Santa Vincent e Grenadini

De Wikipedio
Jump to navigation Jump to search
Santa Vincent e Grenadini
Saint Vincent and the Grenadines
Flag of Saint Vincent and the Grenadines.svg Coat of arms of Saint Vincent and the Grenadines.svg
Standardo di Santa Vincent e Grenadini Blazono di Santa Vincent e Grenadini
Nacionala himno:
St Vincent Land So Beautiful
LocationSaintVincentAndTheGrenadines.png
Urbi:
Chefurbo: Kingstown
· Habitanti: 15.900 (1999)
Precipua urbo: Kingstown
Lingui:
Oficala lingui: Angla
Guvernerio:
Tipo: Monarkio
· Rejino: Elizabeth la 2ma
· Chefministro: Ralph Gonsalves
Surfaco: (198ma granda)
· Totala: 389 km²
· Aquo: neglijebla %
Habitanti: (195ma granda)
Plusa informi:
Valuto: Dolaro di Estal Karibia
Veho-latero: sinistre
ISO: VC
VCT
670
Reto-domeno: .vc*
Precipua religio: protestantismo 75%, katolikismo 13%
Oficala retosituo: http://www.gov.vc


Santa Vincent e Grenadini (Angle, Saint Vincent and the Grenadines) esas arkipelago e stato en Karibia.

Bazala fakti pri Santa Vincent e Grenadini

Historio[redaktar | redaktar fonto]

 Precipua artiklo: Historio di Santa Vincent e Grenadini

Santa Vincent probable nomesis da Cristoforo Colombo qua supozeble deskovris ol ye la 22ma di januaro (Dio di Santa Vincentius) 1498 e nomizis ol pro la santo. L'indijeni Karib impedis Europana koloniigo til la 18ma yarcento. Dum ta tempo, negra sklavi, qui naufrajis an l'insulo o fugis de Barbados od altra kolonii e serchis refujeyo en Santa Vincent, mixis su kun Indijeni Karib e formacis mestici konocita kom populo Garifuna, o "nigra Karibi".

Francia okupis la teritorio de 1719 til 1763 e komencis kultivar kafeo, indigiero, tabako e sukrokano en granda plantacerii, kun la labor-povo da Afrikana sklavi. En 1763 Francia cedis la dominaco dil insulo ad Unionita Rejio. Tamen, Francia riinvadis l'insulo en 1779 pos desembarkar proxim Fort Duvernette. Unionita Rejio fine riprenis la teritorio definitive en 1783, per la kontrato di Versailles.

De 1783 til 1796 eventis konflikti inter Britaniani e le Garifuna, komandita da Joseph Chatoyer. La revolto fine represesis en 1796, e Britaniani deportis preske 5.000 Garifuna a l'insulo Roatán, proxim Honduras.

Kingston dum la yari 1890ma.

En 1834 sklaveso abolisesis en Santa Vincent. Dum la fino dil yari 1840ma Portugalani de Madeira komencis enmigrar al insulo, e de 1861 til 1888 personi de Estal Indii komencis arivar. La laborala stando esis severa sive por ex-sklavi sive por l'enmigranti, pro la basa preci di sukro en extera merkati til la komenco dil 20ma yarcento.

L'universala votado adoptesis en la kolonio en 1951. La lando divenis nedependanta de Unionita Rejio ye la 27ma di oktobro 1979. Robert Milton Cato esis l'unesma chefministro pos la nedependo.

Politiko[redaktar | redaktar fonto]

Chefministro Ralph Gonsalves

Santa Vincent e Grenadini esas konstitucala monarkio. Elizabeth la 2ma di Unionita Rejio reprezentesas da Frederick Ballantyne, generala guberniestro. La chefo di guvernerio esas la chefministro, qua elektesas dal generala-guberniestro.

La legifala povo konsistas ek la Domo dil Asemblitaro, qua havas 21 membri, di qui 15 esas deputati qui elektesas dal populo por 5-yara periodo e 6 esas Senatani indikata dal generala guberniestro. Segun l'artiklo 28 de la konstituco, 4 ek la senatani mustas esar de la partiso qua guvernas la lando, kontre ke 2 mustas esar del opozanta partiso.[1] La konstituco di Santa Vincent e Grenadini adoptesis en 1979, e havas entote 105 artikli.[1]

Santa Vincent e Grenadini aceptas la Judiciala Korto di Estal Karibia kom lua maxim alta apelo-korto, sive por civila, sive por kriminala aferi. Un ek la judiciisti de la Judiciala Korto di Estal Karibia rezidas en Santa Vincent. La fundamenti de la legaro di Santa Vincent e Grenadini esas la komuna legaro di Anglia.

