenciono signatita en New York, Nederlando cedis Nova-Guinea ad Indonezia.

Prezidanto Sukarno.

Sukarno movis Indonezia de la demokratio vers autoritatema rejimo, ed equilibris lia povo inter l'armeo e la komunista partiso di Indonezia. En 30 di septembro 1965 l'armeo sufokis atempto di stato-stroko, blamis la komunisti por l'atempto, e komencis violenta purgo. On kalkulas ke plu kam 500,000 personi mortis dum la purgo, qua lastis til la sequanta yaro. La komandanto di la purgo, generalo Suharto, renversis Sukarno e divenis la chefo di stato en 1968. En 1975 Indonezia okupis Timor-Leste, ex-Portugalana teritorio, ed atemptis transformar ol en lua teritorio.

La rejimo di Suharto, kun la suporto di Usa, lastis til 1998, kande la forta financala krizo produktis violenta populala protesti e forcis ilu renuncar. En 1999 la majoritato dil habitanti di Timor-Leste votis en referendo favorebla a la nedependo. Balde, grupi favorebla a l'uniono kun Indonezia komencis masakri kun skopo di timidigar la habitanti e forcar Indoneziana interveno, ma trupi de Unionita Nacioni okupis Timor-Leste e kontrolis la situeso.

En 2004 por la unesma foyo la habitanti di Indonezia elektis direte lua prezidanto.

Referi[redaktar | edit source]

  1. Smithsonian (2008). The great human migration.
  2. Taylor, Jean Gelman. Indonesia. New Haven and London: Yale University Press. pp. pp.8-9.