Santa Kitts e Nevis

De Wikipedio
(Ridirektita de St Kitts-Nevis)
Irez a navigado Irez a serchilo
Santa Kitts e Nevis
Federation of Saint Kitts and Nevis
Flag of Saint Kitts and Nevis.svg Coat of arms of Saint Kitts and Nevis (variant).svg
Standardo di Santa Kitts e Nevis Blazono di Santa Kitts e Nevis
Nacionala himno:
O Land of Beauty!
LocationSaintKittsAndNevis.png
Urbi:
Chefurbo: Basseterre
· Habitanti: 14 000 (2018)
Precipua urbo: Basseterre
Lingui:
Oficala lingui: Angla
Tipo: Monarkio
· Rejino: Elizabeth la 2ma di Unionita Rejio
· Chefministro: Timothy Sylvester Harris
Surfaco: (207ma maxim granda)
· Totala: 261 km²
· Aquo: neglijebla %
Habitanti: (209ma maxim granda)
· Totala: 54 821[1] (2016)
· Denseso di habitantaro: 164 hab./km²
Plusa informi:
Valuto: Dolaro di Estal Karibia
Veho-latero: sinistre
ISO: KN
KNA
659
Reto-domeno: .kn*


Santa Kitts e Nevis esas mikra lando jacanta an Karibia. Ol esas la min granda suverena stato di Amerika, ambe en surfaco totala e quanto di habitanti. La plena nomo dil arkipelago esas Santa Christopher e Nevis. Kit es Angla familiara nomo por Christopher.

Bazala fakti pri Santa Kitts e Nevis.

Historio[redaktar | redaktar fonto]

Fadrique de Toledo kaptas Santa Kitts.
 Precipua artiklo: Historio di Santa Kitts e Nevis

L'insuli ja habitesis posible depos 3.000 yari ante nun, ante l'arivo dil populo Arawak. Tamen, la nomo e l'origino di ca unesma habitanti esas nekonocata[2]. L'indijeni Kalinango, la lasta populo qua establisis su an l'insuli, arivis ibe 300 yari ante l'Europani. L'arkipelago deskovresis da Cristoforo Colombo en 1493, e probable nomesis da lu segun la patron-santo dil dio.

En 1538, Franca hugenoti establisis su en Santa Kitts, ma Hispani destruktis lua kolonio e deportis la transvivinti. En 1623 l'Angli e pose la Franci establisis kolonio che l'insulo. Angli e Franci unionis por konfrontar le Kalinago e facis gentocido kontre li en 1626. Tri yari pose, en 1629, Hispani komandita da Fadrique de Toledo invadis Santa Kitts ed ekpulsis l'Angli.

L'insulo Nevis koloniigesis dal Angli en 1628. De ibe, komencis la koloniigo di altra insuli, exemple Antigua, Montserrat, Anguila e Tortola. Britaniani okupis tota teritorio en 1814, e kreis kolonio nomizita Santa-Kitts-Nevis-Anguila.

Santa-Kitts-Nevis-Anguila divenis autonoma en 1967. Anguila rebelesis e divenis separita kolonio en 1971. Santa Kitts e Nevis nedependanteskis del Unionita Rejio ye la 19ma di septembro 1983.

Politiko[redaktar | redaktar fonto]

Oficala rezideyo dil general-guberniestro di St.Kitts e Nevis.

Santa Kitts e Nevis esas konstitucala monarkio. Elizabeth la 2ma di Unionita Rejio reprezentesas da Tapley Seaton, generala-guberniestro. La chefo di guvernerio esas la chefministro, qua elektesas da la generala-guberniestro, e ordinare esas la chefo dil partiso qua recevis la majoritato di la voti.

La parlamento (National Assembly) havas 14 o 15 membri, di qui 11 esas deputati qui elektesas dal populo por 5-yara periodo en elektala distrikti. L'altra 3 esas senatani qui elektesas da la generala guberniestro. La lasta membro dil parlamento esas la supera statala advokato (attorney-general, en Angla), qua esas membro ex officio.

La maxim alta korto esas la Supra Korto di Estal Karibia, kun sideyo en Santa Lucia. Un ek la judiciisti di la supra korto vivas en Santa Vincent. La konstituco di Santa Kitts e Nevis aprobesis ye la 22ma di junio 1983, ed adoptesis ye la sequanta dio.[3]

Geografio[redaktar | redaktar fonto]

Mapo di Santa Kitts e Nevis.
Nevis, vidita de la sudala peninsulo di Santa Kitts.

L'insuli havas volkanal origino. La maxim alta monto dil arkipelago esas Mount Liamuiga (1.156 m) en Saint Christopher. La maxim alta monto di Nevis esas Mount Nevis (956 m). Nevis jacas 3 km sude de Saint Christopher (Santa Kitts). La total extenseso dil litoro esas 135 km.

