Bahama

De Wikipedio
Salti al navigilo Irez a serchilo
Bahama
Commonwealth of The Bahamas
Flag of the Bahamas.svg Coat of arms of the Bahamas.svg
Standardo di Bahama Blazono di Bahama
Nacionala himno:
March On, Bahamaland
LocationBahamas.svg
Urbi:
Chefurbo: Nassau
· Habitanti: 260 000 (2008)
Precipua urbo: Nassau
Lingui:
Oficala lingui: Angla
Guvernerio:
Tipo: Monarkio
· Rejino: Elisabeth la 2ma
· Chefministro: Hubert Minnis
Surfaco: (160ma granda)
· Totala: 13 878 km²
· Aquo: 28 %
Habitanti: (179ma granda)
· Totala: 391 232[1] (2016)
· Denseso di habitantaro: 25,21 hab./km²
Plusa informi:
Valuto: Dolaro di Bahama
Veho-latero: sinistre
ISO: BS
BHS
044
Reto-domeno: .bs*
Precipua religio: kristanismo (92,3%)
Oficala retosituo: https://www.bahamas.com/


Bahama esas insul-grupo konsistanta ek 700 insuli en Nord-Amerika, 80 km este del insulo Bimini, en Florida, Usa.

Bazala fakti pri Bahama

Historio[redaktar | redaktar fonto]

Cristoforo Colombo arivas an l'insulo Watling, nomizita San Salvador da ilu.
 Precipua artiklo: Historio di Bahama

Indijeni Taino arivis en Bahama dum la 7ma yarcento. Kande Cristoforo Colombo trovis l'insulo San Salvador ye la 12ma di oktobro 1492 posible exisitis cirkume 30 000 indijeni en ol. Indijeni Lucayan exterminesis, pro la morbi adportita dal Europani. Variolo exterminis preske la duimo del indijeni Taino de Bahama.[2]

De la 15ma til la 17ma yarcenti, l'insuli apartenis ad Hispania. Tamen, pirati - nome Britaniani - ja celis su en l'arkipelago, qua vere esas labirinto di insuli. En 1648 Britanian aventureri arivis en l'arkipelago. La regiono divenis definitive Britaniana kolonio en 1783, tra la Kontrato di Versailles. Pos la nedependantesko di Usa, cirkume 7 300 personi fidela a Britaniana monarkio diplasis de Nova-York, Florida e Karolini til Bahama kun lia sklavi. Ca personi stablisis kultivi en l'insuli.

L'habitanti di Bahama votis pri nedependo de Unionita Rejio en 1973, e la lando nedependanteskis ye la 10ma di julio 1973. Milo Butler esis l'unesma generala-guberniestro pos la nedependantesko.

Politiko[redaktar | redaktar fonto]

Parlamento di Bahama, en Nassau.

Bahama esas konstitucala monarkio. La nuna chefo di stato esas rejino Elizabeth la 2ma di Unionita Rejio, reprezentata da generala-guberniestro, nun Cornelius Alvin Smith. La chefministro esas la chefo di guvernerio. De la 8ma di mayo 2012 til nun esas Perry Christie.

La parlamento havas du chambri: Senato kun 16 membri, e chambro di deputati kun 40 membri. La du precipua politikala partisi esas la Free National Movement (libera nacionala movado) - FNM, e la Progressive Liberal Party (progresanta liberala partiso) - PLP. Lua konstituco adoptesis ye la 10ma di julio 1973.

La membri de la Supera korto, la civila registristi e lokala judiciisti indikesas dal generala guberniestro. La judiciala povo esas nedependanta del exekutivo e de la legifantaro, e lua tradicioni politikala e legala originas del sistemo di Westminster, Britaniano.

Quankam Bahama ne jacas en Karibia ol esas membro di Karibiana komunitato (CARICOM).

Geografio[redaktar | redaktar fonto]

Mapo di Bahama.
Plajo en Emerald Bay, Bahama.

Bahama esas vasta arkipelago jacanta inter Florida (Usa) e la nordo di Kuba, kun plu kam 700 atoli, insuli ed insuleti, di qui cirkume 30 o 40 habitesas. La maxim granda insulo esas Andros, jacanta 200 km sud-este de Florida. La 2ma maxim populoza urbo dil arkipelago, Freeport, jacas an l'insulo Grand Bahama, norde del arkipelago. La kompanio Walt Disney Company havas lua propra privata insulo che l'arkipelago Lucaya: Castaway Cay, kun surfaco di 4 km².

