Managua

De Wikipedio
Irez ad: pilotado, serchez
Managua
Managua, Nicaragua.jpg
Kelk imaji pri Managua.
Flag of Managua.svg Escudo de Managua.svg
Flago di Managua Blazono di Managua
Lando: Flag of Nicaragua.svg Nikaragua
Departmento: Managua
Informo:
Latitudo: 12°8'11"N
Longitudo: 86°15'5"W
Altitudo: 83 m
Surfaco: 289[1] km²
Habitanti: 2 101 087[2] (2010)
Horala zono: UTC-6
Urbestro: Daisy Torres
Mapo:
Mapo di Managua
Oficala retosituo:
www.managua.gob.ni

Managua esas chef-urbo e maxim grand urbo di Nikaragua, e la 2ma maxim populoza urbo de Central-Amerika. Ol esas la maxim importanta urbo industriala, komercala, kulturala, e centro por telekomuniki de Nikaragua.

L'origino di lua nomo esas Nahuatl-vorto Mana-ahuac, qua signifikas "cirkum l'aquo".

Historio[redaktar | redaktar fonto]

Anciena indijena kulturi habitis la regiono di Managua de adminime 12.000 yari aK. Managua fondesis en 1819 kun la nomo Leal Villa de Santiago de Managua. Ol divenis Nikaraguana chef-urbo pos William Walker destruktar Granada en 1857.

Managua en 1849.

De 1852 til 1930 l'urbo kreskis e lua substrukturo plubonigesis. En 1876 e 1885 eventis severa inundadi. En 1931 eventis forta ter-tremo ed en 1936 eventis granda fairo. Dum la guvernerio di Anastasio Somoza García e lua familio (1936 til 1979) l'urbo rikonstruktesis e komencis kreskar rapide. Nova guvernala edifici e nova industrii konstruktesis, e nova universitati inauguresis, ma la progreso haltesis kande ye la 23ma di decembro 1972 eventis nova forta ter-tremo, qua destruktis 90% del centro dil urbo e mortigis plua kam 19.120 personi.[3] Lokala substrukturo subisis serioza domaji, e la korupto dil rejimo di Somoza atribuis altra uzi por l'internaciona fundi qui uzesus por rikonstruktar l'urbo.

Nikaraguana revoluciono en 1979 revokis la rejimo di le Somoza, ma balde komencis 11-yara interna milito kontre le Contras, qui recevis pekuniala ed armeala helpo de Usa. Pos ke la partiso Unión Nacional Opositora — UNO vinkis l'elekti en 1990 la milito finis, tamen ol efektigabis granda destruktado e mortigabis mili di personi. Por facar la situeso plu mala, diversa naturala dizastri eventis pose, exemple l'uragano Mitch en 1998.

Gradope, plua kam 300.000 Nikaraguani retroiris a Managua pos finar la milito. Li portis kapitalo e konoco por entraprezar, l'aferi prosperis, nova domi e skoli konstruktesis, l'aeroportuo expansesis, stradi larjigesis e nova komerceyi inauguresis o subisis expanseso. En 2006 pos FSLN riganar povo la sistemi di saneso, eduko e rikonstrukturo dil urbo recevis nova koloki.

Geografio[redaktar | redaktar fonto]

Laguno Tiscapa.

Managua jacas inter du lagi, an la sudala rivo dil lago Xolotlán, anke konocita kom lago Managua, en mezavalora altitudo di 85 m. Lago Xolotàn kontenas la sama speci di fishi kam la lago Cocibolca qua jacas sud-este de la lando, ecepte la sharko qua vivas nur en la lasta. Lago Managua subisabas l'efekti di poluto de 1927 til nun. Kande l'uragano Mitch frapis Nikaragua en 1998, l'aqui del lago Managua inundis kelka regioni del urbo. Existas 4 laguni interne la limiti del urbo, esante la laguno Tiscapa la maxim proxima del centro di Managua.

Sude del urbo l'altitudo dil urbo kreskas proxim la montoza regiono nomizita Sierras de Managua. Geologiale, l'urbo jacas super rokofenduri, e ciencisti previdas ke forta ter-tremi eventus singla 50 yari, o min.

La klimato dil urbo esas tropikala, kun mezavalora temperaturi inter 28ºC e 32ºC, ecepte proxim le Sierras. La sika sezono eventas de novembro til aprilo, dum ke la pluvoza eventas de mayo til oktobro. La maxim alta temperaturi eventas dum marto ed aprilo, ante komencar la pluvoza sezono. La mezavalora yarala pluvozeso esas 1.200 mm. La vejetantaro proxim l'urbo esas richa, kun kelka endemika speci.

Ekonomio[redaktar | redaktar fonto]

Centrala quartero di Managua.
L'aeroportuo Augusto C. Sandino.

Managua esas l'ekonomiala centro di Nikaragua, kun variita servadi ed industrii. Plurnaciona kompanii, exemple Wal-Mart, Telefonica, Union Fenosa e Parmalat havas kontori ibe. Dum recenta yari, moderna komercala centri konstruktesis ibe.

Lua precipua industriala produkturi esas biro, kafeo, farmaciala produkturi, texuri, pedovesti, alumetobuxi, produkturi por konstruktado, edc. La precipua komercala produkturi esas karno, kafeo, kotono ed altra rekoltaji. En Managua anke jacas la sideyi di tota banki de Nikaragua: Banco de la Producción (BANPRO), Banco de América Central (BAC), Banco de Finanzas (BDF) e Banco de Crédito Centroamericano (Bancentro).

En l'urbo jacas l'Aeroportuo Internaciona Augusto C. Sandino, la precipua de Nikaragua. La Tot-Amerikala Choseo (Vía Panamericana), qua ligas Usa a Panama, trairas Managua.

Fratal urbi[redaktar | redaktar fonto]

Managua esas fratala urbo di:[4]

Referi[redaktar | redaktar fonto]

  1. Información territorial de Managua
  2. what is the population of managua, nicaragua? - Wolfram|Alpha. Wolframalpha.com. URL vidita ye la 12 di marto 2013.
  3. Deadly history of earthquakes: 23 December 1972 (en Angla). BBC News. URL vidita ye la 19ma di agosto 2007.
  4. Hermandad o convenios con otras ciudades. URL vidita ye la 7ma di aprilo 2015.