Kontrato pri libera komerco
Un kontrato pri libera komerco esas regionala o bilaterala komercala kontrato kun skopo di ampligar la merkato por komercaji e servadi inter le partoprenanta landi. Fundamentale ol konsistas ek l'elimino di doganotaxi por produkti komercita inter ta landi. La kreado di un kontrato pri libera komerco esas konsiderata la duesma etapo di un proceso di ekonomiala uniono.
Diferanta de dogan-uniono, en le kontrati pri libera komerco ne esas necesa un komuna exterala dogano-taxo. Por evitar l'eludo di imposti, landi kreas ed uzas l'atesti di origino, ed establisas la minim grado di lokala material adportaji e lokala transformi qua mustas esar adicionita a un produkto por konsiderar su kom nacionala o regionala. Se un produkto ne havas ta minim grado, ol esas konsiderita exterala produkto, submisita a dogano-taxi.
Kelka kontrati pri libera komerco[redaktar | redaktar fonto]
- Centr-Europana Kontrato pri Libera Komerco, inter Albania, Bosnia e Herzegovina, Kroatia, Norda Macedonia, Moldavia, Montenegro, Serbia e Kosovo.
- Kontrato pri Libera Komerco di Nord-Amerika (NAFTA), inter Usa, Kanada e Mexikia.
- Karibiana Komunitato (CARICOM), inter Antigua e Barbuda, Bahama, Barbados, Belize, Dominika, Grenada, Guyana, Haiti, Jamaika, Montserrat, St Kitts-Nevis, St Lucia, St Vincent e Grenadini, Surinam, e Trinidad e Tobago.
- Europan Asociuro por Libera Komerco (EALK; en Angliana EFTA), inter Islando, Liechtenstein, Norvegia e Suisia.