Salvador (Bahia)

De Wikipedio
Jump to navigation Jump to search
Salvador (Bahia)
Montage Salvador de Bahía.jpg
Kelk imaji pri Salvador, Bahia.
Bandeira de Salvador.svg Brasão de Salvador.jpg
Flago di Salvador Blazono di Salvador
Lando: Flag of Brazil.svg Brazilia
Stato: Bahia
Informo:
Fondita ye: 29ma di marto 1549
Fondita da: Tomé de Sousa
Latitudo: 12º58'29" S
Longitudo: 38º28'36" W
Altitudo: 8 m
Surfaco: 693.2 km²
Habitanti: 2 921 087[1] (2015)
Denseso di habitantaro: 4,213.45 hab./km²
Disto de Brasília: 1.531[2] km
Horala zono: UTC-3
(ne chanjas dum somero)
Urbestro: Antônio Carlos Magalhães Neto (DEM)
Mapo:
Mapo di Salvador (Bahia)
Oficala retosituo:
www.salvador.ba.gov.br
Pelourinho, turistala areo en la centro di Salvador.

Salvador esas la chef-urbo e maxim populizita urbo dil stato Bahia, e la 3ma maxim populizita urbo di Brazilia. Ol fondesis en 1549 da Tomé de Sousa, por esar l'unesma chef-urbo di Brazilia, e funcionis quale to til 1763. Lua kolonial arkitekturo e l'elementi de la mixo di kulturi Afrikana ed Europana videbla, exemple, en lua karnavalo ed en lua religiala eventi, atraktas mili di turisti omnayare, sive Braziliani, sive stranjeri. Lua historiala centro (quartero Pelourinho) deklaresis Mondala Patrimonio dal UNESKO en 1985.

Ultre turismo, l'urbo esas importanta komercala, servadala e portuala centro de la Nord-estala regiono di Brazilia. La Federala Universitato di Bahia (UFBA) e l'unesma skolo-tereno di la Universitato dil Stato Bahia (UNEB) jacas en Salvador. Importanta entraprezi Braziliana, exemple Odebrecht, Braskem, Coelba e Kompanio Suzano, havas lia sideyi en Salvador.

En 2015 l'urbo havis 2 921 087 habitanti. La surfaco dil municipo esas 693.2 km². Lua metropolala regiono havis 3 984 583 habitanti en 2016, esante la 7ma maxim populizita metropolala regiono di Brazilia.

Geografio[redaktar | redaktar fonto]

La lago Abaeté.

Salvador jacas en peninsulo en formo di triangulo, an l'eniro di la bayo Todos os Santos, kun entote 343 km². De la bayo, cirkume 350 km² apartenas al areo di Salvador,[3] ed ibe jacas kelka insuli ed insuleti, exemple Maré, dos Frades, do Bom Jesus dos Passos, de Santo Antônio, dos Santos, e l'insulo Coqueiros, kun entote 30 km² di areo insulala. Salvador anke posedas multa plaji, exemple Itapuã, Artistas e Porto da Barra. Lua plaji atraktas lokala viziteri ed anke turisti, pro la temperaturo de lia aqui. Du lagi, l'artificala Dique do Tororó e la naturala Abaeté, anke kompozas l'urbala peizajo di Salvador.

La planajo (Cidade Baixa) adsinistre, e la kolini (Cidade Alta) adsinistre.

La reliefo di Salvador dividesas en du arei: la streta rivala planajo nomizita Cidade Baixa, e la kolinoza regiono nomizita Cidade Alta. La du arei separesas per taluso alta de 85 metri en kelka loki.[4] La mezavalora altitudo dil urbo esas 8 metri.

La klimato dil urbo esas tropikala humida, sen sika sezono e temperaturo preske konstanta dum la yaro. La mezavalora temperaturo esas 25°C.

La mezavalora yarala pluvozeso esas 1969,6 mm, esante aprilo e mayo la maxim pluvoza monati, kun plua kam 300 mm single.

Transporto[redaktar | redaktar fonto]

Treno dil metroo en la staciono Pirajá.

L'urbala transporto di Salvador konsistas ek du linei di metropoliteno kun entote 33 km e 20 stacioni, qua inauguresis por la Mondala Kupo di Futbalo di 2014. Por plubonigar l'efikiveso dil sistemo di transporti, multa linei di autobusi nune konektesas a la stacioni di metroo. Anke existas 1 lineo dil anciena sistemo di treni dil urbo, kun entote 13,5 km e 10 stacioni. La lineo, qua ligas la centrala staciono Calçada a la quartero Paripe, komencis modernigar dum la yari 2010ma.

Salvador anke ligesas per autobusi a vicina urbi de lua metropolala regiono, e per paromi al insulo Itaparica ed altra insuli an la bayo Todos os Santos. Quale altra granda urbi, existas multa taxii e vehili lokacebla per la sistemo UBER.

Referi[redaktar | redaktar fonto]

  1. (28ma di agosto 2015) Estimativas da população residente no Brasil e unidades da federação com data de referência em 1º de julho de 2015. Instituto Brasileiro de Geografia e Estatística. URL vidita ye la 28ma di agosto 2015.
  2. Capitais dos Estados (en Portugalana). Atlas Geográfico do Brasil. Editora Melhoramentos. URL vidita ye la 10ma di mayo 2009.
  3. Athayde, Eduardo (24ma di mayo 2016). Quanto vale o 'Território Molhado' de Salvador?. www.bahianoticias.com.br. URL vidita ye la 1ma di oktobro 2016.
  4. Brazil, Salvador, Bahia: Elevador Lacerda (en Angla). URL vidita ye la 8ma di julio 2012.