Yokohama
| Yokohama | ||
| ||
| Diversa imaji pri Yokohama. | ||
| Lando: |  Japonia
| |
Informo:
| ||
| Latitudo: | 35°26'39" N | |
| Longitudo: | 139°38'17" E | |
| Surfaco: | 437,38 km² | |
| Habitanti: | 3 732 616 (2016) | |
| Denseso di habitantaro: | 8 534,03 hab./km² | |
| Horala zono: | UTC+ 9 | |
| Urbestro: | Takeharu Yamanaka | |
Mapo:
| ||
| ||
Oficala retosituo:
| ||
| www.city.yokohama.lg.jp/ | ||
Yokohama esas la duesma maxim populoza urbo di Japonia, havanta 3 732 616 habitanti en 2016. Ol ank esas la maxim importanta portuo di la lando, e chef-urbo di la prefektio Kanagawa. Ol jacas apud la bayo di Tokyo ed esas parto di la metropolala regiono de la chef-urbo di la lando.
Yokohama developis rapide kom portuala urbo, e nun ol esas un ek la maxim importanta portui de Japonia, ensemble kun Kobe, Osaka, Nagoya, Hakata e Chiba.
Historio
[redaktar | redaktar fonto]Che Yokohama trovesis multa restaji de paleolitiko. En la quartero Tsuzuki trovesis restaji de la kulturo Jōmon (c. 14000 aK til c. 300 aK). Dum l'epoko dil shogunio Tokugawa, Yokohama nur esis vilajeto habitita da peskisti.
Yokohama restis mikra urbeto til la duimo dil 19ma yarcento, kande komodoro Matthew Perry arivis e demandis Japonia apertir lua portui por komercar kun westala landi. La portuo di Yokohama inauguresis ye la 2ma di julio 1859.
L'urbo rapide divenis importanta komercala centro. Komence, stranjeri okupis la distrikto Kannai. La distrikto cirkondesis per fosato, e lua rezidinti havis ekteritoria stando. Tandem, eventis konflikti inter la rezidinti dil distrikto e lokala habitanti, nome yuna samurayi. Por protektar l'interesti de lua civitani, Britania sendis garnizono al urbo en 1862. L'unesma Japoniana jurnalo en Angla linguo editesis ibe en 1861. En 1870 l'unesma diala jurnalo en Japoniana anke editesis en l'urbo. En 1872 la sistemo di publika lumizo per gaso inauguresis .
Yokohama kreskis rapide e divenis importanta industrial urbo dum la komenco dil 20ma yarcento, ma subisis granda destrukto ye la 1ma di septembro 1923 pro ter-tremo, qua produktis 30 771 morti.
L'urbo rikonstruktesis pos la ter-tremo, ma dum la duesma mondomilito ol subisis 30 aeral inkursi e bombardi. Ye la 29ma di mayo 1945, eskadrono di Boeing B-29 Superfortress lansis fairobombi super l'urbo, qui transformis 42% ek ol en eskombri.[1]
Pos la milito, Usa uzis l'urbo por furnisar provizuri a lua trupi che Pacifiko, nome dum la milito di Korea. En 1956, Yokohama transformesis en urbo tra guvernala dekreto. En 1972, l'urbo inauguris lua unesma urbala ferovoyo ed abolisis la sistemo di tramveturi.
En 1993 inauguresis l'edifico Yokohama Landmark Tower (Japone: 横浜ランドマークタワー Yokohama Randomāku Tawā), alta de 296,3 metri, lor la maxim alta edifico di Japonia. Ol divenis la 2ma maxim alta de la lando pos ke l'edifico Abeno Harukas inauguresis en Osaka, la yaro 2012.[2]
En 2002, Yokohama gastigis la lasta partio di la Mondala Kupo di Futbalo di Japonia. En 2009, por celebrar la 150ma aniversario dil aperto di lua portuo, ol gastigis kelka eventi del Internaciona Konfero pri Afrikana Developo di Tokyo. En 2010 ol gastigis kunveno dil Koopero Ekonomiala Azia-Pacifiko (abreviuro en Angla: APEC).
Geografio
[redaktar | redaktar fonto].jpg)
La reliefo di Yokohama konsitas ek regioni plana, terasi, kolini, fluviala vali e tereni rekuperita del oceano. Fluveti Tama, Ookagawa, Tsurumi e Tashio trairas l'urbo.
Lua klimato esas humida subtropikala (Cfa segun la klimatala klasifikuro da Köppen). La mezavalora temperaturo en januaro (vintro) esas 5,9°C, kontre ke la mezavalora temperaturo en agosto (somero) esas 26,7°C.
La pluvoza sezono (super 140 mm) iras de mayo til oktobro, malgre ke ne existas monato komplete sika. Vintri esas astonante sunoza, e la humideso diminutas kelke, tamen en januaro e februaro povas nivar dum kelka dii. La mezavalora yarala pluvo-quanto esas 1.688,8 mm, e la maxim pluvoza monato esas septembro, kun mezavalore 233,8 mm.
Ekonomio
[redaktar | redaktar fonto]Industrio, nome naval industrio, bioteknologio ed elektronikala kompozanti, esas importanta ekonomial agadi. Komerco e servadi ank esas importanta. Nissan diplasis lua sideyo de Tokyo a Yokohama en 2010.
La portuo di Yokohama esas la 31ma maxim granda del mondo segun volumo di kargajo transportata. En 2011 embarkis e desembarkis 121 326 tuni di vari.
Transporto
[redaktar | redaktar fonto]
Yokohama ne havas propra aeroportuo, tamen ol ligesas a la sama aeroportui qui servas Tokyo, Haneda (distanta 17 km del urbo[3]) e Narita (distanta 77,1 km de Yokohama[4]). La centrala ferovoyala staciono di Yokokama inauguresis en 1872, e nun esas un ek la maxim importanta de la lando. Treno di granda rapideso nomata Tōkaidō Shinkansen ligas Tokyo ad Osaka, trairanta Yokohama. Ank existas suburbala treni liganta Yokohama a Tokyo.
L'urbo havas tri linei di urbala ferovoyo, kun entote 53,5 km e 42 stacioni. Un ek la linei ligas Yokohama a la vicina urbo Fujisawa. L'urbala fervoyo inauguresis ye la 16ma di decembro 1972 por remplasar la linei di tramveturi e troleobusi. Existas plu kam 50 linei di autobusi, qui ligas la quarteri di Yokohama.
Fratala urbi
[redaktar | redaktar fonto]
- Constanţa,
Rumania - Frankfurt am Main[5],
Germania - Lyon[6],
Francia - Manila,
Filipini - Mumbai,
India - Odesa,
Ukraina - San Diego,
Usa - Shanghai,
PR Chinia - Vancouver,
Kanada
Referi
[redaktar | redaktar fonto]- ↑ Interesting Tidbits of Yokohama - History of Yokohama Yokohama Convention & Visitors Bureau
- ↑ Landmark Tower - Publikigita da Council on Tall Buildings and Urban Habitat.
- ↑ Distance between Yokohama and Haneda Airport - URL vidita ye 27ma di aprilo 2020.
- ↑ Distance Between Yokohama and Narita Airport - URL vidita ye 27ma di aprilo 2020.
- ↑ Frankfurt am Main: Yokohama © 2011 Stadt Frankfurt am Main
- ↑ Partner Cities of Lyon and Greater Lyon © 2008 Mairie de Lyon