Segun l'artiklo 148 de la Kriminala kodexo di Santa Vincent, homeosexualeso esas nelegala en la lando. Irga persono flagrata en homeosexuala ago povas kondamnesar til 5 yari en karcero.[2]

Geografio[redaktar | redaktar fonto]

Santa Vincent e Grenadini
Volkano La Soufrière.

Santa Vincent e Grenadini jacas inter Santa Lucia norde, Barbados este, e Grenada sude. La lando konsistas ek 32 insuli, di qui 9 habitesas. La maxim granda e populizita insulo esas Santa Vincent, kun 344 km², qua esas montoza e havas volkanal origino. La cetera 45 km² konsistas ek du triimi del arkipelago Grenadini. La volkano La Soufrière ("sulfo-ekireyo") kun 1.234 metri di altitudo, esas maxim alta monto dil arkipelago e konstanta minaco. Ol eruptis violentoze en 1902 poka hori ante monto Pelée en Martinik, e produktis 1.680 morti. Lua lasta erupto eventis en 1979.

La klimato dil arkipelago esas tropikala. La pluvoza sezono eventas de mayo til novembro.[3] Kelkafoye, forta uragani frapas l'insuli, exemple l'uragani Dean (2007), Omar (2008) e Tomas (2010).[4]

Cirkume 36% de la lando kovresas per foresti, 10% esas sulo kultivebla, 18% kovresas per permananta plantacaji, 5% esas pastureyi e 31% havas altra uzi. Ne existas importanta fluvii en la lando.

Ekonomio[redaktar | redaktar fonto]

 Precipua artiklo: Ekonomio di Santa Vincent e Grenadini

L'agrokultivo, note banano, e la turismo esas la precipua ekonomial agadi de la lando.

Demografio[redaktar | redaktar fonto]

Kingstown, la maxim populizita urbo dil insuli.
Demografiala evoluciono di St. Vincent e Grenadini (1961 til 2005).

Segun statistiki de The World Factbook por julio 2017, Santa Vincent e Grenadini havis 102 089 habitanti.[3] La maxim multa (66%) esas negri. Mestici de blanki e negri esas 19%, Estal Indiani esas 6%, Europani esas 4%, indijeni esas 2%, e 3% apartenas ad altra etnii.[3]

L'oficala linguo di la lando esas Angla. La Franca dialekto de Santa Vincent parolesas ordinare en familial aferi.[3]

La religio kun maxima nombro di adepti esas por 75% de la habitantaro esas protestantismo, esante 47% Anglikani e 28% Metodisti. Katoliki esas 13%, e 12% praktikas altra religii (Hinduismo, 7-Dia Adventisti, od altra protestanta religii).[3]

L'urbo maxim populizita esas la chef-urbo, Kingstown.

Kulturo[redaktar | redaktar fonto]

Pri muziko, la ritmi maxim populara en l'insuli esas calypso, soca, "chutney-muziko", "steelpan" e reggae. La kantisto di soca Kevin Lyttle esas la maxim konocita artisto de la lando.

Kriketo, rugbio* e futbalo esas la maxim populara sporti en la lando.

Referi[redaktar | redaktar fonto]


Stati e teritorii en Karibiana Maro
Antigua e Barbuda | Bahama | Barbados | Dominika | Dominikana Republiko | Grenada | Haiti | Jamaika | Kuba | Santa Kitts e Nevis | Santa Lucia | Santa Vincent e Grenadini | Trinidad e Tobago
Dependanta teritorii: Anguila | Aruba | Virgin Insuli Britaniana | Guadelupa | Insuli Kaiman | Kuracao | Martinik | Montserrat | Navassa | Porto-Riko | Sant Maarten | Insuli Turks e Kaikos | Virgin Insuli Usana
Anciena Nederlandan Antili, nune parto di Nederlando: Bonaire | Saba | Sint Eustatius