Guatemala-Urbo

De Wikipedio
Irez ad: pilotado, serchez
Guatemala-Urbo
Montage Ciudad de Guatemala.jpg
Kelk imaji pri Guatemala-urbo.
Bandera de la Ciudad de Guatemala.svg Escudo de Armas Ciudad de Guatemala.jpg
Flago di Guatemala-urbo
Ciudad de Guatemala
Blazono di Guatemala-urbo
Ciudad de Guatemala
Lando: Flag of Guatemala.svg Guatemala
Informo:
Latitudo: 14º37'22” N
Longitudo: 90º31'53” W
Altitudo: 1500 m
Surfaco: 996 km²
Habitanti: 2 149 107 (2014)
Denseso di habitantaro: 1153.71 hab./km²
Horala zono: UTC-6
Urbestro: Álvaro Arzú Irigoyen
Mapo:
Mapo di Guatemala-Urbo
Oficala retosituo:
www.muniguate.com


Guatemala (kompleta nomo: La Nueva Guatemala de la Asunción) esas chef-urbo e maxim grand urbo di Guatemala. L'urbo esas la politikala e kulturala centro di la lando. Ol jacas en montoza valo centre-sude de Guatemala, e havas vasta verda regioni.

Historio[redaktar | redaktar fonto]

Skultita kapo da le Maya, trovita en Kaminaljuyu.

L'urbo fondesis ube ante existis Maya urbo Kaminaljuyu. Kaminaljuyu komence okupesis de 1200 til 1000 aK, e duris esar habitita dum la sequanta 2.000 yari, ante abandonesar dum la klasik-epoko di Mezoamerika (600 til 900 pos Kristo). La centro di l'anciena kolonieto Maya distas poke de la nuna Guatemala-urbo.

Altra tri urbi recevis la nomo "Guatemala" ante la nuna. L'unesma, nune konocita kom Antigua Guatemala (Santiago de los Caballeros) fondesis ye la 25ma di julio 1524[1] e subisis ataki dal indijeni dum la sequanta tri yari. La duesma, nune konocita kom Ciudad Vieja fondesis ye la 22ma di novembro 1527 dal Hispana conquistador Pedro de Alvarado proxim la volkano Volcán del Agua. Alvarado mortis ye la 4ma di julio 1541.[1] Dum la nokto de la 10ma til 11ma di septembro 1541 l'urbo subisis granda terkrulato, qua mortigis la vidvo di Alvarado, Beatriz de la Cueva, qua administris l'urbo pos lua morto.[1]

La triesma Santiago de los Caballeros (Antigua Guatemala) fondesis ye la 10ma di marto 1543 en la valo Panchoy, ed esis chef-urbo dil Rejio ed Audienco di Guatemala dum la sequanta 223 yari, til esar destruktita pro ter-tremo ye la 29ma di julio 1773, en qua mili di personi perisis.[1] Pos du-yara diskuti, l'urbo rifondesis ye la 2ma di januaro 1776 en lua nuna situo. Ye la 23ma di mayo sam yaro, rejulo Carlos la 3ma di Hispania baptis ol kun la nomo Nueva Guatemala de la Asunción.[1]

Teatro Carrera.

Guatemala-urbo esis la loko ube la nedependo di l'Unionita Provinci di Central Amerika proklamesis, ye la 15ma di septembro 1821. Dum la yari 1850ma, lor prezidanto Rafael Carrera y Turcios inauguris la Nacionala Teatro, anke konocita kom Teatro Carrera, an la centro dil urbo. L'urbo komencis expansar sude pos 1871.

Ye la 18ma di aprilo 1902 forta ter-tremo frapis l'urbo e produktis 800 til 900 morti. La sam yaro ye la 24ma di oktobro volkano Santa María eruptis, e produktis cirkume 5.000 morti.[2] Felipe Yurrita, richa kafeo-kultivisto, konstruktis la kirko di Nia Siorino dil Angori (Nuestra Señora de las Angustias, anke konocita kom "kirko Yurrita") en gratitudo pro ke ilu ne perisis dum l'erupto.

Dum l'administrado dil prezidanto Manuel Estrada Cabrera konstruktesis multa publika edifici en la bulvardo 30 de Julio, exemple la hospitalo por mulieri gravida Joaquina e la Milital Akademio, en 1912. Tamen, l'urbo subisis diversa ter-tremi qui komencis ye la 17ma di novembro 1917 e duris til la 24ma di januaro 1918. La ter-tremi destruktis multa anciena kirki e publika edifici, e stimulis severa kritiki kontre Estrada Cabrera pri la manko di efikiva agadi por rikonstruktar l'urbo.

Originala edifico dil aeroportuo La Aurora, 1940.