La tereni dil insuli esas basa: la maxim alta monto dil arkipelago esas Monto Alvernia, kun 62 metri di altitudo. L'insuli konsistas precipue ek longa koraliala formacuri. Lua litoro (sumo di omna insuli) havas 3.452 km. Ne existas fluvii en l'insuli, nur rivereti.

La klimato varias de subtropikala a tropikala di savano. Pro la basa latitudo, la basa altitudo e l'efekti de la marofluo dil Gulfo la klimato preske ne havas vintro. En tre rara okazioni la temperaturi povas falar infre 10°C. Dum somero e autuno, l'insuli subisas l'efekti di uragani.

Ekonomio[redaktar | redaktar fonto]

 Precipua artiklo: Ekonomio di Bahama

Segun TNP per persono, Bahama esas un ek la maxim richa landi de Amerika, dop Bermuda, Usa, Insuli Kaiman, Kanada e Virgin Insuli Britaniana. Turismo, qua reprezentas 60% de lua TNP, esas la precipua fonto di revenuo di la lando. Financal agadi, qui reprezentas 15% de la TNP, esas la duesma maxim importanta. Altra ekonomikala rekursi esas salo, aragonito e ligno. Lando havas poka kultivebla tereni.

Demografio[redaktar | redaktar fonto]

Demografiala piramido di Bahama en 2005.
Skolala pueri en Bahama.

Segun statistiki de The World Factbook por julio 2017, Bahama havis 329 988 habitanti. La maxim multa (90,6%) esas negri. Blanki esas 4,7%, mestici (blanki kun negri) esas 2,1%, altri esas 1,9%, e 0,7% sen specigo (statistiki de 2010).[3] En 2008 cirkume 84% de la habitantaro vivis en urbi.

L'oficala linguo di la lando esas Angla. Haitiana kreolo parolesas dal Haitiana enmigranti.[3]

La religio kun maxima nombro di adepti esas protestantismo (69%), di qui 34,9% esas baptisti, 13,7% esas Anglikani, 8,9% esas Pentekostisti, 4,4% esas Adventisti, 3,6% esas Metodisti, 1,9% esas del Eklezio di Deo). Katoliki esas 12%, ed altra kristani esas 13%.[3]

Kulturo[redaktar | redaktar fonto]

Celebro di Junkanoo en Nassau.

Junkanoo esas tradicionala parado kun dansi e muziki en la stradi, qua eventas en la Dio di Nov-yaro (1ma di januaro) ed en 10ma di julio (dio di la nedependo). Ultre junkanoo, altra stili di muziko inkluzas calypso, soca, reggae, rap e Hip hop. La maxim populala muzikala grupo exter Bahama esas Baha Men.

Referi[redaktar | redaktar fonto]

  1. World Population Prospects: The 2017 Revision. United Nations Department of Economic and Social Affairs, Population Division. URL vidita ye la 10ma di septembro 2017.
  2. Schools Grapple with Columbus' Legacy: Intrepid Explorer or Ruthless Conquistator?. Education Week.
  3. 3,0 3,1 3,2 The World Factbook - "Haiti" (en Angla). CIA. URL vidita ye la 18ma di julio 2018.
Wikipedio
Wikivortaro explikas
ca rubriko
en altra lingui: Bahama


Stati e teritorii en Karibiana Maro
Antigua e Barbuda | Bahama | Barbados | Dominika | Dominikana Republiko | Grenada | Haiti | Jamaika | Kuba | Santa Kitts e Nevis | Santa Lucia | Santa Vincent e Grenadini | Trinidad e Tobago
Dependanta teritorii: Anguila | Aruba | Virgin Insuli Britaniana | Guadelupa | Insuli Kaiman | Kuracao | Martinik | Montserrat | Navassa | Porto-Riko | Sant Maarten | Insuli Turks e Kaikos | Virgin Insuli Usana
Anciena Nederlandan Antili, nune parto di Nederlando: Bonaire | Saba | Sint Eustatius