Geologiale l'insuli esas yuna; la maxim olda roki probable formacesis 50 milion yari ante nun, dum Mioceno. Nevis komencis formacesar cirkume 3,45 milion yari ante nun, dum Plioceno.

La klimato esas tropikala temperata da marala venti. La pluvoza sezono eventas de mayo til novembro. Ne existas importanta fluvii en l'insuli.

La du precipua fluvii di la lando esas Cayon e Wingfield, ambe permananta. Altri esas tempala fluveti.

Ekonomio[redaktar | redaktar fonto]

 Precipua artiklo: Ekonomio di Santa Kitts e Nevis

Turismo esas importanta fonto di revenuo.

Demografio[redaktar | redaktar fonto]

Demografio di St. Kitts e Nevis, 1961 til 2005

Segun statistiki de The World Factbook por julio 2018, Santa Kitts e Nevis havis 53 094 habitanti. Segun etnio, esis 92% esas decendanta de Afrikani. Mestici esas 3%, blanki esas 2,1%, Est Indiani esas 1,5%, altra etnii esas 0,6%, e ne existas informi pri 0,3%.[4] Sant-Christopher o Santa Kitts, la maxim granda insulo, koncentras 80% de la habitantaro.

La linguo oficala esas Angla.[4]

La procento di habitantaro segun religio esas: 74% protestanti (inkluzite 20,6% Anglikani, 19,1% Metodisti, ed altri). Katoliki esas 6,7%, Rastafariani esas 1,7%, testi di Jehova esas 1,3%, altra religii esas 7,6%, nula religio esas 5,2%, e ne existas informo pri 3,2% de la habitanti.[4]

La maxim grand urbo esas la chef-urbo Basseterre. Altra importanta urbo esas Charleston.

Kulturo[redaktar | redaktar fonto]

Goat Water.

La koquarto di Santa Kitts e Nevis uzas multa fresha ingredienti. La dieto di lokala habitanti inkluzas multa fishi e karni, nome de kapro, saporigata per ingredienti de Westala Indii. Goat Water, supo konsistanta ek kapro-karno, koquata kun artokarpofrukto, papayo, pasto-bulo e kompoto di tomato esas la maxim konocata lokala disho.

Karnavalo en Santa Kitts eventas de la 18ma di decembro til la 3ma di januaro. La moderna karnavalo dil insuli komencis depos la duimo dil yari 1950a, influita dal karnavalo di Trinidad e Tobago.

En junio eventas muzikala festivalo en Santa Kitts e Nevis. En Nevis ol recevas la nomo Culturama, ed iras til julio. La muziko di la lando konocesas pro lua diversa festivali de la lando, exemple la propra Karnavalo. La maxim populara ritmi esas salsa, jazo, soca, calypso, e la muziko facita kun stalo-tamburi (steelpan). Ultre stalo-tamburi, altra instrumenti uzata esas shack-shack (sorto di ludosonalido kun fazeolo-semini interne ol), stalo-triangulo, gitari, ed altri. Yen kelk exempli pri calypso-muzikisti del insuli: Mighty Kush, Lord Mike, Elmo Osborne, Lord Harmony, King Monow, e Mighty Saint. En Nevis, aparis kelka calypso-bandi dum la yari 1980a: Mighty Chevi, Bahowlah the Meek, King Meko, e Chaplet and Ginger.

Pro influvo Britaniana, la maxim populara e praktikata sporto di la lando esas kriketo. Kavalo-kurado ank esas populara, nome en Nevis.

Referi[redaktar | redaktar fonto]

  1. World Population Prospects: The 2017 Revision. United Nations Department of Economic and Social Affairs, Population Division. URL vidita ye la 10ma di septembro 2017.
  2. Videz, exemple, l'artiklo Nevis Heritage excavation reports, 2000-2002, Arkeologio-fako, Universitato Southampton, 8ma di agosto 2006.
  3. 1983 Saint Kitts and Nevis Constitution. URL vidita ye la 10ma di agosto 2014.
  4. 4,0 4,1 4,2 Saint Kitts and Nevis - The World Factbook. CIA. URL vidita ye la 27ma di julio 2019.


Suverena stati e Nesuverena teritorii che Karibia
Antigua e Barbuda | Bahama | Barbados | Dominika | Dominikana Republiko | Grenada | Haiti | Jamaika | Kuba | Santa Kitts e Nevis | Santa Lucia | Santa Vincent e Grenadini | Trinidad e Tobago
Nesuverena teritorii: Anguila | Aruba | Virgin Insuli Britaniana | Guadelupa | Insuli Kaiman | Kuracao | Martinik | Montserrat | Navassa | Porto-Riko | Sant Maarten | Insuli Turks e Kaikos | Virgin Insuli Usana
Anciena Nederlandan Antili, nun parto de Nederlando: Bonaire | Saba | Sint Eustatius