En 1923 komencis la konstruktado dil aeroportuo La Aurora. Dum la yari 1930ma membri di la elito komencis konstruktar lia domi en la bulvardo 30 de Julio. Dum l'administrado di Jorge Ubico Castañeda la posto e l'internaciona aeroportuo La Aurora, inter altra edifici, kompleteskis.

Pos la revoluciono di 1944 la habitanti recevis yuro pri votar por urbestro. L'unesma elektita urbestro, Mario Méndez Montenegro (1946-1948), ampligis la reto di drinkebla aquo e la sistemo di kloaki. En 1951 Guatemala-urbo ja havis cirkume 250 mil habitanti.

Ye la 4ma di februaro 1976 ter-tremo kun forteso 7.5 che skalo di Richter frapis Guatemala e produktis 23.000 morti e 77.000 vunditi serioze en 30.000 km²-a zono cirkum la urbo. En 1980 e 1981 eventis diversa bombal ataki dal gerileri* en l'urbo.

De la 29ma til la 30ma di mayo 2010 l'urbo subisis severa inundadi dum la tropikala tempesto Agatha, qua anke produktis tri morti. Ante, ye la 27ma di mayo sam yaro komencis l'erupto dil volkano Pacaya, qua produktis du morti e koaktis klozar l'aeroportuo La Aurora dum kin dii.

Geografio[redaktar | redaktar fonto]

Volkani Agua, Fuego ed Acatenango, proxim l'urbo.
Katedralo Metropolita di Guatemala.

Guatemala-urbo jacas en la valo Ermita, kun altitudi inter 1.500 e 1.600 metri super marala nivelo. Malgre ol jacas en tropikala zono lua klimato esas subtropikala, pro l'influo dil altitudo. La pluvoza sezono eventas de mayo til novembro, dum ke la sika sezono eventas de decembro til aprilo. La mezavalora temperaturo dil urbo esas 21ºC.

L'urbo dividesas en 22 zoni, projetita dal injenioro Raúl Aguilar Batres. Altra tri zoni nune esas parti de vicina urbi. Singla zono havas lua propra stradi ed avenui. En la zoni 1, 2 e 3 jacas inter altri la historiala centro dil urbo, muzei (exemple l'Arkidiocezala Muzeo e l'Arkeologiala Muzeo), la katedralo, la Nacionala Palaco, e la nacionala biblioteko. En la zono 10 jacas la botanika gardeno, la Muzeo Popol Vuh (kun objekti de Maya kulturo) e l'universitato Francisco Marroquín.

Lua metropolala regiono konsistas ek Guatemala-urbo propre e la vicina urbi Villa Nueva, San Miguel Petapa, Mixco, San Juan Sacatepequez, San José Pinula, Santa Catarina Pinula, Fraijanes, San Pedro Ayampuc, Amatitlán, Villa Canales, Palencia, e Chinautla.

Urbala panoramo di la quartero Zona 14.
Urbala panoramo di la quartero Zona 14.

Fratala urbi[redaktar | redaktar fonto]

Urbo Lando Yaro
Caracas Flag of Venezuela.svg Venezuela 1969
San Salvador Flag of El Salvador.svg Salvador 1979
Madrid Flag of Spain.svg Hispania 1983[3]
Lima Flag of Peru.svg Peru 1987
Santiago de Chile Flag of Chile.svg Chili 1991
Saltillo Flag of Mexico.svg Mexikia 1993
Havana Flag of Cuba.svg Kuba 1997
Bogota Flag of Colombia.svg Kolumbia 1997
San Pedro Sula Flag of Honduras.svg Honduras 1999
Santa Cruz de Tenerife Flag of Spain.svg Hispania 2002
San Jose Flag of Costa Rica.svg Kosta Rika 2005
Ciudad de Panamá Flag of Panama.svg Panama 2005
Taipei Flag of the Republic of China.svg Taiwan 2007[4]
Managua Flag of Nicaragua.svg Nikaragua 2008
Beijing Flag of the People's Republic of China.svg PR Chinia 2009

Referi[redaktar | redaktar fonto]

  1. 1,0 1,1 1,2 1,3 1,4 Fundación de la Antigua Guatemala (Santiago de los Caballeros) - Historia de Guatemala (en Kastiliana). URL vidita ye la 4ma di marto 2015.
  2. (oktobro 2013). Cuando el día se volvió noche; La erupción del volcán Santa María de 1902. Revista Estudios Digital, No. 1, Guatemala. URL vidita ye la 7ma di novembro 2014.
  3. Mapa Mundi de las ciudades hermanadas. Ayuntamiento de Madrid. URL vidita ye la 25ma di julio 2009.
  4. Sister Cities. Taipei City Council. URL vidita ye la 23ma di agosto 2013.