Salvador

De Wikipedio
(Ridirektita de El Salvador)
Irez ad: pilotado, serchez
Por la chef-urbo di Braziliana stato di Bahia, videz Salvador (Bahia).
Salvador
República de El Salvador
Flag of El Salvador.svg Coat of arms of El Salvador.svg
Flago di Salvador Blazono di Salvador
Nacionala himno:
Saludemos la Patria orgullosos
LocationElSalvador.svg
Urbi:
Chefurbo: San-Salvador
· Habitanti: 316 090 (kontado 2007)
Precipua urbo: San-Salvador
Lingui:
Oficala lingui: Hispaniana
Guvernerio:
Tipi: Republiko
· Prezidanto: Salvador Sánchez Cerén
Surfaco: (151ma granda)
· Totala: 21 041 km²
· Aquo: 1,4 %
Habitanti: (105ma granda)
· Totala: 6 290 413[1] (2013)
· Denseso di habitantaro: 341.5 hab./km²
Pluse informi:
Valuto: Dolaro di Usa (pos 2001)[2]
Veho-latero: dextre
ISO: SV
SLV
222
Reto-domeno: .sv*
Precipua religio: katolikismo (91,2%)


Salvador esas lando qua jacas en Central-Amerika. Lua vicina landi esas Honduras norde ed este, e Guatemala weste. Sude jacas l'oceano Pacifiko.

Bazala fakti pri Salvador

Historio[redaktar | redaktar fonto]

Ceramiko Maya trovita en Joya de Cerén.
 Precipua artiklo: Historio di Salvador

La maxim anciena restaji trovita pri homala vivo en Salvador evas de 8.000 til 1.500 yari aK. Le Maya vivis en la regiono konocita kom Joya de Cerén de cirkume la yaro 400 til la 7ma yarcento.

Ye la 31ma di mayo 1522 Hispani komandita da Andrés Niño desembarkis en insulo quin li nomizis «Petronila» (nune (Meanguera).[3] En 1524 Pedro de Alvarado komencis submisar l'indijeni en la regiono. Hispani fondis l'unesma urbo en la regiono en 1525.[4]. L'unesma chef-urbo di lando, nune konocata kom Ciudad Vieja, fondesis en 1528 Ca urbo havis 50 o 60 domi[5].

En 1811 ed en 1814 eventis rebelesi kontre Hispana dominacajo. Fine Salvador divenis nedependanta de Hispania ye la 15ma di septembro 1821, e restis parto di la Federala Republiko di Central-Amerika til 1839, kande la federuro dissolvesis ed ol divenis nedependanta republiko.

De 1872 til 1898 Salvador probis riestablisar la Central-Amerikana federuro, ma faliis. Kande eventis la stato-stroko di 1898 en Salvador, l'ideo desaparis.

L'exportacajo di kafeo adportis granda profiti a poka familii, qui kontrolis la politiko Salvadorana, sive la konservemi sive la liberali, dum la 19ma yarcento. En 1931 eventis stato-stroko, e generalo Maximiliano Hernández Martínez, lor admirinto di fashismo, kaptis la povo. Ilu represis violente l'indijena populi e la rurala rezisto. En 1932 eventis violentoza represo, konocita kom La Matanza, kontre rurala revolto komandita dal revolucionero Farabundo Martí kontre la guvernerio di Martínez. La represo produktis 30.000 viktimi, mortigita, enkarcerigita o exiliita.

De 1931 - kande generalo Maximiliano Hernández Martínez asumis la povo pos stato-stroko - til 1979 Salvador administresis dal militisti. La militistala rejimo finis kande stato-stroko revokis la generalo Carlos Humberto Romero e instalis la Revolucionala Uniono di Guvernerio de Salvador en povo. En 1980 fondesis la Fronto Farabundo Martí por Nacionala Libereso, e komencis interna milito en la lando.

Ye la 26ma di marto 1982 eventis elekti por la Nacionala Kongreso. La deputati elektis civila prezidanto Álvaro Magaña, e guvernerio di Revolucionala Uniono finis. L'interna milito finis en 1992, e la Fronto Farabundo Martí divenis legala partiso.

