Europana Brodkast-Uniono

De Wikipedio
Simbolo dil EBU

La Europana Brodkast-Uniono (EBU; franca: Union européenne de radio-télévision, UER) esas aliancuro de brodkasterii publika-servala, establisita ye 12ma februaro 1950.

En 2015, la organizuro inkluzis 73 aktiva membri en 56 landi, e 34 asociata membri de plusa 20 landi. Pro ke la maxim multa EU-stati esas membri di ca organizuro, la EBU guvernesas da supranaciona legi e reguli.

Ol anke gastigis debati inter kandidati por la prezidanteso dil Europana Komisitaro por la parlamentala elekto di 2014, ma ne relatas ta institucuro ipsa.

La EBU esas maxim bone konocata pro produktar la Euroviziono-Konkurso di Kansono. Ol esas membro dil Internaciona Muziko-Konsilistaro.

Deskripto[redaktar | redaktar fonto]

Membri dil EBU esas radio- e televizion-kompanii, generale publika servala brodkasterii, o privata stacioni kun misiono publika servala. Aktiva Membri venas de Islando norde, Egiptia sude, Irlando weste ed Azerbaijan este, plus preske omna naciono di geografiala Europa. Asociata Membri venas de landi e teritorii preter Europa, quala Kanada, Japonia, Mexikia, India, e Hong Kong. Asociata Membri de Usa inkluzas ABC, CBS, NBC, la Corporation for Public Broadcasting, Time Warner, e la individua staciono, klasika muziko-staciono WFMT di Chicago.

Aktiva Membri esas paganta EBU-membri qui satisfacas omna teknikala kriterii di plena membreso, stati sive en la Europana Brodkast-Areo (EBA) o membri dil Konsilistaro di Europa. Siria esas exemplo di lando en la EBA qua ne satisfacas omna teknikala kriterii di plena membreso, e tale ol esas nur Asociata Membreso.

La maxim famoza programo dal EBU esas la Euroviziono-Konkurso di Kansono, organizata da la reto Euroviziono. La reto Euroviziono organizas anke la Eurovision Danso-Konkurso, la Yunala Euroviziono-Konkurso di Kansono, la Eurovision Yuna Danseri-Konkurso, ed altra simila konkursi por yuna muzikisti e skribisti. La landi reprezentata en la EBU anke kooperas por krear dokumentali ed (animita) puero-programi.

Radio-kunlabori inkluzas Euroclassic Notturno - dumnokta programo di klasika muziko, produktata da BBC Radio 3 e brodkastata en la Unionita Rejio kom Through the Night - e specala temo-dii, quala la yarala brodkasti di kristnasko-muziko de cirkum Europa.

La maxim multa EBU-brodkasterii havas grupo-kontrato por brodkastar la Olimpiala Ludi e Mondala Kupo di Futbalo (aparte la ludi di sua lando e finalo). Altra yarala evento brodkastata trans Europa per la EBU esas la Nov-Yarala Koncerto di Wien.

La temo-muziko pleata ante EBU brodkasti esas Preludo a Te Deum da Marc-Antoine Charpentier. Ol esas bone konocata da Europani nam ol pleesas ante e pos la Euroviziono-Konkurso di Kansono ed altra importanta eventi.

Historio[redaktar | redaktar fonto]

La EBU sucedis la Internaciona Brodkast-Uniono (IBU) fondita en 1925 e havas administrala chefkontoro en Genève e teknikala kontoro en Bruxelles. Ol kurajigis programo-kambii inter membri e mediacis teknikal disputi inter membri, ordinare pri frequenci ed interfero. Ol efektive kaptesis da Nazi-Germania dum la Duesma Mondomilito e, kande la konflikto finis, ol esis segun la Aliancanti organizuro quan li ne povis fidar.

En printempo 1946, reprezentanti di la Sovieta radio-komitato propozis formacar nova organizuro; tamen, samtempe on preparis interguverneriala “Europana Brodkasto-Konfero” (EBC) en København en 1948 por trasar nova projeto por frequenco-uzo en la Europana Brodkast-Areo (EBA). Egardesis necesa havar organizuro qua povis realigar la “Copenhagen Wavelength Plan” ma esis deskonkordo inter brodkasterii e timo che la BBC ke nova asociuro dominacesus dal USSR ed olua propozo donar a singla sua stati un voto. Francia propozis ke ol havez quar voti inkluzinta lua kolonii en Nord-Afrika. Britania sentis ke ol havus poka influo per nur un voto.

Ye la 27ma junio 1946 la alternativa Internaciona Brodkast-Organizuro (IBO) fondesis kun 26 membri e sen partopreno da Britania. Sequanta-die la IBU kunvenis en General Assemblo e dissolvo-probo faliis; 18 ek la 28 membri livis por join la IBO. Dum kelka tempo en la tarda yari 1940ma e la IBU ed IBO konkursis por la rolo di organizar frequenci ma Britania decidis nulatempe partoprenar. BBC probis ma faliis laborar kun li. Tamen la IBO lokacis la teknikal centro dil IBU en Bruxelles ed employis olua stabo. La BBC lore propozis nova solvo ke la IBO chanjez sua konstitucuro por ke esez nur un membro po ITU-lando, tale certiganta Westala majoritato super la URSS e satelito-stati. En agosto 1949 kunveno eventis en Stresa, Italia ma ol rezultis en deskonkordo inter delegiti pri quale solvar la problemi. Un propozo esis ke la Europana Brodkast-Areo remplasesez per organizuro qua exkluzus Est-Europa, la Levanto e Nord-Afrika.

Pos Stresa, konsento emersis inter la West-Europani pri formacar nov organizuro e la BBC propozis ke ol havez chefkontoro en London. Kunveni en Paris ye 31ma oktobro ed 1ma novembro 1949 decidis la fato dil IBU ed IBO, ma on decidis ne permisar West-Germania esar fondanto dil nova organizuro. Ye la 13ma februaro 1950 la Europana Brodkast-Uniono unesme kunvenis che la Imperial Hotel en Torquay, Anglia. L'unesma prezidanto esis Ian Jacob de la BBC qua restis la chefo dum 10 yari. La maxim importanta difero inter la EBU ed olua preirinti, esas ke EBU-membreso esis por brodkasterii e ne guvernerii. Segun frua delegiti EBU-kunveni esis kordial e profesional e tre diferanta del abrupta tono dil preirinti. West-Germania admisesis en 1951, e laboro-relato forjesis kun la Organizuro por Internaciona Radio e TV (OIRT) dil URSS, qua existis paralele kun la EBU til ke ol kombinesis en 1993.