Historio di Santa Lucia
Segun kelka historiisti, Santa Lucia habitesis unesme dal indijeni de raso Ciboney, inter 1,000 e 500 yari aK. Cristoforo Colombo deskovris l'insulo en 1502 ye la festo-dio di Santa Lucia (la 13ma di decembro), e nomesis tale pro lo, ma ne koloniigis ol. Dum la yari 1550ma, Franca pirato François le Clerc freque vizitis l'insulo.
L'Angli arivis unesmafoye dum la komenco di la 17ma yarcento, ma faliis en lia unesma esforci por koloniigar l'insulo: en 1605 Angla navo Olive Branch adportis 67 kolonigiisti al insulo, e 5 semani pose nur 19 transvivabis, pro la morbi e pro l'atako dal indijeni Karib. En 1643 Franci establisis l'unesma kolonieto en l'insulo. Li signatis pakto kun le Karib en 1660, e komencis kultivar sukrokano en vasta plantacerii.
Dum la 18ma yarcento Francia e Britania luktis diversa foyi pri la kontrolo di Santa Lucia. Dum sep-yara milito Britania okupis l'insulo, ma retrodonis ol a Francia en 1763. Kande Franci okupis l'insuli, li probis uzar indijeni kom sklavi en la plantacerii. Multa indijeni mortis pro morbi adportita dal Europani, note variolo. Multa Afrikana sklavi anke mortis, pro la severa laborala standi en la plantacerii.
Kande eventis la Franca revoluciono, revolucionala tribunalo instalesis en l'insulo. En 1794 la guberniestro dil insulo deklaris sklaveso abolisita. Pokatempe pose, Britaniani itere invadis l'insulo, ma ye la 21ma di februaro 1795 eventis revolto di lokala habitanti kontre Britaniani. La sequanta yaro Britaniani brulis Castries, ma nur en 1803 li prenis kompleta kontrolo dil insulo.
Unionita Rejio e Francia duris disputar la dominaco pri Santa Lucia til 1814 kande Britaniani definite aquiris ol. De 1958 til 1962 Santa Lucia divenis parto di la Federuro di Westal Indii. En 1953 universala votado adoptesis. En 1967 l'insulo recevis autonomio ed, ye la 22ma di februaro 1979 ol divenis nedependanta de Unionita Rejio. John Compton, de la partiso United Workers Party (UWP), esis l'unesma chefministro di la nedependanta lando.
Kenny Davis Anthony, de la partiso Labour Party esis chefministro di la lando de 1997 til 2006, kande la partiso UWP komandita da John Compton ganis l'elekto. La sequanta yaro, Compton subisis diversa cerebrala stroki, e abandonis povo la 1ma di mayo 2007. Stephenson King asumis provizore til la morto di Compton e pose guvernis til novembro 2011, kande la partiso Labour itere vinkis l'elekto, e Kenny Anthony itere divenis chefministro.