Fine en 2009, unesmafoye un membro di Fronto Farabundo Martí por Nacionala Libereso (FMLN), Carlos Mauricio Funes, elektesis prezidanto di Salvador. En 2014 ilu sucedesis per Salvador Sánchez Cerén, de la sama partiso.

Politiko[redaktar | redaktar fonto]

Asamblea Legislativa ("Legifal Asemblajo"), la parlamento di Salvador.
Nacionala Palaco di Salvador.

Salvador esas prezidantala republiko. La prezidanto esas la chefo di stato e la chefo di guvernerio. Lu elektesas dal populo por 5-yara periodo, e ne povas rielektesar por la sequanta periodo. La nuna prezidanto esas Salvador Sánchez Cerén, de la partiso FMLN, pos la 1ma di junio 2014.

La parlamento (Asamblea Legislativa) havas un chambro kun 84 membri, qui elektesas dal populo por 3 yari. La lando havas 6 politikala partisi, esante la precipua l'ARENA - Alianza Republicana Nacionalista e la FMLN - Frente Farabundo Martí para la Liberación Nacional.

La nuna konstituco di la lando adoptesis ye la 15ma di decembro 1983.[6]

La maxim alta korto di Salvador esas la Supra Korto, qua havas 15 membri, di qui 1 elektesas prezidanto di la judiciala povo.

Geografio[redaktar | redaktar fonto]

Mapo di Salvador.
Lago Coatepeque.

Salvador jacas inter la latitudi 13º til 15º N e la longitudi 87º til 91º W. Ol esas la min granda lando di Central-Amerika. Lua frontieri mezuras 545 km, di qui 203 km kun Guatemala e 342 km kun Honduras. Ol havas 307 km di litoro en Pacifiko.

Existas du montokateni paralele a litoro, kun central alta planajo inter la du, e basa tereni apud la litoro. La montoza regioni e l'alta planajo kovras 85% di Salvadorana teritorio. La maxim alta monto esas Cerro El Pital, kun 2730 metri di altitudo.

Salvador havas plua kam 300 fluvii, di qui la maxim longa esas Lempa, la sola navigebla fluvio di lando. Exitas multa lagi en krateri di extingita volkani, esante la maxim importanta la lagi Ilopango (70 km²) e Coatepeque (26 km²).

Lua klimato esas tropikala kun influo dil altitudo en kelka regioni. La pluvoza sezono eventas de mayo til oktobro. Sude de la lando, la pluvozeso povas superirar 2000 mm.

Ekonomio[redaktar | redaktar fonto]

 Precipua artiklo: Ekonomio di Salvador

Quankam lando subisis diversa naturala dizastri dum lua historio, Salvador nune havas stabila ekonomio. Segun la Mondala Banko, ol havas la 3ma maxim granda ekonomio di Central-Amerika.

Kafeo esas la precipua agrokultivala produkturo por exportacajo. Turismo esas l'ekonomiala sektoro qua kreskis plu rapide dum recenta yari.

Cirkume 1/3 de la familii recevas pekunio sendita de exterlando. La valori sendita egaleskas la totalo di exportacaji, e kompensas la komercala deficito en US$ 4.12 bilioni. Ye la 1ma di januaro 2001 Salvador adoptis la dolaro di Usa kom monetaro alonge la Colón Salvadorana.

Demografio[redaktar | redaktar fonto]

La habitantaro di Salvador kreskis de 1,9 milioni en 1940 til 4,7 milioni en 1984[7]. En 2007 eventis demografiala kontado, qua trovis 5 744 113 habitanti[8], ma ca cifro konsideresas kontroversa, nam exemple en San-Salvador existas 316.090 habitanti, ma 287.615 povas votar[8]. To signifikas ke nur 10% de la habitantaro evas min kam 18 yari[8]. Cirkume 90% de la habitantaro esas mestici, 9% deklaris esar blanki, ed 1% esas indijeni. Preske ne existas decendanti de Afrikana en la lando.

Segun l'artiklo 62ma de la konstituco di Salvador, l'oficala linguo di la lando esas Hispana o Kastiliana,[9] e preske tota habitantaro parolas ol. Kelka indijena grupi - min kam 1% de totala habitantaro - duras parolar lua tradicionala lingui, exemple le Pipil e le Maya.

