Oktobro 2005

28ma di oktobro (venerdio)

India - Pluvegi: Adminime 82 personi mortis e deki de mili de altra homi mustis evakuesar en sud-India. Ita regiono frapesas depos tri dii da abundantega somerala pluvi qui produktis inundegi.

Tailando - Terorismo: Kin vilajani e milicani mortigesis, hiere matine, lor inkurso qua impulsesis da Mohamedista rebeli kontre 50 vilaji di sud-Tailando. Ita ataki vizis la vilajala milicani, qui organizesas dal guvernerio por kombatar l'extremista Mohamedani.

Rwanda - Historio: Anciena Rwandana oficiro, lietnanto Abdul Ruzibiza, asertas en libro qua publikigesis, hiere, ke generalo Paul Kagame komendis la atento kontre la "Hutu"-a prezidanto Juv nal Habyarimana en 1994. Ita atento esis la origino dil gentocido qua eventis, pose, ibe.

Nord-Korea : La guvernerio di Pyongyang renuncas la militistala nuklealaji.
Pakistan : Pos la katastrofala tertremi, Pakistan ne recevas suficanta pekunio ed helpo por sokursar la viktimi.
Iran : Iran blamesas e kritikesas akre pro lua minaci kontre Israel. (Idala Jurnaleto)

Polonia - Politikala deskonkordo: Grava krizo eruptis, hiere, en Polonia lor la negociado vizanta formacar dextrala koalisuro; nome la liberala partiso e la konservema partiso ne sucesis interkonsentar por grantar ad ulu la prezidanteso dil Dieto (Basa Chambro).
Unionita Rejio - La spozino di Tony Blair havas problemi: Cherie Booth (spozino dil Britaniana chefministro Tony Blair) esas en problematra situeso konseque di pekuniifanta voyajo quan el entraprezis en Australia. L'Australiana autoritatozi inquestas pri la pekunio quan el obtenabus koncerne lua partopreno ye gala-dineo favore a la Australian instituto kontre la kancero dil kindi* (ne-adulta personi), nome elu recevabus multe plu multa pekunio kam la Instituto furnisis, pos ita gala-dineo, por kombatar ica morbo.
Irak - La proceso di Saddam Hussain: Pro ke li opinionas ke lia vivo minacesas pos la asasino di un de lia kolegi, la advokati di Saddam Hussain en Amman cesis omna kontakti kun la specala Tribunalo Irakana qua judicias l'anciena prezidanto. En la pasinta 20ma di oktobro, la defensero di un de la kunakuzati di la diktatoro raptesabis en Baghdad e, pose, mortigesis.
Siria: Moskva defias Washington.
Germania: La Germana judiciisti subisigas severa punisi ad Mohamedana teroristi.
Republiko Irlando: Nova e severa legi kontre la pedofilio adoptesas.

Kuba - Fuganti: Plu kam la duimo del quaradek membri dil nacionala Koro di Kuba departis, sundie, lor profesionala voyajo a Kanada. Li fugis e volas obtenor la statuto di politikala refujanti.
Hispania - Itere atenti en Baskia: Quar bombo-atenti facesis dum la nokto de lundio til mardio kontre tribunali di Baskia e di Navara, sen efektigar vunditi. "On supozas ke ita atenti facesis dal ETA", deklaris parolo-reprezentanto dil autonoma Baska polico.
Hungaria - Bombo-alarmo: Bombo-alarmo koaktis Turka aviono tervenar en Budapest, hiere, dum dimezo. 80 pasajeri esis interne di ol, tale anuncis la Budapest-aerportuo per komunikajo.
Europana Uniono: Morge eventos renkontro di Tony Blair e Jacques Chirac. Existas forta tensi inter Unionita Rejio e Francia.
Usa: Transmondesko di Rosa Parks, Usana kombatantino por la civitanala yuri dil Afrikana-Usana komunajo.
Senegal: Riestabliso dil diplomacala relati inter Popul-Republiko Chinia e Senegal.

