Historio di Santa Vincent e Grenadini

De Wikipedio
Irez ad: pilotado, serchez

L'unesma habitanti di Santa Vincent e Grenadini esas Karib-indijeni, qui nomizis Santa Vincent Youloumain. L'insulo probable nomesis da Cristoforo Colombo qua supozeble deskovris ol en 22ma januaro (Dio di Santa Vincent) 1498 e nomizis ol pro la santo. Karib-indijeni impedis Europana koloniigo til la 18ma yarcento. Dum ta tempo, nigra sklavi, qui sive naufrajis en l'insulo sive fugis de Barbados od altra kolonii e serchis refujeyo en Santa Vincent, mixuris su kun Karib-indijeni e formacis mestici konocata kom Garifuna populo, o "nigra Karibi".

Francia okupis la teritorio de 1719 til 1763 e komencis kultivar kafeo, indigo, tabako e sukrokano en granda plantacerii, kun la labor-povo di Afrikana sklavi. En 1763 Francia cedis la dominaco dil insulo ad Unionita Rejio. Tamen, Francia ri-invadis l'insulo en 1779 pos desembarkar proxim Fort Duvernette. Unionita Rejio finale riganis la teritorio definite en 1783, kun Versailles-kontrato.

De 1783 til 1796 okuris konflikti inter Britaniani e Garifuna, lasta komandita da Joseph Chatoyer. La revolto finale represesis en 1796, e Britaniani deportis preske 5.000 Garifuna a l'insulo di Roatán, proxim Honduras.

Kingston, Santa Vincent, dum la 1890a yari.

En 1834 sklaveso abolisesis en Santa Vincent. En fino di la 1840a yari Portugalani de Madeira komencis enmigrar vers l'insulo, e de 1861 til 1888 personi de Est-Indii komencis arivar. Laborala standi esis severa amba por ex-sklavi e por enmigranti, pro la basa preci di sukro en extera merkati til la komenco di la 20ma yarcento.

Flago di Santa Vincent e Grenadini.

Universala votado adoptesis en la kolonio en 1951. Lando divenis nedependanta de Unionita Rejio en 27 di oktobro 1979. Robert Milton Cato esis l'unesma chefministro pos nedependo.

Naturala dizastri esis frequenta en la historio dil arkipelago. En 1902 La Soufrière volkano eruptis, ed aprilo 1979 okuris nova erupto. Quankam nulu mortis, mili di personi evakuesis, ed okuris granda domaji en l'agrokultivo. En 1980 e nove en 1987 uragani kauzis granda destruktadi en la plantacerii di banano e kokoso. En 1998 e 1999 l'uragana sezono kauzis vasta destruktadi en westala litoro.