Sud-estala regiono (Brazilia)
Sud-estala regiono di Brazilia (en Portugalana Região Sudeste do Brasil) esas geografiala regiono di Brazilia kompozata da 4 stati: Minas Gerais, Espírito Santo, Rio de Janeiro, e Sao Paulo. Ol jacas sur 924.511,3 km², qua reprezentas 10,85% di totala surfaco di lando, ed esas la maxim populoza regiono di lando, kun 77,656,762 lojanti segun kontado 2010[1].
Ta subdividuro - Sud-estala regiono - nek politikala nek administrala, nur havas geografiala signifiko. Lua 9 stati generale havas simila peizaji ed ekonomii.
Indexo |
[redaktar] Geografio
[redaktar] Reliefo
On existas montaro paralela a litoro konocata kom Serra do Mar ("marala montaro"), qua krucumas la regiono de la frontiero inter Espírito Santo e Minas Gerais til la sudo di Sao Paulo. Ol recevas lokala nomi en kelka regioni, kom Serra da Mantiqueira proxim la bordero inter Sao Paulo, Rio de Janeiro e Minas Gerais. En kelka loki lua altitudo povas superigar 2.000 o 2.500 metri sur la mar-nivelo.
Proxim litoro la reliefo esas generale formata da larja basa tereni, ecepte en poka loki kom Angra dos Reis, Parati ed en nordala litoro di Sao Paulo. Mar-fora, l'averalala altitudo diminutas, ed atingas min ke 250 metri en l'urbo di Rosana, proxim Paraná fluvio.
[redaktar] Vejetantaro
Kande Portugalani arivis dum 16ma yarcento la regiono esis kovrita da vasta e humida tropikala foresto en litoro e da savano mar-fora. La du tipi di foresti esis graduale devastita, specale pos 19ma yarcento, por instalar urbi ed agrokultivi. Nune lastas min ke 10% di origina tropikala foresto, specale en la regiono di Serra do Mar montaro. Malgre ta, la foresto konservas richa biodiverseso.
Mar-fora Sao Paulo e Minas Gerais parto di originala savano esas uzata por edukado di boviari e por agrokultivo di soyo, sukrokano, oranjo e kafeo. Multa importanta urbi, kom Uberaba ed Uberlandia en Minas Gerais, e Ribeirão Preto, Bauru, São José do Rio Preto e Presidente Prudente en Sao Paulo, nune kun importanta komerco, industrio e servadi, jacas en ta regiono.
En nordo di Minas Gerais (regiono di Montes Claros ed en Valo di Jequitinhonha) on existas miarida klimato e vejetantaro di caatinga, kompozata da planti qua perdas lua folii dum sika monati. En parto di la litoro di Espírito Santo, Rio de Janeiro e Sao Paulo on existas zoni kovrata da manglieri. En alta monti (plu kam 2.000 metri di altitudo, en la regiono di Serra do Mar) on trovas herboza vejetantaro. Finale, en sudo dil stato di Sao Paulo on trovas mikra boski di araucaria, endemika Braziliana konifero.
[redaktar] Klimato
La predominanta klimati di la regiono esas humida tropikala klimato proxim litoro, generale kum intensa pluvi dum somero. Mar-fora on havas tropikala klimato kun du sezoni - sika e pluvoza. En alta monti on existas tropikala klimato di altitudo, kun quar sezoni. L'urbo di Campos do Jordão, qua jacas 1.600 metri sur la mar-nivelo, havas un di maxim kolda klimati di Brazilia.
En la sudo di Sao Paulo on existas subtropikala klimato, generale kun quar sezoni e transito inter la richa vejetantaro di tropikala foresto e la vejetantaro di savano. En nordo di Minas Gerais on havas mi-arida tropikala klimato, kun sika sezono qua povas lastar preske 1 yaro.
[redaktar] Hidrografio
La du precipua hidrografiala baseni de la regiono esas la baseno di Paraná fluvio en la westo di Sao Paulo e Minas Gerais, e la baseno di São Francisco fluvio en nordo di Minas Gerais. La baseno di Paraná recevas importanta fluvii, kom Tietê, Grande e Paranaíba. Un di la precipua enfluanti di São Francisco fluvio esas Velhas fluvio (Rio das Velhas) qua naskas en Ouro Preto e krucumas la metropolala regiono di Belo Horizonte.
Altra importanta fluvii esas Paraíba do Sul (lua baseno recevas mikra fluvii en Sao Paulo, Minas Gerais e Rio de Janeiro), Pardo, Doce e Jequitinhonha, qua fluas este vers Atlantiko, e la baseno di Ribeira do Iguape fluvio, en sudo di Sao Paulo.
[redaktar] Demografio
| Urbo | Populo segun demografiala kontado 2010 |
|---|---|
| São Paulo | 11,244,369 |
| Rio de Janeiro | 6,323,037 |
| Belo Horizonte | 2,375,444 |
| Guarulhos | 1,222,357 |
| Campinas | 1,080,999 |
| São Gonçalo | 999,901 |
| Duque de Caxias | 855,046 |
| Nova Iguaçu | 795,212 |
| São Bernardo do Campo | 765,203 |
Totala populo-quanto di Sud-estala regiono esas plu kam Italia, Hispania e Francia. En la regiono jacas la tri maxim populoza stati di Brazilia: Sao Paulo, Minas Gerais e Rio de Janeiro.
