Olimpiala Ludi en Paris, 1924

L'Olimpiala Flago.

L'Olimpiala Ludi en Paris, 1924 od oficale la 8ma Olimpiala Ludi esis internaciona poli-sportala konkurso qua eventis ye 1924 en Paris, Francia. Esis la duesma foyo ke Paris recevis l'Olimpiala Ludi, unesma esis ye 1900.

Le Ludi komencis ye 4 di mayo e finis ye 27 di julio 1924, kun la partopreno di 3.089 atleti (135 mulieri e 2.954 viri) de 44 landi. Esis 126 eventi de 17 sporti.

Kelka fakti

Stadiono di Colombes, ube okuris la ceremonio di aperturo.

• la ceremonio di aperturo okuris en la Stadiono di Colombes, qua havis la kapaceso di 45.000 personi ye 1924.
• Johnny Weissmuller (qua pose esis l'aktorulo qua interpretis Tarzan en cinemo) ganis 3 ora medalii por natado.
• Paavo Nurmi de Finlando ganis ora en 1.500 e 5.000 metri. Ville Ritola ganis ora en 10.000 metri ed en 3.000 metri obstaklo-kuro, ed arjenta en 5.000 metri. Albin Stenroos ganis ora medalio en maratono. Le 3 atleti divenis konocita kom le fluganta Finlandani.
• 24 viri ganis 10 punti en gimnastiko.
• la distanco di la maratono esis fixigita en 42 kilometri e 195 metri.
• Mexikia, Uruguay, Equador, Polonia, Estonia, Filipini e Latvia partoprenis por l'unesma foyo ta yaro.

Medalii ganita

Landi qua partoprenis en l'Olimpiala Ludi ye 1924 (verda e blua). En blua, landi qua partoprenis por l'unesma foyo ta yaro.

Hike esas la listo di landi qua recevis adminime 1 bronza medalio en Paris ye 1924.

#	Lando	Ora	Arjenta	Bronza	Entote
1	Usa	45	27	27	99
2	Finlando	14	13	10	37
3	Francia	13	15	10	38
4	Unionita Rejio	9	13	12	34
5	Italia	8	3	5	16
6	Suisia	7	8	10	25
7	Norvegia	5	2	3	10
8	Suedia	4	13	12	29
9	Nederlando	4	1	5	10
10	Belgia	3	7	3	13
11	Australia	3	1	2	6
12	Dania	2	5	2	9
13	Hungaria	2	3	4	9
14	Yugoslavia	2	0	0	2
15	Chekoslovakia	1	4	5	10
16	Arjentinia	1	3	2	6
17	Estonia	1	1	4	6
18	Sud-Afrika	1	1	1	3
19	Uruguay	1	0	0	1
20	Austria	0	3	1	4
20	Kanada	0	3	1	4
22	Polonia	0	1	1	2
23	Haiti	0	0	1	1
23	Japonia	0	0	1	1
23	Nova-Zelando	0	0	1	1
23	Portugal	0	0	1	1
23	Rumania	0	0	1	1
Totali		126	127	125	378