Kuba - Skandalo en Guantanamo: Usana ex-militistal sacerdoto deklaris, hiere, che la publika kanalo dil Australiana televiziono-staciono ABC, ke Usana militisti propozabus ad Australian islamisto, enkarcerigita en Guantanamo depos quar yari, furnisar a lu prostitucatini kambie di informi.
Chipro - Guverneriala vizito: Prezidanto di Chipro, Tassos Papadopoulos, esas vizitonta oficale Francia dum tri dii quik de la 3ma di novembro. Dum ita vizito il renkontros la Franca prezidanto dil Republiko, same kam la prezidanto dil nacionala Asemblo nome Ioannes-Ludovikus Debreo (Jean-Louis Debre).
Rumania - Kad EU (UE) adhero? La jurnalaro di București facis, hiere, questioni pri posibla ajorno dil Rumania-adhero ye Europana Uniono qua previdesas dum januaro 2007. Ico eventas ye la predio di raporto-prizento, che la Europana Parlamento, qua evaluas la esforci di ca lando por adaptesar a la reguli dil Europana Uniono.
Norvegia : Rusa pesko-navo arestesis da Norvegiana marbordo-gardisti pro ke li suspektas lu pri nelegala peskado.
Hispania : Baski postulas "plurnaciona" Hispania.
Polonia : prezidanto Lech Kaczyński elektesas danke la voti dal Polona populisti.

Afgania - Tertremo: Sismo sukusis, hiere matine, la esto di Afgania. Adminime kin personi mortigesis e sis plusa personi vundesis. Plura habiteyi destruktesis en la provinco Paktika ye 200 km de Kabul.
Unionita Rejio - Terorismo: La policani arestis viro evanta 27 yari en la regiono West Yorkshire, nord Anglia pro inquesto-rezulti pri la atenti eventinta ye la 7ma di julio en London. Tri de la quar atenti-faceri qui efektigis 56 mortinti e preske 700 vunditi, lojis o lojabis en West Yorkshire.
Rumania - Usana militisti: La negociado por la kreo di Usana militistal provizerio en Rumania "por tale dicar finis", deklaris, hiere, prezidanto Traian Basescu, pos diskutir kun Stephen Hadley, konsilanto pri nacionala sekureso dil prezidanto di Usa. La posibla peizaji selektita esas "Babadag, Constanta, ed eventuale Fetesti", en la esto di ca lando.
Italia: La mafioza chefo Umberto di Fazio arestesis hiere.
Bielorusia: Du Poloni ekpulsesis de Bielorusia pro subversanta aktivesi kontre la lokala guvernerio.
Unionita Rejio: Grava intergenta sedicii en Birmingham.

Afgania - Plusa profanaci: La Pentagono konfrontesis, hiere, a plusa akuzi pri profanaco, pos olti qui expresesis dum mayo koncerne la Korano. Ol komencis inquesto pri Usana soldati en Afgania, qui brulabis e montrabis la kadavri di du rebeli.
Usa - Filii-mortigerino: Familio-matro, evante 23 yari, qua suspektesas forjetir tri de lua filii, evanta rispektive sis yari, tri yari, e dek-e-sis monati aden la glaciale kolda aquo di la bayo di San-Francisko, arestesis ed akuzesis, hiere, pro mortigo. On ja trovis la senviva korpo dil duesma filio. La du ceteri duras serchadesar.
Arjentinia - La fato di Serbo en Arjentinia: La Serbo Nebjosa Minic, qua persequesis pro milit-krimini dal judiciisti di lua lando, mortis hiere en hospitala en Arjentinia ube lu esis nelibera depos pasinta mayo. Minic, lor evanta 40 yari, vizesis da internaciona aresto-dokumentaro pro milit-krimini facita dum la yari 1990.
Irak: Un de l'advokati di Saddam Hussein raptesis en Baghdad.
Francia: La Franca ministrerio pri Exterlandal Aferi konfirmas la morto dil raptita jurnalisto Franca, Frédéric Nérac, en Irak.
Tajikia : La tajika ministerio pri edukado interdiktis, hiere, la surhavo dil Mohamedana kaptuko en la skoli di ca lando por impedar la propagado dil Mohamedana ideologio.