L'urbo di Sao Paulo, kun plu kam 11 milioni lojanti ye 2010[1] esas la maxim populoza di sudala misfero. Rio de Janeiro, kun plu kam 6,18 milioni lojanti, esas duesma granda urbo di lando. Altra importanta urbi en la regiono esas Belo Horizonte (plu kam 2,4 milioni lojanti), Guarulhos (cirkum 1,3 milioni lojanti) e Campinas (1,06 milioni lojanti).
Til 18ma yarcento la populo di la kapitanio di Sao Paulo generale ekmigris vers altra regioni, unesme por kaptar indijeni por uzar kom sklavi mar-fora Brazilia e, pos fino di 17ma yarcento, por explorar oro en Minas Gerais. Dum 19ma yarcento ta tendenco modifikis su danko a l'expando di producajo di kafeo. Pos la duesma duimo di 19ma yarcento til 1930 Sao Paulo recevis granda nombro di Europana ekmigranti, specale Italiani, por verkar en agrokultivo di kafeo ed anke en l'industrio. Altra importanta grupi di ekmigranti en nombro esis Portugalani, Hispaniani, Rusiani, Turkiani, Arabi e, pos 1908, Japoniani.
Dum 20ma yarcento specale pos 1950 Sao Paulo - ed en min quanteso Rio de Janeiro - recevis granda nombro di Braziliani de Nord-estala regiono e de Minas Gerais - en reversiono di la tendenco de 18ma yarcento - por verkar en lua rapida developanta industrii.
[redaktar] Ekonomio
Maxim populoza e maxim richa regiono di Brazilia, ol havas la duesma maxim granda IHD di lando, 0,824, nur min granda ke l'indexo di Suda regiono. Sud-estala regiono esas responsebla por cirkum 60% di Braziliana kuntara landala produkto. La KLP dil stato di Sao Paulo esas cirkum 550 miliardi di dolari, equivalanta ad 33% di Braziliana KLP. Lua ekonomio esas bazata en moderna industrii e agrokultivi, edukado di boviari, extraktado di petrolo (en Rio de Janeiro), turismo e tota tipi di servadi.
L'industrii esas precipue di mashini, automobili, konstrukturo di edifici, texala industrio, kemiala e petrokemiala, elektronikala, aeronautik industrio (en Sao Paulo), navala industrio (en Rio de Janeiro), stofi e transformacajo di alimenti. Sao Paulo koncentras granda nombro di industrii, sequita da Minas Gerais e Rio de Janeiro. Lua granda urbi koncentras moderna e diversigata servadi (banki, financala servadi, informatiko, komerco, edc.,), ed en l'internajo on existas moderna e mashinigata agrokultivi, precipue di sukrokano, oranjo, kafeo e soyo, e kolokado di boviari, porki ed uceli.
.jpg)
La litoro di Campos, la stato di Rio de Janeiro, on produktas nune plu kam 22 milioni m³ di natur gaso e 1,49 milioni di bareli di petrolo omnadie.
En la regiono anke jacas maxim turistala urbo di Brazilia: Rio de Janeiro.
| Stato | KLP (milioni di R$) | Rango en Braziliana ekonomio | KLP per persono en R$ |
|---|---|---|---|
| Sao Paulo | 1,003,016 | 1 | 24,457 |
| Rio de Janeiro | 343,182 | 2 | 21,621 |
| Minas Gerais | 282,522 | 3 | 14,233 |
| Espírito Santo | 69,870 | 11 | 20,230 |
[redaktar] Transporto
Sud-estala regiono havas la maxim granda reto di fervoyi e la maxim importanta reto di voyi di Brazilia. Dutra voyo, qua unionas l'urbi di Sao Paulo e Rio de Janeiro esas la precipua koridoro por vari e personi di lando e permisas unionar la sudo kun la nord-estala regiono di Brazilia. Altra importanta voyo esas: Fernão Dias, qua unionas l'urbi di Sao Paulo e Belo Horizonte; BR-040, qua unionas Rio de Janeiro kun Belo Horizonte e Brasília en Centro-westala regiono; e BR-101, qua unionas Rio de Janeiro kun Vitória e la Nord-estala regiono di Brazilia, proxim litoro.
La regiono havas tri internaciona aeroportui: São Paulo-Guarulhos (aeroportuo di Cumbica), Rio de Janeiro (aeroportuo Tom Jobim) e Belo Horizonte (aeroportuo di Confins); e 6 granda portui: Santos e São Sebastião en Sao Paulo, Itaguaí (anciena Sepetiba) e Rio de Janeiro en Rio de Janeiro, e Vitória e Tubarão en Espírito Santo.
[redaktar] Referi
- ↑ 1.0 1.1 http://www.censo2010.ibge.gov.br/dados_divulgados/index.php
- ↑ Picos da Bandeira e do Cristal já têm novas altitudes. Artiklo en Portugalana