Religio[redaktar | redaktar fonto]

Segun statistiko, 47% de la Salvadorani esas katoliki, 33% esas Evangelikala protestanti.[10], e 17% deklaris su sen religio.[10] L'altra 3% dividesas en Testi di Jehovah, Hare-Krishna, Mohamedani, Buddhisti, ed altri.[10]

Kulturo[redaktar | redaktar fonto]

Procesiono en Izalco.
Danso di la kolekteri di sukrokano, en San Esteban Catarina.

Quale altra Central-Amerikana landi, la kustumi di Salvador havas influi de Hispana e Central-Amerikan indijeni, videbla en la muziki, la dansi ed en la produkturo artizanala. Existas importanta centri di produkturo artizanala en Nahuizalco, La Palma e Ilobasco. Inter l'objekti produktita esas ceramiki, ludili, korbegi, edc.

Katolik-eklezio exercas granda influo en lokala kulturo. Procesioni dum la Santa Semano ed altra religiala festi eventas en multa loki di la lando. L'arkiepiskopo Óscar Romero konsideresas lokala heroo, por rezistar kontre la violaci di homala yuri dum l'interna milito en Salvador. La lando havas poka Afrikana influo kom rezulto di un lego kreita dal Hispani dum la 17ma yarcento e mantenita pos la nedependo til la yari 1980ma, qua interdiktis l'eniro di Afrikani en la lando.

Tradicionala muzikala grupo di Salvador.

Pri literaturo, kelka importanta Salvadorana skriptisti esas Juan José Cañas (1826-1918, de la movado Romantikismo), Francisco Gavidia (1863-1955), Salarrué (1899-1975), Claudia Lars e Miguel Ángel Espino. Pri piktado, l'unesma konocita piktisto akademiala di Salvador esis Wenceslao Cisneros, dum la 19ma yarcento. Dum la 20ma yarcento, kelka piktisti kun Europana influi esis Carlos Alberto Imery - qua stimulis altra piktisti -, Miguel Ortiz Villacorta e Pedro Ángel Espinoza. Salarrué, Zélie Lardé e José Mejía Vides preferis piktar la kustumi de la populo.

La tradicionala muziko di Salvador havas influi de le Maya, Pipil e Hispani. Nune, la ritmi salsa e cumbia - kun influi de Kubana, Kolumbiana e Mexikiana muziki - ed anke hip hop e reggaeton esas la maxim populara.

La maxim populara sporto en Salvador esas futbalo, e du foyi lua nacionala esquado partoprenis en la Mondala Kupo di Futbalo. Pos 1968 la lando partoprenis en tota l'Olimpiala Ludi. Pri la Tot-Amerika Ludi, l'atletino Cristina Esmeralda López ganis unesmafoye l'ora medalio por Salvador en 2007, dum la ludi en Rio de Janeiro, pri la 20-kma atletala marcho.

Referi[redaktar | redaktar fonto]

Wikipedio
Wikivortaro explikas
ca rubriko
en altra lingui: Salvador
Commons
Commons havas kontenajo relatante a:
  1. (2013). El Salvador Survey Data. GeoHive. URL vidita ye la 14 di septembro 2014.
  2. CIA - The World Factbook. Retreivend March 17 2009 (ekonomio)
  3. CEPA. El golfo de Fonseca (en (Hispana)). URL vidita ye la 6ma di marto 2012.
  4. Diccionario Geográfico de El Salvador, p. 1262.
  5. Historia de El Salvador, Tomo I, p. 80.
  6. http://pdba.georgetown.edu/Constitutions/ElSal/constitucion.pdf
  7. "El Salvador - Populational Growth and Age Distribution - Library of Congress Country Studies
  8. 8,0 8,1 8,2 Censo y padrón no coinciden La Prensa Gráfica
  9. Art. 62 de la Constitución de la República de El Salvador de 1983 (en (Hispana)).
  10. 10,0 10,1 10,2 International Religious Freedom Report for 2012. U.S. State Department. URL vidita ye la 2014-03-27.