Roraima

De Wikipedio
Jump to navigation Jump to search
Roraima
Bandeira de Roraima.svg Brasão de Roraima.svg
Chef-urbo Boa Vista
Brazil State Roraima.svg
Surfaco 224 300,5 km²
Habitanti
Denseso di habitantaro
505 665[1] (2015)
2.5 hab./km²
Guberniestro Suely Campos (PP)
Posto-kodal abreviuro RR
Horala zono UTC-4
TNP (yaro) R$ 9.03 miliardi (2013)
Reto www.portal.rr.gov.br

Roraima esas un ek la 27 stati di Brazilia. Ol jacas an la Norda regiono di lando. Lua vicina stati esas Pará en esto, ed Amazonas en sudo ed en sud-westo. Lua vicina landi esas Venezuela, en westo ed en nordo, e Guyana en esto.

Ol esas la min populoza stato di Brazilia, kun 505 665 habitanti en 2015. Ank esas la stato kun la min granda denseso di habitantaro di Brazilia: nur 2.25 habitanti per km².

Bazala fakti pri Roraima.

Historio[redaktar | redaktar fonto]

Fluvio Branco, la maxim importanta fluvio di Roraima.

Angli e Nederlandani ja explorabis la regiono ante l'arivo di Portugalani. Hispani anke venis de Venezuela por explorar la regiono. Portugal nur establisis lua suvereneso super la regiono dum la 18ma yarcento, kande religiozi Karmeliti komencis konvertar indijeni en la regiono, pos 1725.[2]

Pos la duimo dil 18ma yarcento Portugalana krono decidis establisar la royala kapitanio di São José do Rio Negro por haltar la konstanta invado dal Hispani en la regiono. La kapitanio formale kreesis ye la 3ma di marto 1755. En 1755 li konstruktis la fuorto São Joaquim en la regiono. Ultre haltar la invadi, altra motivo por krear la kapitanio esis pro ke pos la Kontrato di Madrid en 1750 Portugal recevis la regiono e mustis koloniigar ol. Li komencis edukar bovaro e kavali en la regiono en 1789.

Boa Vista en 1924.

Angli invadis la regiono dum un yaro, de 1810 til 1811. Li ekpulsesis dal komandero dil fuorto São Joaquim. La frontiero inter Brazilia e Guyana bezonis ridetermino, pro la konstanta invadi dal Angli.[2] La koloniigo stimulivesis en 1830 kun la kreado di la nacionala farmeyi São Bento, São José e São Marcos, qui okupis tota l'alta regiono dil fluvio Branco.[3]

Nur en 1890 kreesis l'urbo Boa Vista, lore kun nur 1.000 habitanti, qua nune esas la chef-urbo dil stato. Ye la 13ma di septembro 1943 la regiono separesis del stato Amazonas por krear la Federala Teritorio di Rio Branco, pose rinomizita federala Teritorio di Roraima en 1962.

Kun Konstituco di 1988 en Brazilia, Roraima divenis stato. L'unesma provizora guberniestro dil stato pos lua kreado esis Romero Jucá Filho. En 1990 eventis l'unesma direta elekti por guberniestro dil stato, e Ottomar de Souza Pinto elektesis por guvernar de januaro 1991 til decembro 1994.

Geografio[redaktar | redaktar fonto]

Choseala mapo di Roraima.
Monto Roraima, an la frontiero kun Venezuela e Guyana.

Kun 224 300,5 km² - di qui cirkume 104 018 km² esas indijena landi - la surfaco totala di Roraima esas poke min granda kam Minnesota. L'Equatoro trairas la stato, e Rio Branco esas l'unika chefurbo Braziliana norde de Equatoro.

Cirkum 60% de la surfaco dil stato havas altitudi infre 200 metri. Altra 25% havas altitudi de 200 m til 300 m. Nur 1% de lua surfaco superiras 900 metri di altitudo. L'altitudo kreskas proxim la frontiero kun Venezuela e Guyana. La maxim alta monto dil stato esas Monto Roraima, an la frontiero kun Venezuela e Guyana, kun 2,875 metri sur la marala nivelo.

La klimato dil stato esas tropikalo, kun 26 °C di mezavalora temperaturo. Granda parto di lua teritorio kovresas per equatorala foresto, e per savano este del stato.

La precipua choseo dil stato esas BR-174, qua unionas Boa Vista kun Manaus (Amazonas) sude, e kun Pacaraima (an la frontiero kun Venezuela) e, de ibe, til Caracas. Altra importanta choseo, BR-401, unionas Boa Vista kun Normandia, an la frontiero kun Guyana.

Ekonomio[redaktar | redaktar fonto]

Centro di Boa Vista.
Komerco en Pacaraima, an la frontiero kun Venezuela.

Quankam la KLP di Roraima kreskas plu rapide kam altra stati, lua KLP esas la min granda di Brazilia: nur R$ 9.027 miliardi en 2013. La stato havas importanta minerala erci di oro, diamanto, stano, aluminio e kupro. La precipua ekonomikal agado esas servado (qua reprezentas cirkume 47.3% de KLP), pose industrio ed agrokultivo. La precipua exportacaji dil stato esas ligno segata (39.13% de la exportacaji) e soyo (33.29%).

Til la duimo di la 1990a yari Roraima havis grava problemi pro la manko di elektro. En 2001 inauguresis l'aquobarilo Guri/Macaguá, an la frontiero kun Venezuela, qua furnisas elektro a la du landi.

Referi[redaktar | redaktar fonto]

  1. (28ma di agosto 2015) Estimativas da população residente no Brasil e Unidades da federação com data de referência em 1º de julho de 2015. (PDF) Instituto Brasileiro de Geografia e Estatística.
  2. 2,0 2,1 A história de Roraima. Roraima Virtual.
  3. De área isolada no Vale do Rio Branco a uma cidade acolhedora (en Portugalana). FolhaWeb. URL vidita ye la 18ma di septembro 2016.